ഈ ആറ് ബാങ്ക് അക്കൗണ്ടുള്ളവര്‍ പുതിയ ഐഎഫ്എസ്‌സി കോഡ് ഉപയോഗിക്കണം; പഴയ ചെക്ക് മാറ്റാം

കൊച്ചി: ആറ് ബാങ്കുകള്‍ ഏപ്രില്‍ ഒന്ന് മുതല്‍ ലയിക്കുകയാണ്. ഇവയുടെ ഐഎഫ്എസ്‌സി കോഡില്‍ മാറ്റം വരും. ചില ബാങ്കുകളുടേത് ഏപ്രില്‍ ഒന്നിനും മറ്റു ചില ബാങ്കുകളുടെത് മെയ്, ജൂലൈ മാസങ്ങളിലുമാണ് മാറുക. ഇനി ഇടപാട് നടത്തുന്നവര്‍ പുതിയ ഐഎഫ്എസ്‌സി കോഡാണ് ഉപയോഗിക്കേണ്ടത്. മാത്രമല്ല, പഴയ ചെക്ക് ബുക്കുകളും മാറ്റണം. അറിയാം കൂടുതല്‍ വിവരങ്ങള്‍...

ഓറിയന്റര്‍ ബാങ്ക് ഓഫ് കൊമേഴ്‌സ്, അലഹാബാദ് ബാങ്ക്, കേര്‍പറേഷന്‍ ബാങ്ക്, ആന്ധ്ര ബാങ്ക്, സിന്റിക്കേറ്റ് ബാങ്ക്, യുനൈറ്റഡ് ബാങ്ക് ഓഫ് ഇന്ത്യ എന്നീ ബാങ്കുകളാണ് മറ്റു മൂന്ന് ബാങ്കുകളില്‍ ലയിക്കുന്നത്. പഞ്ചാബ് നാഷണല്‍ ബാങ്ക്, യൂണിയന്‍ ബാങ്ക് ഓഫ് ഇന്ത്യ, ഇന്ത്യന്‍ ബാങ്ക് എന്നിവയിലാണ് ലയിക്കുക. ഇടപാടുകള്‍ക്ക് ഇനി പുതിയ ഐഎഫ്എസ്‌സി കോഡാണ് ഉപയോഗിക്കേണ്ടതെന്ന് നിര്‍ദേശമുണ്ട്.

2020 ഏപ്രിലിലാണ് ആറ് ബാങ്കുകളുടെ ലയനം പ്രഖ്യാപിച്ചത്. ഓറിയന്റര്‍ ബാങ്ക്, യുനൈറ്റഡ് ബാങ്ക് എന്നിവ പഞ്ചാബ് നാഷണല്‍ ബാങ്കില്‍ ലയിച്ചു. ആന്ധ്ര ബാങ്കും കോര്‍പറേഷന്‍ ബാങ്കും യൂണിയന്‍ ബാങ്കില്‍ ലയിച്ചു. സിന്‍ഡിക്കേറ്റ് ബാങ്ക് കാനറ ബാങ്കിലാണ് ലയിച്ചത്. അലഹാബാദ് ബാങ്ക് ഇന്ത്യന്‍ ബാങ്കിലും ലയിച്ചു.

ഈ ബാങ്കുകളില്‍ അക്കൗണ്ടുണ്ടായിരുന്നവര്‍ ചെക്ക് ബുക്കുകള്‍ മാറ്റിവാങ്ങണം. പഴയത് ഏപ്രില്‍ ഒന്ന് മുതല്‍ ഉപയോഗിക്കാന്‍ സാധിക്കില്ല. ഏത് ബാങ്കിലാണോ ലയിച്ചിരിക്കുന്നത്, ആ ബാങ്കുകളിലെത്തിയാണ് പുതിയ ചെക്ക് ബുക്കുകള്‍ വാങ്ങേണ്ടത്. കൂടുതല്‍ കാര്യങ്ങള്‍ അറിയാന്‍ ഇടപാടുകള്‍ നടത്തുന്നതിന് മുമ്പ് ബാങ്കുകളില്‍ നേരിട്ടെത്തി അന്വേഷിക്കുന്നത് നന്നാകും.