ചൂടില്‍ വലഞ്ഞ് സംസ്ഥാനം,യുവി സൂചിക ഉയര്‍ന്നു, ആരോഗ്യപ്രശ്നങ്ങള്‍ക്ക് സാധ്യതയെന്ന് ദുരന്തനിവാരണ അതോറിറ്റി

കനത്ത ചൂട് കേരളത്തിലെ സാധാരണ ദിനങ്ങളെ താറുമാറാക്കി. പല ഭാഗങ്ങളിലും താപനില 34 മുതല്‍ 37 ഡിഗ്രി സെല്‍ഷ്യസ് വരെ ഉയര്‍ന്നു. മഴയില്ലാത്തതിനാല്‍ വരണ്ട കാലാവസ്ഥ നിലനില്‍ക്കുകയാണ്.

37 ഡിഗ്രി സെല്‍ഷ്യസ് രേഖപ്പെടുത്തിയ കോട്ടയമാണ് ചൂടേറിയ ജില്ല. കൊച്ചി 34 ഡിഗ്രിയും കണ്ണൂര്‍ വിമാനത്താവള പരിസരം 36.2 ഡിഗ്രിയും പുനലൂര്‍ 35.6 ഡിഗ്രി സെല്‍ഷ്യസും വെള്ളാനിക്കര 35.3 ഡിഗ്രി സെല്‍ഷ്യസും തിരുവനന്തപുരം 34.6 ഡിഗ്രി സെല്‍ഷ്യസും രേഖപ്പെടുത്തി.

ഫെബ്രുവരി-മാര്‍ച്ച് മാസങ്ങളില്‍ ഈ താപനില അസാധാരണമാണെന്നും അതുകൊണ്ടുതന്നെ കരുതലെടുക്കണമെന്നും വിദഗ്ധര്‍ അറിയിച്ചു.സാധാരണഗതിയില്‍ മാര്‍ച്ച് മാസത്തിലാണ് താപനില ഉച്ചസ്ഥായിലെത്തുന്നത്.

യു.വി. ഇന്‍ഡെക്‌സ് ഉയര്‍ന്നു; ആരോഗ്യ പ്രശ്‌നങ്ങള്‍ക്ക് സാധ്യത

ചൂടിനൊപ്പം യു.വി. ഇന്‍ഡെക്‌സ് അളവും ഉയര്‍ന്ന നിലയിലായി.അള്‍ട്രാവയലറ്റ് കിരണങ്ങള്‍ അളക്കുന്ന സൂചികയാണിത്. കോന്നി, ചെങ്ങന്നൂര്‍, മൂന്നാര്‍ എന്നിവിടങ്ങളില്‍ യു.വി. ഇന്‍ഡെക്‌സ് അപകടകരമായ തോതിലാണ്.

കൊട്ടാരക്കര, ചങ്ങനാശ്ശേരി, ഒല്ലൂര്‍, തൃത്താല, മാനന്തവാടി തുടങ്ങിയ സ്ഥലങ്ങളിലും യു.വി. ഇന്‍ഡെക്‌സ് ഉയര്‍ന്നു.

ദീര്‍ഘസമയം സൂര്യപ്രകാശമേല്‍ക്കുന്നത് സൂര്യാഘാതം, ചര്‍മ്മ രോഗങ്ങള്‍, കണ്ണ് രോഗങ്ങള്‍, മറ്റ് ആരോഗ്യ പ്രശ്നങ്ങള്‍ എന്നിവയ്ക്ക് കാരണമായേക്കാം. പ്രത്യേകിച്ചും അള്‍ട്രാവയലറ്റ് കിരണങ്ങള്‍ കൂടുതല്‍ പതിക്കുന്ന രാവിലെ 10-വൈകീട്ട് 3 വരെയുള്ള സമയങ്ങളില്‍.

കൂടുതല്‍ കരുതലെടുക്കേണ്ടവര്‍

പുറത്ത് ജോലി ചെയ്യുന്ന നിര്‍മ്മാണ തൊഴിലാളികള്‍, റോഡ് തൊഴിലാളികള്‍, കര്‍ഷകര്‍, മത്സ്യത്തൊഴിലാളികള്‍, കടലിലും ഉള്‍നാടന്‍ ജലാശയങ്ങളിലും ജോലി ചെയ്യുന്നവര്‍, വാട്ടര്‍ ട്രാന്‍സ്‌പോര്‍ട്ട് തൊഴിലാളികള്‍ എന്നിവരും, ബൈക്ക് യാത്രികരും വിനോദസഞ്ചാരികളും കൂടുതല്‍ ശ്രദ്ധിക്കണം.

ചര്‍മ്മരോഗമുള്ളവരോടും കണ്ണ് രോഗമുള്ളവരോടും കാന്‍സര്‍ രോഗികളോടും പ്രതിരോധ ശേഷി കുറഞ്ഞവരോടും ജാഗ്രത പാലിക്കാന്‍ ദുരന്തനിവാരണ അതോറിറ്റി നിര്‍ദ്ദേശിച്ചു. കുടിവെള്ളം
കൈയ്യില്‍ കരുതുക, ലഘുവസ്ത്രങ്ങള്‍ ധരിക്കുക, തലയും കണ്ണും സൂര്യപ്രകാശത്തില്‍ നിന്നും മറയ്ക്കുക, കണ്ണാടി ഉപയോഗിക്കുക എന്നിങ്ങനെ സുരക്ഷാ നടപടികള്‍ സ്വീകരിക്കാവുന്നതാണ്.

ബംഗാള്‍ ഉള്‍ക്കടലില്‍ ന്യൂനമര്‍ദ്ദ സാധ്യത
ബംഗാള്‍ ഉള്‍ക്കടലില്‍ ന്യൂനമര്‍ദ്ദ സാധ്യതയുണ്ടെന്നും അങ്ങിനെ സംഭവിക്കുന്ന പക്ഷം മഴ ലഭിക്കാനുള്ള സാധ്യതയുണ്ടെന്നും കാലാവസ്ഥ നിരീക്ഷണ കേന്ദ്രം പറഞ്ഞു.

പൊതുജനങ്ങള്‍ക്ക് നിര്‍ദ്ദേശങ്ങള്‍

ചൂട് ശക്തമാണ്. ഉച്ച സമയത്ത് പുറത്തിറങ്ങുന്നത് കുറയ്ക്കുക. കുട്ടികളും വയോധികരും പ്രത്യേകം ശ്രദ്ധിക്കണം. ആവശ്യമായത്ര വെള്ളം കുടിക്കുക. ആരോഗ്യ പ്രശ്‌നങ്ങള്‍ തോന്നിയാല്‍ ഉടന്‍ അടുത്തുള്ള ആരോഗ്യ കേന്ദ്രത്തില്‍ ചികിത്സ തേടുക.