സ്വർണ വില ഉയരുന്നതോടെ കനം കുറഞ്ഞ സ്വർണാഭരണങ്ങളുടെ ജനപ്രീതി വർദ്ധിക്കുന്നു; ഏതാണ് നല്ലത്?

കേരളത്തിലെ സ്വർണ വില വീണ്ടും കുതിച്ചുയരുന്നു. ഈ വിലക്കയറ്റം സാധാരണക്കാർക്കും വിവാഹാഘോഷങ്ങൾക്ക് തയ്യാറെടുക്കുന്നവർക്കും വലിയ തിരിച്ചടിയാവുന്നു. വരും ദിവസങ്ങളിൽ വില ഇനിയും കയറിയാൽ സ്വർണഭരണം വാങ്ങുന്നത് കൂടുതൽ പ്രയാസമേറിയതാവും. സാധാരണക്കാർക്ക് സ്വർണം വെറുമൊരു സ്വപ്നമായി മാറുമോ? നിലവിൽ കേരളത്തിൽ ഒരു പവൻ സ്വർണാഭരണത്തിന് 61,000 രൂപയ്ക്ക് മുകളിൽ നൽകണം. അത്രയും രൂപ എല്ലാ സാധാരണക്കാർക്കും അസാധ്യമാവാം. ഇത്തരം പ്രതിസന്ധി പരിഹരിക്കാൻ നിരവധി മാർ​ഗങ്ങൾ ഇപ്പോഴുണ്ട്.

സ്വർണത്തിന്റെ കടുത്ത വിലക്കയറ്റം മൂലം ഇന്ത്യയിലെ ജനങ്ങൾ കൂടുതലായും കുറഞ്ഞ മൂല്യമുള്ള സ്വർണഭാരണങ്ങളാണ് ഇപ്പോൾ വാങ്ങുന്നത്. അതായത് പ്രധാനമായും 22 കാരറ്റ്, 24 കാരറ്റ്, 18 കാരറ്റ് എന്നിങ്ങനെയാണ് സ്വർണത്തിന്റെ മാറ്റ് കണക്കാക്കുന്നത്. സാധാരണയായി 22 കാരറ്റ് ആഭരണങ്ങളാണ് എല്ലാവരും ധരിക്കുന്നത്. എന്നാൽ ഈ വിലക്കയറ്റം മൂലം പലരും 18 കാരറ്റ് സ്വർണഭാരണങ്ങൾ വാങ്ങാൻ നിർബന്ധിതരാവുന്നു.

22 കാരറ്റ്, 24 കാരറ്റ്, 18 കാരറ്റ് സ്വർണങ്ങൾ...

24 കാരറ്റ് സ്വർണമാണ് പരിശുദ്ധമായ സ്വർണം. 99.99% സ്വ‍ർണമാണ് ഇതിൽ ഉൾപ്പെടുന്നത്. എന്നാൽ സാധാരണയായി ഇത് ​ഗോൾഡ് കോയിൻ, ബിസ്കറ്റ് എന്നീ രൂപത്തിലാണ് കാണുന്നത്. ഇത് ആഭരണത്തിലേക്ക് മാറ്റുമ്പോൾ മറ്റു ചില ലോഹങ്ങൾ ഉൾപ്പെടുത്തി സ്വർണത്തിന്റെ അളവ് അൽപം കുറക്കും.

22 കാരറ്റ് സ്വർണമാണ് സാധാരണയായി നിങ്ങൾ ധരിക്കുന്ന സ്വർണാഭരണങ്ങൾ. ഇതിൽ 91.7% ശുദ്ധമായ സ്വർണ്ണം അടങ്ങിയിരിക്കുന്നു. ബാക്കി മറ്റു ലോഹങ്ങളാണ് ഉൾപ്പെടുന്നത്. അതിനാലാണ് 22 കാരറ്റ് ആഭരണങ്ങൾ കൂടുതൽ തിളക്കമുള്ളതും ഒപ്പം കൂടുതൽ മൂല്യമുള്ളതുമായി കാണുന്നത്.

18 കാരറ്റ് സ്വർണാഭരണങ്ങൾ 22 കാരറ്റിനേക്കാളും മൂല്യം കുറവും കനം കുറഞ്ഞതുമാണ്. ഇത് വ്യാപകമായി ഉപയോ​ഗിക്കാറില്ല. കാരണം ഇതിൽ 75% ശുദ്ധമായ സ്വർണ്ണവും 25% മറ്റ് ലോഹങ്ങളും അടങ്ങിയിരിക്കുന്നു. പക്ഷേ ഇന്നത്തെ കാലത്തെ ഈ വിലക്കയറ്റം മൂലം ആളുകൾ 18 കാരറ്റ് സ്വർണത്തിലേക്ക് മാറ്റി ചിന്തിക്കുന്നുണ്ട്.

18 കാരറ്റ് സ്വർണം....

സ്വർണ വില ഉയരുന്നതിനാൽ സാധാരണക്കാർക്ക് എളുപ്പത്തിൽ വാങ്ങാൻ സാധിക്കുന്നത് നിലവിൽ 18 കാരറ്റ് തന്നെ. ക്വാളിറ്റിയിൽ യാതൊരു കുറവും വരുത്താതെ കനം കുറഞ്ഞ സ്വർണാഭരണങ്ങൾ ഇപ്പോൾ നിർമ്മിക്കപ്പെടുന്നു. ഇത് വിവിധ ജ്വല്ലറികളിൽ വിവാഹത്തിനു ഒരു സെറ്റായിട്ടും വിൽക്കുന്നുണ്ട്. പലരും 10 പവന്റെ ഒരു സെറ്റ് ആഭരണങ്ങൾ വാങ്ങാറുണ്ട്. അത് 18 കാരറ്റ് ആവുമ്പോൾ വില പിന്നെയും കുറയും. കണക്ക് പ്രകാരം 18 കാരറ്റ് സ്വർണ്ണത്തിൻ്റെ വില 22 കാരറ്റ് സ്വർണ്ണത്തേക്കാൾ അഞ്ചിലൊന്ന് കുറവാണ്.

കുറഞ്ഞ വിലയും കൂടുതൽ ഈടുനിൽക്കുന്നതും കാരണം 18 കാരറ്റ് ആഭരണങ്ങൾ കൂടുതൽ ജനപ്രിയമാകുന്നു. മൊത്തം വിൽപ്പനയിൽ അതിൻ്റെ ഷെയർ 15 ശതമാനമായി ഉയർന്നു. ഇത് രണ്ട് വർഷം മുമ്പ് 5% മുതൽ 7% വരെയായിരുന്നു. ഇന്ത്യക്കാർ പൊതുവേ 22 കാരറ്റ് വരുന്ന പരമ്പരാ​ഗത രീതിയിലുള്ള ആഭരണങ്ങൾ ഇഷ്ടപ്പെടുന്നവരാണ്. പക്ഷേ നിലവിലെ സാഹചര്യത്തിൽ ഇത്രയും വില കൊടുത്ത് ആഭരണം വാങ്ങാൻ എല്ലാവർക്കും സാധിക്കില്ല.

ചെലവ് കുറയ്ക്കുന്നതിനായി 18 കാരറ്റ് ആഭരണങ്ങളിലേക്ക് ആളുകൾ മാറുന്നതിനാൽ ജ്വല്ലറികളിലും ഇപ്പോൾ ഇത്തരത്തിലുള്ള ആഭരണങ്ങൾ വിൽക്കുന്നുണ്ട്.