വിആര്‍എസ് പദ്ധതി അവതരിപ്പിച്ച് ഹോണ്ട മോട്ടോര്‍സൈക്കിള്‍ ആന്‍ഡ് സ്‌കൂട്ടേഴ്‌സ് ഇന്ത്യ

മുംബൈ: വോളണ്ടറി റിട്ടയര്‍മെന്റ് സ്‌കീം അവതരിപ്പിച്ച് ഹോണ്ട മോട്ടോര്‍സൈക്കിള്‍ ആന്‍ഡ് സ്‌കൂട്ടേഴ്‌സ് ഇന്ത്യ. 40 വയസ്സിന് മുകളിലുള്ള അല്ലെങ്കില്‍ കമ്പനിയില്‍ 10 വര്‍ഷം സേവനം അനുഷ്ഠിച്ച ജീവനക്കാരാണ് പദ്ധതിയില്‍ ഉള്‍പ്പെടുക. ഉല്‍പാദന തന്ത്രം പുനക്രമീകരിക്കാനും പ്രതിസന്ധി ഘട്ടത്തില്‍ ആകെയുള്ള കാര്യക്ഷമത വര്‍ദ്ധിപ്പിക്കാനും വേണ്ടിയാണ് കമ്പനി പുതിയ പദ്ധതി പ്രഖ്യാപിച്ചിരിക്കുന്നത്.  ജീവനക്കാര്‍ക്ക് വേണ്ടി പുറത്തിറക്കിയ സര്‍ക്കുലറിലാണ് ഇക്കാര്യം വ്യക്തമാക്കുന്നത്.

ഇരുചക്ര വാഹന വിപണി വലിയ രീതിയിലുള്ള മത്സരം നേരിടുകയാണ്. ഈ സാഹചര്യത്തില്‍ ഉയര്‍ന്ന കാര്യക്ഷമതയും മത്സരശേഷിയും തുടരേണ്ടത് അത്യാവശ്യമാണ്. നിശ്ചിത വിരമിക്കല്‍ പ്രായത്തിന് മുമ്പ് കമ്പനിയില്‍ നിന്ന് സ്വമേധയാ വിരമിക്കാന്‍ ആഗ്രഹിക്കുന്ന എല്ലാ അസോസിയേറ്റുകള്‍ക്കും മാനേജുമെന്റ്കൾക്കും വിആര്‍എസ് അവതരിപ്പിച്ചത് അതുകൊണ്ടാണെന്ന് ഡിവിഷന്‍ ഹെഡ് നവീന്‍ ശര്‍മ്മ, ജനറല്‍ അഫയേഴ്‌സ്, എച്ച് എം എസ് ഐ, സര്‍ക്കുലറില്‍ വ്യക്തമാക്കി. 6.4 ദശലക്ഷം യൂണിറ്റ് വാര്‍ഷിക ശേഷിയുള്ള എച്ച് എം എസ് ഐക്ക് മനേസര്‍, അല്‍വാര്‍, നര്‍സപുര , വിത്തലപൂര്‍ എന്നിവിടങ്ങളില്‍ ഉല്‍പാദന സൗകര്യമുണ്ട്.