ഡിജിറ്റൽ ഇടപാടുകളിൽ ഇനി ഇന്ത്യൻ കരുത്ത്; റെഡ്ഡിഫ് പേ വരുന്നു: പേയ്‌മെന്റും നിക്ഷേപവും ഇനി ഒറ്റ ആപ്പിൽ

പൂർണ്ണമായും ഇന്ത്യൻ ഉടമസ്ഥതയിലുള്ള രാജ്യത്തെ ആദ്യത്തെ യുപിഐ ആപ്പ് എന്ന പെരുമയോടെ 'റെഡ്ഡിഫ് പേ' വിപണിയിലേക്ക് എത്തുന്നു. പ്രമുഖ പോർട്ടലായ റെഡിഫ്.കോം (Rediff.com) അവതരിപ്പിക്കുന്ന ഈ പുത്തൻ യുപിഐ ആപ്പിന് നാഷണൽ പേയ്‌മെന്റ്സ് കോർപ്പറേഷൻ ഓഫ് ഇന്ത്യ (NPCI) ഔദ്യോഗികമായി അംഗീകാരം നൽകി.

റെഡിഫിന് ഈ അംഗീകാരം ഒരു സുപ്രധാന നാഴികക്കല്ലാണെന്ന് റെഡിഫ്.കോം ഇന്ത്യയുടെ ചെയർമാനും മാനേജിംഗ് ഡയറക്ടറുമായ വിശാൽ മേത്ത പറഞ്ഞു. വിദേശ കമ്പനികൾ ആധിപത്യം പുലർത്തുന്ന ഇന്ത്യൻ യുപിഐ വിപണിയിൽ, ഒരു തദ്ദേശീയ പ്ലാറ്റ്‌ഫോമിന്റെ സാന്നിധ്യം വലിയ മാറ്റങ്ങൾക്ക് വഴിവെക്കുമെന്നാണ് വിലയിരുത്തപ്പെടുന്നത്.

റെഡിഫ്പേ വഴി സുരക്ഷിതമായ യുപിഐ സേവനങ്ങൾ ഉറപ്പാക്കാം. കൂടാതെ ഇന്ത്യയിലുടനീളമുള്ള ഉപയോക്താക്കൾക്ക് ലളിതമായ ഡിജിറ്റൽ പേയ്‌മെന്റ് അനുഭവങ്ങൾ ഉറപ്പാക്കുക എന്ന ലക്ഷ്യത്തോടെയാണ് റെഡിഫ് പേ പ്രവർത്തിക്കുക. പൊതുജനങ്ങൾക്ക് ഉപയോ​ഗിക്കാൻ സാധിക്കുന്നതിനു മുന്നോടിയായി പരീക്ഷണ പരിശോധന എന്ന നിലയ്ക്ക് ക്ലോസ്ഡ് യൂസർ ഗ്രൂപ്പ് (CUG) പരിശോധന കമ്പനി ആരംഭിച്ചു.

പ്രത്യേകതകൾ

സ്റ്റാൻഡേർഡ് ബിൽ പേയ്‌മെന്റുകൾ, മൊബൈൽ റീചാർജുകൾ, ക്രോസ്-ആപ്പ് പേയ്‌മെന്റുകൾ എന്നിവയെല്ലാം ഉണ്ടെങ്കിലും ഇക്വിറ്റികൾ, മ്യൂച്വൽ ഫണ്ടുകൾ, സ്ഥിര നിക്ഷേപം, റിക്കറിംഗ് ഡെപ്പോസിറ്റുകൾ (RD) തുടങ്ങിയ സേവിംഗ്‌സ്, നിക്ഷേപ പദ്ധതികളും റെഡിഫ് ആപ്പ് പ്രോത്സാഹിപ്പിക്കുന്നുണ്ട്. ഇത് ഇന്ത്യയിലെ ഉപഭോക്താക്കൾക്ക് മികച്ച സാമ്പത്തിക പാഠങ്ങൾ വാ​ഗ്ദാനം ചെയ്യുന്നു.

ക്രെഡിറ്റ് ലൈൻ

റെഡിഫ് പേ പ്ലാറ്റ്‌ഫോം യുപിഐയിലെ ക്രെഡിറ്റ് ലൈനിനെയും പിന്തുണയ്ക്കും. പ്രത്യേകിച്ച് ടയർ-2, ടയർ-3 ന​ഗരങ്ങളിലും വ്യാപകമായി ഉപയോ​ഗിക്കാനാവും. എൻ‌പി‌സി‌ഐയുടെ നിയമപ്രകാരം ഉപയോക്താക്കൾക്ക് മുൻകൂട്ടി അംഗീകരിച്ച ക്രെഡിറ്റ് ലൈനുകൾ വഴി പ്രതിദിനം 1,00,000 രൂപ വരെ വ്യാപാരി പേയ്‌മെന്റുകൾ നടത്താനും, 10,000 രൂപ വരെ പണമായി പിൻവലിക്കാനും കഴിയും. ഇത് ദൈനംദിന വാങ്ങലുകൾക്കുള്ള മൈക്രോ-ക്രെഡിറ്റ് വഴി നിരവധി പുതിയ ഉപയോക്താക്കളെയും സൃഷ്ടിക്കുന്നു.

ക്യൂആർ കോഡ്

കൂടുതൽ ഉപയോക്താക്കളം ഈ ആപ്പുമായി ബന്ധിപ്പിക്കുന്നതിനായി RediffPay യുപിഐ ക്യൂആർ-കോഡുള്ള പോയിന്റ്-ഓഫ്-സെയിൽ (POS) സൊല്യൂഷനുകൾ വാഗ്ദാനം ചെയ്യും. ഇത് ഇന്ത്യയിലെ എല്ലാ ചെറുകിട, സൂക്ഷ്മ, ഇടത്തരം, വൻകിട വ്യാപാരികളെ ഈ യുപിഐ സംവിധാനത്തിലേക്ക് ഉൾപ്പെടുത്തുന്നതിന് വഴിയൊരുക്കും. അത് സാമ്പത്തിക ഇടപാടുകളെ കൂടുതൽ മെച്ചപ്പെടുത്താൻ സഹായിക്കും.

റെഡിഫ് പേ

സമ്പത്ത് വർദ്ധിപ്പിക്കുന്നതിനും സാമ്പത്തിക ക്ഷേമത്തിനുമുള്ള ഒരു പ്ലാറ്റ്‌ഫോമാണ് റെഡിഫ്‌പേ. ഉപയോക്താവിൻ്റെ സാമ്പത്തിക ശീലങ്ങളെ പ്രോത്സാഹിപ്പിക്കുവാനും റെഡിഫ് പേ പ്രാധാന്യം നൽകുന്നു. ആക്സിസ് ബാങ്ക് ഈ പ്ലാറ്റ്‌ഫോമിനായി പേയ്‌മെന്റ് സിസ്റ്റം പ്രൊവൈഡർ (പിഎസ്‌പി) ബാങ്കായി പ്രവർത്തിക്കും. ഇൻഫിബീം അവന്യൂസിന്റെ അനുബന്ധ സ്ഥാപനമായ റെഡിഫ്.കോം ഇന്ത്യ ലിമിറ്റഡ് 2024 ൽ റെഡിഫിൽ ഒരു ഓഹരി സ്വന്തമാക്കി. നിലവിൽ കമ്പനിയുടെ 82 ശതമാനവും കൈവശം വെച്ചിട്ടുണ്ട്. ഇത് ഡിജിറ്റൽ പേയ്‌മെന്റ് വിപണിയിലേക്കുള്ള റെഡിഫ്.കോം ഇന്ത്യയുടെ ശക്തമായ മുന്നേറ്റത്തിന് കാരണമായി.