ഐഡിഎഫ്‌സി ഫസ്റ്റ് ബാങ്ക് സേവിംഗ്‌സ് അക്കൗണ്ടുകളുടെ പലിശ നിരക്ക് വെട്ടിക്കുറച്ചു

കൊച്ചി: സേവിംഗ്‌സ് അക്കൗണ്ട് പലിശ വെട്ടിക്കുറച്ച് ഐഡിഎഫ്‌സി ബാങ്ക്. ഒരു ലക്ഷത്തില്‍ താഴെ വരെ ബാലന്‍സ് നിലനിര്‍ത്തുന്നവര്‍ക്ക് ബാങ്ക് ഇപ്പോള്‍ 4 ശതമാനം വരെയാണ് വാഗ്ദാനം ചെയ്യുന്നത്. നേരത്തെ ചെറുകിട നിക്ഷേപങ്ങള്‍ക്ക് 6 ശതമാനം വരെ പലിശ വാഗ്ദാനം ചെയ്ത ബാങ്കായിരുന്നു ഐഡിഎഫ്‌സി.

പുതിയ പലിശ നിരക്ക് പ്രകാരം, ഒരു ലക്ഷം മുതല്‍ പത്ത് ലക്ഷം വരെയുള്ള നിക്ഷേപങ്ങള്‍ക്ക് 4.5 ശതമാനമാണ് പലിശ. 10 ലക്ഷം മുതല്‍ രണ്ട് കോടി വരെയുള്ള നിക്ഷേപങ്ങള്‍ക്ക് 5 ശതമാനം പലിശയാണ് ബാങ്ക് വാഗ്ദാനം ചെയ്യുന്നത്. ആര്‍ബിഎല്ലിനും ബന്ദന്‍ ബാങ്കിനും പുറമെ സ്വകാര്യമേഖലയിലെ ഏറ്റവും കൂടുതല്‍ സേവിംഗ്‌സ് അക്കൗണ്ട് പലിശനിരക്ക് വാഗ്ദാനം ചെയ്യുന്ന ബാങ്കുകളിലൊന്നാണ് ഐഡിഎഫ്സി.

അതേസമയം, ഐസിഐസി അടക്കമുള്ള രാജ്യത്തെ വന്‍കിട സ്വകാര്യ ബാങ്കുകള്‍ സേവിംഗ്‌സ് അക്കൗണ്ടുകള്‍ക്ക് 3 മുതല്‍ 3.5 ശതമാനം വരെയാണ് പലിശ വാഗ്ദാനം ചെയ്യുന്നത്. ചില പൊതുമേഖ ബാങ്കുകളും ഇതിന് സമാനമായ പലിശ നിരക്ക് വാഗ്ദാനം ചെയ്യുന്നുണ്ടെങ്കിലും എസ്ബിഐ ബാങ്ക് വെറും 2.7 ശതമാനം പലിശ മാത്രമാണ് നല്‍കുന്നത്. സേവിംഗ്‌സ് അക്കൗണ്ടുകളിലെ ഏറ്റവും കുറഞ്ഞ പലിശ നിരക്കാണിത്.