എണ്ണയില്‍ ഇന്ത്യയുടെ ഗതിയെന്ത്...? കാത്തിരിക്കണം മുക്കാല്‍ വര്‍ഷം; എന്നാല്‍ ശരിയാകുമോ?

ദില്ലി: കൊവിഡ് വ്യാപനത്തോടെ ലോകമെമ്പാടും ഇന്ധന ഡിമാന്‍ഡ് കുത്തനെ കുറഞ്ഞിരിക്കുകയാണ്. അസംസ്‌കൃത എണ്ണവില ഇത്രയും ഇടിയാനുള്ള കാരണവും അത് തന്നെയാണ്. ഇന്ധന ഡിമാന്‍ഡ് ഇന്ത്യയിലും ഇടിഞ്ഞിരിക്കുകയാണ്.

പതിവ് രീതിയിലുള്ള ഇന്ധന ഡിമാന്‍ഡിലേക്ക് രാജ്യം തിരികെയെത്താന്‍ ഇനിയും ആര് മുതല്‍ ഒമ്പത് മാസം വരെ കാത്തിരിക്കേണ്ടി വരും എന്നാണ് സൂചന. ഇന്ത്യന്‍ ഓയില്‍ കോര്‍പ്പറേഷന്‍ ഫിനാന്‍സ് ഡയറക്ടര്‍ എസ്‌കെ ഗുപ്തയാണ് ഇങ്ങനെ ഒരു നിരീക്ഷണം മുന്നോട്ട് വച്ചിട്ടുള്ളത്.

പാതി ഇടിഞ്ഞു

ഏപ്രില്‍ മാസത്തില്‍ ഇന്ധന വില്‍പനയിലുണ്ടായ ഇടിവ് സര്‍വ്വകാല റെക്കോര്‍ഡ് ആണ്. ഒറ്റയടിക്ക് 45.8 ശതമാനം ആണ് വില്‍പന ഇടിഞ്ഞത്. ദേശവ്യാപകമായി ലോക്ക് ഡൗണ്‍ പ്രഖ്യാപിച്ച സമയം ആയിരുന്നു അത്. ഭൂരിപക്ഷം വാഹനങ്ങളും നിരത്തിലിറങ്ങിയിരുന്നില്ല. പൊതുഗതാഗതം പൂര്‍ണമായും നിലച്ചിരുന്നു.

കാര്യങ്ങള്‍ എളുപ്പമല്ല

എന്നേക്ക് ഇന്ത്യയിലെ ഇന്ധന ഡിമാന്‍ഡ് നിരക്ക് പഴയ രീതിയില്‍ ആകുമെന്ന് പ്രവചിക്കാന്‍ കഴിയാത്ത സാഹചര്യമാണ് ഇപ്പോഴുള്ളത്. കൊവിഡ് വ്യാപനം ഓരോ ദിവസവും കൂടുന്ന സാഹചര്യമാണുള്ളത്. എങ്ങനെ വന്നാലും ആറ് മുതല്‍ ഒമ്പത് മാസം വരെ ഇതിന് എടുത്തേക്കും എന്നാണ് എസ്‌കെ ഗുപ്തയുടെ നിരീക്ഷണം.

പ്രതീക്ഷകള്‍

ഏപ്രില്‍ മാസത്തിലെ വന്‍ ഇടിവിന് ശേഷം, മെയ് മാസത്തില്‍ ഇന്ധന ഡിമാന്‍ഡ് അല്‍പം കൂടിയിരുന്നു. എന്നാല്‍ ജൂണ്‍ പാതിയയാപ്പോഴേക്കും ഇത് പിന്നേയും ഇടിഞ്ഞു. ഡീസല്‍ വില്‍പനയില്‍ ആണ് വലിയ ഇടിവുണ്ടായിട്ടുള്ളത് എന്നാണ് റിപ്പോര്‍ട്ടുകള്‍.

പാചകവാചകം മാത്രം

ഡീസലിനെ അപേക്ഷിച്ച് ഇടിവില്‍ അല്‍പം കുറവുണ്ട് എന്നേ ഉള്ളു പെട്രോളിന്. എന്നാല്‍ ഈ കൊവിഡ് കാലം ബാധിക്കാത്ത ഒരു പെട്രോളിയം ഇന്ധനമുണ്ട്. അതാണ് പാചകവാതകം. പാചകവാതകത്തിന്റെ ഡിമാന്‍ഡ് ഓരോ മാസവും കൂടി വരികയാണ്. കഴിഞ്ഞ വര്‍ഷവുമായി താരതമ്യം ചെയ്യുമ്പോള്‍ ഈ ജൂണ്‍ മാസത്തില്‍ 3.5 ശതമാനം അധിക വില്‍പന നടന്നിട്ടുണ്ട്.

അണ്‍ലോക്കിലും നിയന്ത്രണങ്ങള്‍

രാജ്യത്ത് ഇപ്പോള്‍ അണ്‍ലോക്ക് മൂന്നാം ഘട്ടം ആണ്. എങ്കില്‍ പോലും പല സംസ്ഥാനങ്ങളും ലോക്ക് ഡൗണ്‍ പ്രഖ്യാപിക്കുന്നുണ്ട്. ഇതുകൂടാതെ പ്രാദേശിക ലോക്ക് ഡൗണുകളും ഇന്ധന ഡിമാന്‍ഡിലെ വലിയ തോതില്‍ ബാധിച്ചിട്ടുണ്ട്.