മാറുന്ന ഇന്ത്യ, മാറുന്ന റെയിൽവേ! വന്ദേ ഭാരത് സ്ലീപ്പർ മുതൽ 2026-ഓടെ വരാനിരിക്കുന്ന പുത്തൻ മാറ്റങ്ങൾ ഏതൊക്കെ?

സാധാരണക്കാർ മുതൽ രാജ്യത്തെ എല്ലാ ജനങ്ങൾക്കും സുഖകരമായ യാത്ര വാ​ഗ്ദാനം ചെയ്ത് കൊണ്ട് ഇന്ത്യൻ റെയിൽവേ 2025ൽ നിരവധി മാറ്റങ്ങളാണ് പ്രഖ്യാപിച്ചത്. ടിക്കറ്റ് ബുക്കിം​ഗിലെ പരിഷ്കരണം, കൂടുതൽ വന്ദേഭാരത് സർവ്വീസുകൾ തുടങ്ങി നിരവധി മാറ്റങ്ങൾ ഈ വർഷം എത്തി. 2026ലും ഇന്ത്യൻ റെയിൽവേ നിരവധി സർപ്രൈസുകൾ ഒരുക്കുന്നുണ്ട്. അതിനാൽ തന്നെ യാത്രക്കാർക്ക് ഇനി മുതൽ മികച്ച യാത്രാനുഭവം ഉറപ്പാക്കാം.

വന്ദേ ഭാരത് ട്രെയിനുകൾ

2025ൽ വന്ദേ ഭാരത് ട്രെയിനുകളുടെ എണ്ണത്തിൽ ​ഗണ്യമായ വർദ്ധനവുണ്ടായിട്ടുണ്ട്. ഈ വർഷത്തെ ഡിസംബർ വരെയുള്ള കണക്ക് പരിശോധിച്ചാൽ മൊത്തം 164 വന്ദേ ഭാരത് ട്രെയിനുകൾ വിവിധ റൂട്ടുകളിലായിട്ട് സർവ്വീസ് നടത്തുന്നുണ്ട്. ഈ വർഷം മാത്രം 15 വന്ദേ ഭാരത് ട്രെയിനുകളാണ് റെയിൽവേ അവതരിപ്പിച്ചിരിക്കുന്നത്. മാത്രമല്ല വന്ദേ ഭാരതിൻ്റെ ഭക്ഷണ മെനുവിലും വലിയ മാറ്റങ്ങൾ പ്രഖ്യാപിച്ചിട്ടുണ്ട്. 2026ൽ ആദ്യത്തെ വന്ദേ ഭാരത് സ്ലീപ്പർ ട്രെയിനും ട്രാക്കിലെത്തും. ഇത് ദീർഘദൂര യാത്രകളെ സുഖപ്രദമാക്കും.

എസി മാത്രമല്ല, നോൺ എസി യാത്രികർക്കായി ഈ വർഷം 13 അമൃത് ഭാരത് എക്സ്പ്രസ് ട്രെയിനുകളാണ് എത്തിയത്. ഇതോടെ മൊത്തം അമൃത് ഭാരത് എക്സ്പ്രസിൻ്റെ എണ്ണം 30 ആയി ഉയർന്നു. ഇതും ദീർഘദൂര യാത്രക്ക് സാധാരണക്കാർ തിരഞ്ഞെടുക്കുന്ന ട്രെയിനാണ്.

റെയിൽവേ പോലീസ്

റെയിൽവേ പ്രൊട്ടക്ഷൻ ഫോഴ്സ് അഥവാ ആർപിഎഫ് റെയിൽവേ സ്റ്റേഷനുകളിലെത്തുന്ന യാത്രക്കാരുടെ സുരക്ഷ ഉറപ്പാക്കുന്നു. 2025 നവംബർ വരെയുള്ള കണക്ക് പ്രകാരം 17,231 കുട്ടികളെയാണ് ആർപിഎഫ് രക്ഷപ്പെടുത്തിയത്. ഇത് യാത്രക്കാർക്ക് കൂടുതൽ ഇന്ത്യൻ റെയിൽവേയോടുള്ള വിശ്വാസ്യത വർദ്ധിപ്പിക്കുന്നു.

സുരക്ഷിതമായ ട്രാക്കുകൾ

റെയിൽവേ ലൈനുകളിലും മാറ്റങ്ങൾ കൊണ്ടു വന്നിട്ടുണ്ട്. 2025 ഏപ്രിൽ മുതൽ നവംബർ വരെയുള്ള കാലയളവിൽ 6,880 കിലോമീറ്ററിലധികം പാളങ്ങൾ പുതുക്കുകയും 7,051 കിലോമീറ്ററോളം ട്രാക്കുകൾ പൂർണ്ണമായും പുതുക്കുകയും ചെയ്തു. അതേസമയം 599 കിലോമീറ്ററിൽ ട്രെയിനുകളുടെ വേഗത 130 കിലോമീറ്ററായും, 4,000 കിലോമീറ്ററിൽ അത് 110 കിലോമീറ്ററായും വർദ്ധിപ്പിച്ചു.

ട്രാക്കുകൾ പുതുക്കിയതിനൊപ്പം 738 കിലോമീറ്ററിൽ പുതിയ 'കവച്' ഓട്ടോമാറ്റിക് സുരക്ഷാ സംവിധാനം സ്ഥാപിച്ചു. അതിനാൽ തന്നെ ഈ വർഷം അപകടങ്ങളുടെ എണ്ണം 11 ആയി കുറഞ്ഞു.

ഗ്രീൻ റെയിൽവേ

നിലവിലെ കണക്ക് പ്രകാരം ​ഗ്രീൻ റെയിൽവേ പ്രോഗ്രാമിന് കീഴിൽ 1,337 സ്റ്റേഷനുകളാണ് നവീകരണത്തിനായി കേന്ദ്രം ഏറ്റെടുത്തിരിക്കുന്നത്. 2025 ഡിസംബറോടെ 155 സ്റ്റേഷനുകൾ പൂർണ്ണമായും നവീകരിക്കുമെന്നാണ് റെയിൽവേ വ്യക്തമാക്കിയത്. ഈ വർഷം നിരവധി റെയിൽവേ സ്റ്റേഷനുകളിൽ സോളാർ സംവിധാനം സ്ഥാപിച്ചു. ഇത് ഏകദേശം 2,626 സ്റ്റേഷനുകളിൽ സ്ഥാപിച്ചിട്ടുണ്ട്. ഇതിനു പുറമേ 6,117 സ്റ്റേഷനുകളിൽ സൗജന്യ വൈ-ഫൈ ലഭ്യമാണ്.

2026ലെ റെയിൽവേ

വിദൂര പ്രദേശങ്ങളിലേക്കുള്ള റെയിൽ കണക്റ്റിവിറ്റിയും വികസിപ്പിക്കുന്നു. ഇത് നിരവധി പുതിയ റൂട്ടുകളിലേക്ക് നിങ്ങളെ എത്തിക്കും. സത്യത്തിൽ 2026ലേക്ക് കടക്കുമ്പോൾ മൊത്തം 434 പദ്ധതികൾക്കായി 11.17 ലക്ഷം കോടി രൂപയാണ് ഇന്ത്യൻ റെയിൽവേ വകയിരുത്തിയിരിക്കുന്നത്. പുതിയ മാറ്റങ്ങൾക്കായി കാത്തിരിക്കാം.