ആദായ നികുതി എളുപ്പത്തിൽ സമർപ്പിക്കാൻ 'ജട്പട്'; പുതിയ സംവിധാനം അവതരിപ്പിച്ച് വകുപ്പ്

ആദായനികുതി റിട്ടേണ്‍ സമര്‍പ്പിക്കുവാനുള്ള തിയതി അടുക്കെ ഐടിആർ ഫയലിംഗ് സുഗമമാക്കുന്നതിനായി പുതിയ സംവിധാനവുമായി ആദായ നികുതി വകുപ്പ്. 'ജട്പട് പ്രോസസിംഗ്' എന്ന ഈ സംവിധാനത്തിലൂടെ നികുതി റിട്ടേണുകൾ തടസ്സമില്ലാത്ത രീതിയിൽ വേഗത്തിൽ സമർപ്പിക്കാൻ സാധിക്കുമെന്ന് വകുപ്പ് അറിയിച്ചു.

ITR1, ITR4 എന്നിവയ്‌ക്കായി ജട്പട് പ്രോസസിംഗ് ഇതിനോടകം ആരംഭിച്ചു കഴിഞ്ഞു. യൂട്യൂബില്‍ ഐടിആർ 1, ഐടിആർ 4 എന്നിവ ഫയൽ ചെയ്യുന്നതിനുള്ള നടപടിക്രമങ്ങളുടെ ട്യൂട്ടോറിയൽ വീഡിയോകൾ വകുപ്പ് പങ്കുവെച്ചിട്ടുണ്ട്. നികുതിദായകർക്ക് 2019-20 സാമ്പത്തിക വർഷത്തെ (2020-21 എവൈ)  ഐടി റിട്ടേണുകൾക്കായി ഇ-ഫയലിംഗ് വെബ്‌സൈറ്റ് സന്ദർശിച്ച് ഇത് പ്രയോജനപ്പെടുത്താം.

എന്നാല്‍, ഇന്‍കംടാക്സ് റിട്ടേണ്‍ വെരിഫിക്കേഷന്‍ ന‌ടത്തിയവര്‍ക്കും ബാങ്ക് അക്കൗണ്ടുകൾ മുൻകൂട്ടി മൂല്യനിർണ്ണയം ചെയ്തതുമായ ആളുകള്‍ക്കു മാത്രമേ ഈ സൗകര്യം പ്രയോജനമാവുകയുള്ളൂ. കുടിശ്ശികയോ വരുമാന വ്യത്യാസമോ ഉണ്ടാകരുതെന്നും ടിഡിഎസിലോ ചലാനിലോ പൊരുത്തക്കേട് ഉണ്ടാകരുതെന്നും ഉറപ്പാക്കണം.

സാധാരണയായി ജൂലൈ 31 നു ഉള്ളില്‍ ആദായ നികുതി ഫയല്‍ റിട്ടേണ്‍ ചെയ്യണമെന്നാണെങ്കിലും ക‌ൊവിഡിനെ തുടര്‍ന്ന് റിട്ടേണ്‍ സമര്‍പ്പിക്കേണ്ട തിയ്യതികള്‍ പല തവണയായി നീ‌ട്ടിനല്കിയിരുന്നു. 2019-20 സാമ്പത്തിക വർഷത്തിൽ (എ വൈ 2020-21), ഐടിആർ ഫയൽ ചെയ്യുന്നതിനുള്ള അവസാന തീയതി 2020 ഡിസംബർ 31 ആണ്. ഓഡിറ്റ് ആവശ്യമുള്ളവര്‍ക്ക് 2021 ജനുവരി 31വരെ സമയമുണ്ട്.

ആദായ നികുതി വകുപ്പിന്റെ കണക്കുകൾ പ്രകാരം ഏകദേശം 3.82 കോടി ആളുകൾ ആണ് 2019-20 സാമ്പത്തിക വർഷത്തിലെ ഐടിആർ ഫയൽ ചെയ്തിരിക്കുന്നത്. കഴിഞ്ഞ വര്‍ഷം ഇത് 3.63 കോടി ആയിരുന്നു. incometaxindiaefiling.gov.in എന്ന വെബ് സൈറ്റ് വഴി ടാക്സ് ഫയല്‍ ചെയ്യാം.