ഡീസൽ വേണ്ട, മലിനീകരണവുമില്ല; രാജ്യത്തെ ആദ്യ ഹൈഡ്രജൻ ട്രെയിൻ സജ്ജം! പരീക്ഷണ ഓട്ടം റിപ്പബ്ലിക് ദിനത്തിൽ

ഇന്ത്യൻ റെയിൽവേയുടെ ചരിത്രത്തിലെ വിപ്ലവകരമായ മറ്റൊരു ചുവടുവെപ്പിന് രാജ്യം സാക്ഷ്യം വഹിക്കുന്നു. വന്ദേ ഭാരത് എക്സ്പ്രസിന്റെ വിജയത്തിന് പിന്നാലെ, പരിസ്ഥിതി സൗഹൃദ ഗതാഗത സംവിധാനത്തിലേക്ക് ചുവടുമാറുന്നതിന്റെ ഭാഗമായി ഇന്ത്യയിലെ ആദ്യത്തെ ഹൈഡ്രജൻ ഫ്യുവൽ ട്രെയിൻ പുറത്തിറക്കാൻ ഇന്ത്യൻ റെയിൽവേ തയ്യാറെടുക്കുകയാണ്. ഗ്രീൻ എനർജി സ്വപ്നങ്ങളിലേക്ക് അതിവേഗം കുതിക്കുന്ന ഇന്ത്യയുടെ റെയിൽ ഗതാഗത മേഖലയിൽ പുതിയൊരു യുഗത്തിന് ഇതോടെ തുടക്കമാകും.

ഹൈഡ്രജൻ ഇന്ധനമായി ഉപയോഗിക്കുന്ന രാജ്യത്തെ ആദ്യ ട്രെയിൻ സർവീസിന് ഹരിയാനയിലെ ജിന്ദ് ഒരുങ്ങിക്കഴിഞ്ഞു. ജിന്ദിനും സോണിപതിനും ഇടയിലുള്ള 90 കിലോമീറ്റർ ദൂരത്തിലായിരിക്കും ഈ അത്യാധുനിക ട്രെയിൻ സർവീസ് നടത്തുക. ഡീസൽ എൻജിനുകൾക്ക് പകരമായി ഹൈഡ്രജൻ ഇന്ധനം ഉപയോഗിക്കുന്നതിലൂടെ പരിസ്ഥിതി മലിനീകരണം കുറയ്ക്കാൻ സാധിക്കും. അന്താരാഷ്ട്ര തലത്തിൽ നിലവിൽ ചില വികസിത രാജ്യങ്ങളിൽ മാത്രം ലഭ്യമായ ഈ സാങ്കേതികവിദ്യ ഇന്ത്യയിലും പ്രായോഗികമാക്കുന്നത് രാജ്യത്തിന്റെ സാങ്കേതിക മികവിന്റെ അടയാളമാണ്.

2026 ജനുവരി 26 റിപ്പബ്ലിക് ദിനത്തിൽ ട്രെയിനിന്റെ പരീക്ഷണ ഓട്ടം ആരംഭിക്കാനാണ് ഇന്ത്യൻ റെയിൽവേ ലക്ഷ്യമിടുന്നത്. പരീക്ഷണങ്ങൾ വിജയകരമായി പൂർത്തിയാക്കി പ്രധാനമന്ത്രിയുടെ ഓഫീസിൽ നിന്നുള്ള അന്തിമ അനുമതി ലഭിക്കുന്നതോടെ ട്രെയിൻ ഔദ്യോഗികമായി സർവീസ് ആരംഭിക്കും.

ഹൈഡ്രജൻ ഫ്യുവൽ ട്രെയിൻ എങ്ങനെ പ്രവർത്തിക്കുന്നു?

ഹൈഡ്രജൻ ഉപയോഗിച്ച് പ്രവർത്തിക്കുന്ന ഈ ട്രെയിൻ അത്യാധുനിക സംവിധാനങ്ങളോടെയാണ് ഡിസൈൻ ചെയ്തിരിക്കുന്നത്. ഈ ട്രെയിൻ ഒരു കിലോമീറ്റർ സഞ്ചരിക്കാൻ ഏകദേശം 900 ഗ്രാം ഹൈഡ്രജൻ ഇന്ധനം ആവശ്യമാണ്. ഈ 900 ​ഗ്രാം ഹൈഡ്രജൻ നിർമിക്കുന്നത് 9 കിലോഗ്രാം വെള്ളത്തിൽ നിന്നാണ്. ട്രെയിനിന് 3,000 കിലോഗ്രാം ഹൈഡ്രജൻ ശേഷിയും 7,680 കിലോഗ്രാം ഓക്സിജൻ ശേഷിയുമുണ്ട്.

ട്രെയിനിന്റെ പരമാവധി വേഗത മണിക്കൂറിൽ 150 കിലോമീറ്ററായിരിക്കും. ഇത് ജിന്ദ്- സോണിപത് റൂട്ടിൽ വേ​ഗത്തിൽ സഞ്ചരിക്കാൻ സഹായിക്കും. 2,500 യാത്രക്കാരെ വരെ വഹിക്കാൻ ഈ ട്രെയിനിന് സാധിക്കും.

ഒരു സ്പാനിഷ് കമ്പനി നിർമ്മിച്ച ഒരു അത്യാധുനിക ഹൈഡ്രജൻ വാതക ഉൽ‌പാദന പ്ലാന്റ് ജിന്ദ് റെയിൽവേ സ്റ്റേഷനിൽ ഇതിനകം സ്ഥാപിച്ചിട്ടുണ്ട്. കൂടാതെ, ചെന്നൈയിലെ ഇന്റഗ്രൽ കോച്ച് ഫാക്ടറിയിൽ നിർമ്മിച്ച നാല് ഡ്രൈവർ പവർ കാറുകളും 16 പാസഞ്ചർ കോച്ചുകളും ഇതിനകം ഷക്കൂർ ബസ്തി സ്റ്റേഷനിൽ എത്തിയിട്ടുണ്ട്. ഇത് രണ്ട് ഹൈഡ്രജൻ ഫ്യുവൽ ട്രെയിനുകൾക്ക് വേണ്ടിയായിരിക്കും.

പ്രധാന സവിശേഷതകൾ

• ട്രെയിനിന്റെ രണ്ടറ്റത്തും ഡ്രൈവർ പവർ കാറുകളുണ്ട്
• ഓരോ ഡ്രൈവർ പവർ കാറിലും 1200 എച്ച്പി മോട്ടോർ എൻജിൻ പ്രവർത്തിക്കുന്നു
• ഇന്ധന സെല്ലുകൾ ഉൽപ്പാദിപ്പിക്കുന്ന 3750 ആംപ്‌സ് ഡിസി കറന്റ്.
• ഹൈഡ്രജൻ ഊർജ്ജം ഉപയോഗിച്ച് പ്രവർത്തിക്കുന്ന എസി, ലൈറ്റുകൾ, ഫാനുകൾ.
• യാത്രക്കാരുടെ സൗകര്യത്തിനായി മെട്രോ ശൈലിയിലുള്ള ഡിജിറ്റൽ ഡിസ്പ്ലേ സംവിധാനം.
• ട്രെയിനിന്റെ രണ്ടറ്റത്തും ഓട്ടോമാറ്റിക് വാതിലുകൾ.
• 3,000 കിലോഗ്രാം ഹൈഡ്രജൻ സംഭരണ ​​ശേഷി.

ഇന്ത്യയിലെ ഏറ്റവും വലിയ ഹൈഡ്രജൻ പ്ലാന്റ് സ്ഥിതി ചെയ്യുന്നത് ജിന്ദിലാണ്. ഈ വർഷം ആദ്യം തന്നെ ഹൈഡ്രജൻ ഇന്ധനമായി പ്രവർത്തിക്കുന്ന ട്രെയിനുകൾ പൊതുജനങ്ങൾക്കായി തുറക്കുമെന്നാണ് പ്രതീക്ഷിക്കുന്നത്. പരീക്ഷണ ഓട്ടം വിജയകരമായാൽ പ്രധാനമന്ത്രി തന്നെയായിരിക്കും ഇത് രാജ്യത്തിനായി സമർപ്പിക്കുന്നത്. വന്ദേ ഭാരത് പോലെ ഭാവിയിൽ ഈ ട്രെയിനും കേരളത്തിലേക്കും എത്തുമെന്ന് പ്രതീക്ഷിക്കാം.