ഐ ഫോണ്‍ വാങ്ങിയാല്‍ 7000 രൂപ വരെ കാഷ് ബാക്ക്; വായ്പകളിലെ പ്രോസസിങ് ഫീയും കുറച്ച് എച്ച് ഡി എഫ് സി

ഉത്സവകാലം പ്രമാണിച്ച വലിയ തോതിലുള്ള ഓഫറുകളാണ് ബാങ്കുകള്‍ പ്രഖ്യാപ്പികുന്നത്. എസ് ബി ഐക്കും ഐ സി ഐ സി ഐക്കും പിന്നാലെ ഇപ്പോള്‍ എച്ച് ഡി എഫ് സി ബാങ്കും ഉത്സവകാല ഓഫര്‍ പ്രഖ്യാപിച്ച് രംഗത്ത് വന്നിരിക്കുകയാണ്. വിവിധ വായ്പകളുടെ പ്രോസസിങ് ഫീസുകളില്‍ വന്‍ ഇളവുകളാണ് എച്ച് ഡി എഫ് സി പ്രഖ്യാപിച്ചിരിക്കുന്നത്. വാഹന, വ്യക്തിഗത വായ്പകള്‍ക്കുള്ള പ്രൊസസിങ് ഫീ 50 ശതമാനം വരെയാണ് കുറച്ചത്. ബിസിനസ് വായ്പകള്‍ക്കും ഈ ആനുകൂല്യം ലഭിക്കും.

ഇരുചക്രവാഹന വായ്പകള്‍ക്കാവട്ടെ പ്രോസസിങ് ഫീസ് ഇല്ല. ഇതിന് പുറമെ കുറഞ്ഞ ഇ എം ഐ സംവിധാനം കാഷ് ബാക്ക്, ഗിഫ്റ്റ് വൗച്ചറുകള്‍ എന്നിങ്ങനെയുള്ള നിരവധി ആനുകൂല്യങ്ങളും ഉത്സവ സീസണ്‍ പ്രമാണിച്ച് എച്ച് ഡി എഫ് സി പ്രഖ്യാപിച്ചിട്ടുണ്ട്. ബ്രാന്‍ഡുകളുമായുള്ള സഹകരണത്തിന്‍റെ ഭാഗമായി അവരുടെ ഉത്പന്നങ്ങല്‍ വാങ്ങുമ്പോള്‍ നടത്തുന്ന ഇടപാടുകള്‍ക്കും ആനുകൂല്യം ലഭിക്കും.

ആപ്പിളിന്റെ ഉത്പന്നങ്ങള്‍ വാങ്ങുമ്പോള്‍ 7,000 രൂപ വരെ കാഷ് ബാക്ക് നല്‍കും. ആപ്പിളിന് പുറമെ സാംസങ്,എല്‍ ജി, സോണി, പാനസോണിക്, ഗോദ്റേജ് തുടങ്ങിയ ബ്രാന്റുകള്‍ക്കും വിവിധ ഓഫറുകള്‍ നല്‍കുന്നുണ്ട്. ആമസോണ്‍ ഗ്രേറ്റ് ഇന്ത്യാ ഫെസ്റ്റിവലിനോട് അനുബന്ധിച്ച് എച്ച് ഡി എഫ് സി ഇടപാടുകാര്‍ക്ക് 10 ശതമാനം വരെ ഡിസ്കൗണ്ടും നല്‍കും.