തൊഴിലുടമയ്ക്ക് പാൻ കാർഡ് വിശദാംശങ്ങൾ നൽകിയില്ലെങ്കിൽ നിങ്ങളുടെ ശമ്പളം കുറയും

ആദായനികുതി നിയമപ്രകാരം, എല്ലാ ജീവനക്കാരും നികുതി നൽകേണ്ട പരിധിയ്ക്ക് മുകളിലാണെങ്കിൽ അവരുടെ പാൻ കാർഡ് വിശദാംശങ്ങൾ ഓഫീസിലെ എച്ച്ആർ അല്ലെങ്കിൽ അക്കൗണ്ട് വകുപ്പുകൾക്ക് സമർപ്പിക്കേണ്ടത് നിർബന്ധമാണ്. കാരണം വരുമാന ഉറവിടത്തിൽ നികുതി കുറയ്ക്കുമ്പോൾ, നിങ്ങളുടെ തൊഴിലുടമ നിങ്ങളുടെ പാൻ അല്ലെങ്കിൽ ആധാർ നമ്പർ നൽകേണ്ടതുണ്ട്. ആദായനികുതി വകുപ്പിന്റെ TRACES പോർട്ടൽ വഴി നിങ്ങൾക്ക് ടിഡിഎസിന്റെ നില പരിശോധിക്കാം.

വരുമാന പരിധി

നിങ്ങളുടെ വരുമാനം നികുതിയടയ്‌ക്കാവുന്ന പരിധിക്കു താഴെയാണെങ്കിൽ (2.5 ലക്ഷം രൂപയിൽ താഴെ), ആദായനികുതി നിയമത്തിലെ സെക്ഷൻ 206 എഎ പ്രകാരം പാൻ അല്ലെങ്കിൽ ആധാർ കാർഡ് സമർപ്പിക്കേണ്ടതില്ല. 2019-20 സാമ്പത്തിക വർഷത്തിൽ 2.5 ലക്ഷം രൂപ വരെയുള്ള വരുമാനത്തിന് നികുതി ബാധകമല്ല.

ഉയർന്ന നികുതി നിരക്ക്

നിങ്ങളുടെ വരുമാനം നികുതി അടയ്‌ക്കേണ്ട ബ്രാക്കറ്റിൽ ഉൾപ്പെടുകയും നിങ്ങളുടെ പാൻ കാർഡ് വിശദാംശങ്ങൾ നിങ്ങളുടെ തൊഴിലുടമയ്ക്ക് നൽകാതിരിക്കുകയും ചെയ്താൽ ടിഡിഎസ് 20% അല്ലെങ്കിൽ അതിലും ഉയർന്ന നിരക്കിൽ കുറയ്ക്കാൻ തൊഴിലുടമ ബാധ്യസ്ഥനാണ്. സെക്ഷൻ 192 പ്രകാരം ടിഡിഎസിനായി വരുമാനം കണക്കാക്കുന്ന ജീവനക്കാർക്ക് നികുതി നൽകാവുന്ന പരിധിക്കു താഴെയാണെങ്കിൽ, ഒരു നികുതിയും കുറയ്ക്കില്ല. എന്നാൽ തൊഴിലുടമയ്ക്ക് പാൻ നൽകാതിരുന്നാൽ നിങ്ങളുടെ ശമ്പളത്തിൽ നിന്ന് ഉയർന്ന നികുതി നിരക്ക് ഈടാക്കും.

പാനും ആധാറും പരസ്പരം മാറ്റി ഉപയോഗിക്കാം

പാനും ആധാറും പരസ്പരം മാറ്റി ഉപയോഗിക്കാമെന്നതും എടുത്തുപറയേണ്ട കാര്യമാണ്. അതായത് ആദായനികുതി വകുപ്പ് നൽകുന്ന 10 അക്ക ആൽ‌ഫാന്യൂമെറിക് നമ്പറായ പാനിന് പകരമായി നിങ്ങൾക്ക് 12 അക്ക ആധാർ‌ നമ്പർ‌ ഉദ്ധരിക്കാൻ‌ കഴിയും. എന്നാൽ അങ്ങനെ ചെയ്യുണമെങ്കിൽ നിങ്ങൾ ഇവ രണ്ടും പരസ്പരം ബന്ധിപ്പിച്ചിട്ടുണ്ടെന്ന് ഉറപ്പാക്കേണ്ടതുണ്ട്.

തെറ്റിയാൽ പിഴ

പാനിന് പകരമായി നിങ്ങളുടെ ആധാർ നമ്പർ നൽകുമ്പോൾ വളരെയേറെ ശ്രദ്ധിക്കേണ്ടതുണ്ട്. കാരണം തെറ്റായ നമ്പർ നൽകുന്നത് 1961 ലെ ആദായനികുതി നിയമത്തിലെ സെക്ഷൻ 272 ബി പ്രകാരം 10,000 രൂപ പിഴ ഇടാക്കാവുന്ന തെറ്റാണ്. നിങ്ങൾ ഒന്നിലധികം ഫോമുകളിൽ തെറ്റായ നമ്പർ നൽകിയിട്ടുണ്ടെങ്കിൽ, നിങ്ങൾക്ക് കൂടുതൽ പണം പിഴയായി നൽകേണ്ടി വരും.