ആയുഷ്മാൻ ഭാരത് വയ വന്ദന കാർഡിന് നിങ്ങൾ യോ​ഗ്യരാണോ? എങ്ങനെ അറിയാം..? ഉടൻ അപേക്ഷിക്കാം...

നിങ്ങളറിഞ്ഞോ? കേന്ദ്ര സർക്കാരിന്റെ പദ്ധതിയായ ആയുഷ്മാൻ ഭാരതിന് കീഴിൽ വയോജനങ്ങൾക്കായുള്ള ഇൻഷൂറൻസ് സ്കീം തുടങ്ങി. 70 വയസ് പൂർത്തിയായ മുതിർന്ന പൗരൻമാർക്കായി അവതരിപ്പിച്ച ആയുഷ്മാൻ ഭാരത് ഹെൽത്ത് ഇൻഷൂറൻസ് ഇതിനോടകം തന്നെ ജനപ്രീതിയാർജ്ജിച്ചു. അതിനു പ്രധാന കാരണം ഈ സ്കീമിന്റെ കവറേജും മറ്റു ആനുകൂല്യങ്ങളുമാണ്. നിങ്ങളുടെ വീട്ടിൽ 70 വയസ്സ് പൂർത്തിയായവർ ഉണ്ടെങ്കിൽ ഉടൻ തന്നെ ആയുഷ്മാൻ വയ വന്ദന കാർഡ് സ്വന്തമാക്കൂ.. ഇതിലൂടെ ഇൻഷൂറൻസ് പരിരക്ഷ ഉറപ്പാക്കാം.

5 ലക്ഷം രൂപയാണ് ആയുഷ്മാൻ ഹെൽത്ത് ഇൻഷൂറസ് ഉറപ്പ് നൽകുന്ന കവറേജ്. ഇതിന് ഏറ്റവും ആദ്യം പരിശോധിക്കേണ്ടത് പ്രായമാണ്. 70 വയസ്സും അതിനു മുകളിലും പ്രായമുള്ള മുതിർന്ന പൗരൻമാർക്കാണ് ഈ ഇൻഷൂറൻസ് പരിരക്ഷ ഉറപ്പാക്കുന്നത്. മാത്രമല്ല നിങ്ങളുടെ പ്രായം 70 വയസ്സിനു മുകളിലാണെന്ന് ആധാർ കാർഡ് പ്രകാരം തെളിയിക്കണം. ഇതാണ് പ്രധാന യോ​ഗ്യതാ മാനദണ്ഡം.

പ്രായമാവുമ്പോൾ നിരവധി ആരോ​ഗ്യ പ്രശ്നങ്ങൾ നേരിടേണ്ടി വരും. ചില ചികിത്സാ ചിലവുകൾ സാധാരണക്കാരന് താങ്ങാവുന്നതിലും അധികമായിരിക്കാം. അത്തരം സാഹചര്യങ്ങളിൽ ഏറ്റവും ഉപകാരപ്രദമായ ആരോ​ഗ്യ പരിരക്ഷ ഉറപ്പ് നൽകുന്ന സ്കീമാണ് ആയുഷ്മാൻ ഭാരതിന്റെ ഇൻഷൂറൻസ്. ഇതിനായി നിങ്ങളുടെ കൈവശം ആയുഷ്മാൻ വയ വന്ദന കാർഡ് ഉണ്ടായിരിക്കണം.

ആയുഷ്മാൻ വയ വന്ദന കാർഡ്

രാജ്യത്തെ എല്ലാ മുതിർന്ന പൗരൻമാർക്കും ഒരേ പോലെ ചികിത്സ ഉറപ്പാക്കുന്നതിനായി ആരംഭിച്ച പദ്ധതിയാണിത്. ഏത് ജീവിത നിലവാരമുള്ളവരാണെങ്കിലും, എത്ര വരുമാനം നേടുന്നവരാണെങ്കിലും ആയുഷ്മാൻ ഭാരതിന്റെ ഈ ഹെൽത്ത് ഇൻഷൂറൻസ് എടുത്താൽ എല്ലാ ആശുപത്രികളിലും സൗജന്യ ചികിത്സ നേടാം. പ്രതിവർഷം 5 വർഷം വരെയാണ് കവറേജ് നൽകുന്നത്. ചികിത്സ നേടുന്നതിനായി ആദ്യം നിങ്ങൾ ഇൻഷൂറൻസിന് അപേക്ഷിക്കണം. നിങ്ങൾ യോ​ഗ്യരാണെങ്കിൽ ആയുഷ്മാൻ വയ വന്ദന കാർഡ് ലഭിക്കും. ഈ കാർഡ് വഴിയാണ് ചികിത്സ ഉറപ്പാക്കുന്നത്. ചികിത്സക്കൊപ്പം മറ്റു ചികിത്സാ ആനുകൂല്യങ്ങളും ഉറപ്പാക്കാൻ ഈ കാർഡിലൂടെ സാധിക്കുന്നു.

നാഷണൽ ഹെൽത്ത് അതോറിറ്റി (എൻ.എച്ച്.എ) വെബ്‌സൈറ്റ് പ്രകാരം മൊബൈൽ ഫോണിലൂടെ ഈ ആയുഷ്മാൻ വയ വന്ദന കാർഡ് എങ്ങനെ ഡൌൺലോഡ് ചെയ്യാം എന്ന് നോക്കാം. 

1) ആയുഷ്മാൻ ആപ്പ് ഡൗൺലോഡ് ചെയ്യുക. ശേഷം ലോ​ഗിൻ ചെയ്യുക.

2) മൊബൈൽ നമ്പർ നൽകുക. തുടർന്ന് ലോഗിൻ ക്ലിക്ക് ചെയ്യുക.

3) അപേക്ഷകന്റെ വിശദാംശങ്ങളും ആധാർ വിശദാംശങ്ങളും നൽകുക

4) eKYC നൽകുക.

5) അറിയിപ്പ് നൽകുക, എന്നിട്ട് ഫോട്ടോ എടുക്കുക. ഒപ്പം എല്ലാ അപേക്ഷകളും പൂരിപ്പിക്കുക

6) അപേക്ഷകന്റെ മൊബൈൽ നമ്പറും OTP യും നൽകുക

7) അപേക്ഷകന്റെ വിഭാഗം, പിൻ കോഡ് എന്നിവ നൽകുക.

8) കുടുംബാംഗങ്ങളുടെ വിവരങ്ങൾ നൽകുക. ശേഷം സബ്മിറ്റ് ബട്ടൺ ക്ലിക്ക് ചെയ്യുക.

9) ഇതോടെ ഇ-കെവൈസി പൂർത്തിയാവും. ഇനി നിങ്ങൾക്ക് ആയുഷ്മാൻ വയ വന്ദന കാർഡ് ഡൗൺലോഡ് ചെയ്യാം.

ഹെൽത്ത് കാർഡിനായി അപേക്ഷിച്ചതു മുതൽ നിങ്ങൾക്ക് ചികിത്സ ലഭ്യമാക്കാൻ കഴിയും. കാലതാമസമില്ലാതെ കവറേജ് നേടാൻ സാധിക്കും. ഈ ഹെൽത്ത് ഇൻഷൂറൻസിന് യോ​ഗ്യത നേടാൻ നിങ്ങൾക്ക് സർക്കാർ നിശ്ചയിച്ചിട്ടുള്ള വരുമാന പരിധി വേണ്ട. മാത്രമല്ല സർക്കാർ, പ്രൈവറ്റ് ആശുപത്രികളിലും ചികിത്സ ഉറപ്പാക്കുന്നു. ആശുപത്രിയിൽ നിന്ന് ഡിസ്ചാർജ് ആവുന്നതു വരെ പൂർണമായ പരിരക്ഷ നൽകും.