കോണ്‍ടാക്ട്‌ലെസ് ഡെബിറ്റ്കാര്‍ഡ് പേയ്‌മെന്റ് സൗകര്യമൊരുക്കി ഐഡിഎഫ്‌സി

ദില്ലി:കാര്‍ഡ് ഉപയോഗിക്കാതെ പണമിടപാട് നടത്തുന്ന സേഫ് പേ സൗകര്യം ഒരുക്കി ഐഡിഎഫ്‌സി ബാങ്ക്. സേഫ് പേ സംവിധാനം ഉപയോഗിച്ചാല്‍ കാര്‍ഡ് സൈ്വപ് ചെയ്യാതെ തന്നെ അനായാനം പണമിടപാട് നടത്താം. കയ്യിലുള്ള സ്മാര്‍ട്ട് ഫോണ്‍ ഉപയോഗിച്ചിട്ടാണ് ഈ സംവിധാനം.

ഒരാഴ്ച്ചക്കകം തന്നെ സേഫ് പേ സംവിധാനം ഉപയോക്താക്കള്‍ക്ക് ലഭ്യമാവും. നിയര്‍ ഫീല്‍ഡ് കമ്യൂണികേഷന്‍ സംവിധാനമുള്ള പിഒഎസ് മെഷീനുകളിലാണ് ഇത്തരത്തില്‍ മൊബൈല്‍ ഫോണ്‍ ഉപയോഗിച്ച് പെയ്‌മെന്റ് സംവിധാനത്തിന് വഴിയൊരുക്കിയിരിക്കുന്നത്.

ഡെബിറ്റ് കാര്‍ഡിനെ ഫസ്റ്റ് ബാങ്ക് മൊബൈല്‍ ആപ്പുമായി ലിങ്ക് ചെയ്താണ് ഈ ഡിജിറ്റല്‍ മൊബൈല്‍ ഫോണ്‍ സംവിധാനം ഒരുക്കിയിരിക്കുന്നത്. ഇത് സജീവമായാല്‍, ഉപയോക്താക്കള്‍ക്ക് മൊബൈല്‍ ഫോണ്‍ അണ്‍ലോക്ക് ചെയ്ത് എന്‍എഫ്സിയുടെ പിഒഎസ് മെഷീന്‍ വഴി പണമിടപാട് നടത്താം. ഓരോ ഇടപാടിനും ഉപയോക്താക്കള്‍ ബാങ്കിന്റെ മൊബൈല്‍ അപ്ലിക്കേഷനില്‍ ലോഗിന്‍ ചെയ്യേണ്ടതില്ല. മൊബൈല്‍ അപ്ലിക്കേഷനില്‍ ഡെബിറ്റ് കാര്‍ഡ് ചേര്‍ക്കാനും ആവശ്യമെങ്കില്‍ ഒഴിവാക്കാനും സാധിക്കും.

ഇത് വഴി കോണ്‍ഡാക്റ്റ് ലെസ് പണമിടപാടാണ് ലക്ഷ്യം വെക്കുന്നത്. 2000 വരെയുള്ള പേയ്മന്റെുകള്‍ നടത്താം. ഒരു ദിവസം 20000 രൂപ വരെ പിന്‍വലിക്കാം.