പൊന്നിന് വില ഉയരുന്നതോടെ സ്വർണ വായ്പകളുടെ ഡിമാൻഡ് 71% വർദ്ധിച്ചു; പ്രധാന കാരണങ്ങൾ ഇതാണ്....

സ്വർണ വില ​ഗണ്യമായി വർദ്ധിച്ചു കൊണ്ടിരിക്കുന്നു. കഴിഞ്ഞ പത്തു വർഷത്തെ അപേക്ഷിച്ച് നോക്കിയാൽ അത്ഭുതപ്പെടുത്തുന്ന വിലക്കയറ്റമാണ് കാണുന്നത്. സ്വർണ വില ഉയരുന്നതു പോലെ സ്വർണ വായ്പാ വിപണിയും ഉയരുന്നു. ഇന്ത്യയിലെ സ്വർണ വായ്പാ വിപണി കഴിഞ്ഞ വർഷത്തെ അപേക്ഷിച്ച് 71% വർദ്ധനവിന് സാക്ഷ്യം വഹിച്ചു. ഇതിന് നിരവധി സാമ്പത്തിക ഘടകങ്ങൾ കാരണമായി. വ്യക്തിഗത വായ്പകൾ നൽകുന്നതിൽ ഉണ്ടായ കർശനമായ ഇടപെടലാണ് സ്വർണ വായ്പയിലെ ഈ വർദ്ധനവിന് കാരണമായ പ്രധാന ഘടകങ്ങളിലൊന്ന്.

"വ്യക്തിഗത വായ്പകളുടെയും സുരക്ഷിതമല്ലാത്ത വായ്പകളുടെയും സമ്മർദ്ദം കാരണം വായ്പ നൽകുന്നവർ കൂടുതൽ ജാഗ്രത പുലർത്തുന്നു, ഇത് സുരക്ഷിതമല്ലാത്ത വായ്പകൾ താരതമ്യേന കൂടുതൽ പ്രയാസകരമാവുന്നു. തൽഫലമായി, കടം വാങ്ങുന്നവർ സ്വർണ വായ്പകൾ തിരഞ്ഞെടുക്കാൻ നിർബന്ധിതരാവുന്നു. കാരണം അവ എളുപ്പത്തിൽ ലഭ്യമാകുകയും വേഗത്തിൽ പണം ലഭിക്കുകയും ചെയ്യുന്നു," റേഡിയൻ ഫിൻസെർവിന്റെ സ്ഥാപകൻ സുമിത് ശർമ്മ പറഞ്ഞു.

സ്വർണ വായ്പകൾക്ക് കുറഞ്ഞ ക്രെഡിറ്റ് വിലയിരുത്തൽ മാത്രമേ ആവശ്യമുള്ളൂ, ഇതാണ് മറ്റു വായ്പകളിൽ നിന്ന് സ്വർണ വായ്പയെ വ്യത്യസ്തമാക്കുന്നത്. പരിമിതമായ ക്രെഡിറ്റ് ഹിസ്റ്ററിയുള്ള ഒരു വ്യക്തികൾക്ക് ഇത് കൂടുതൽ മികച്ച ഓപ്ഷനാവുന്നു. കൂടാതെ, സ്വർണ വിലയിലെ വർദ്ധനവ് കടം വാങ്ങുന്നവർക്ക് അനു​ഗ്രഹമായി. കാരണം അവരുടെ സ്വർണാഭരണങ്ങൾക്ക് വലിയ വായ്പ തുകകൾ നേടാൻ സാധിക്കും, ഇത് സ്വർണ വായ്പയുടെ ഡിമാൻഡ് വർദ്ധിപ്പിച്ചു.

"സ്വർണ വിലയിലെ വർദ്ധനവ് അർത്ഥമാക്കുന്നത് കടം വാങ്ങുന്നവർക്ക് അതേ ആഭരണങ്ങൾക്ക് കൂടുതൽ ഫണ്ട് ലഭിക്കുമെന്നാണ്. സ്വർണ വായ്പക്ക് ആളുകൾ പ്രാധാന്യം നൽകുന്നതിനാൽ, സ്വർണ വില വർദ്ധിക്കുമ്പോൾ അവരുടെ സ്വർണ ആസ്തികൾ ഇത്തരത്തിൽ സാമ്പത്തികമായ പ്രയോജനപ്പെടുത്താൻ പ്രോത്സാഹിപ്പിക്കുന്നു," ശർമ്മ പറഞ്ഞു. മാത്രമല്ല വിലക്കയറ്റം വരുമ്പോൾ വായ്പ നൽകുന്നവർക്കും പ്രയോജനം ലഭിക്കുന്നുണ്ടെന്ന് അദ്ദേ​ഹം കൂട്ടിച്ചേർത്തു.

"പല ധനകാര്യ സ്ഥാപനങ്ങളും നിലവിലുള്ള സ്വർണ വായ്പകളിൽ ടോപ്പ്-അപ്പ് ചെയ്യുകയോ അല്ലെങ്കിൽ വായ്പാ തുക വർദ്ധിപ്പിക്കുകയോ ചെയ്യുന്നു. കാരണം ലോൺ-ടു-വാല്യൂ (LTV) അനുപാതം സ്വർണ ആഭരണങ്ങൾക്കെതിരെ വായ്പ നൽകാൻ കഴിയുന്ന പരമാവധി തുകയെ നയിക്കുന്നു," അദ്ദേഹം പറഞ്ഞു.

നഗരത്തിലെ ഡിമാൻഡ് vs ഗ്രാമീണ ഡിമാൻഡ്:

സ്വർണ വായ്പകളിലെ കുതിച്ചുചാട്ടം എല്ലാ തരം ജനങ്ങളെയും പ്രതികൂലമായി ബാധിക്കുന്നുണ്ട്.

"ഇന്ത്യയിലെ ഗ്രാമീണ പ്രദേശങ്ങളിലും നഗര പ്രദേശങ്ങളിലും സ്വർണത്തിന് ഡിമാൻഡ് വർദ്ധിച്ചു. വലിയ എൻ.ബി.എഫ്.സികളും ബാങ്കുകളും രണ്ട് വിഭാഗങ്ങളെയും തൃപ്തിപ്പെടുത്തുന്നു, ഇത് സ്വർണ വായ്പകളിലേക്ക് കൂടുതലായി ആളുകളെ ആകർഷിക്കുന്നു" ശർമ്മ പറഞ്ഞു.

"എന്നിരുന്നാലും, ഫിൻടെക് അധിഷ്ഠിത സേവനങ്ങളുടെ വരവോടെ നഗര വായ്പക്കാർക്ക് അധിക ആനുകൂല്യങ്ങൾ ലഭിച്ചു. പ്രധാന ഫിൻടെക് വായ്പക്കാർ ഡോർസ്റ്റെപ്പ് ലോൺ വിതരണം പോലുള്ള സേവനങ്ങൾ നൽകുന്നു, ഇത് നഗരപ്രദേശങ്ങളിലെ എല്ലാതരം ഉപഭോക്താക്കൾക്കും സ്വർണ്ണ വായ്പകൾ കൂടുതൽ എളുപ്പമാക്കുന്നു" ശർമ്മ പറഞ്ഞു.

വിവിധ സ്വർണ വായ്പകളും പലിശ നിരക്കുകളും...

• ആക്സിസ് ബാങ്ക് സ്വർണ വായ്പ - 17% മുതൽ പലിശ ഈടാക്കും. 25,001 രൂപ മുതൽ 25 ലക്ഷം വരെ വായ്പ ലഭിക്കും.

• എച്ച്.ഡി.എഫ്.സി സ്വർണ വായ്പ- 9.30% പലിശ മുതൽ 17.88% പലിശ വരെ. വായ്പ തുക 25,000 രൂപ മുതൽ ലഭിക്കും.

• മുത്തൂറ്റ് സ്വർണ വായ്പ- 10.90% പലിശ നിരക്കുണ്ട്. വായ്പ തുക 1,500 രൂപ മുതൽ ലഭിക്കും.

• എസ്.ബി.ഐ സ്വർണ വായ്പ- 10.20% പലിശ മുതൽ ഈടാക്കും. വായ്പ തുക 20,000 രൂപ മുതൽ 50 ലക്ഷം വരെ ലഭിക്കും.

• കൊട്ടക് മഹീന്ദ്ര സ്വർണ വായ്പ- 9.00% പലിശ മുതൽ 24.00% പലിശ വരെ നൽകണം. 20,000 രൂപ മുതൽ 1.5 കോടി വരെ ഇവിടെ വായ്പ ലഭിക്കും.

• ഇൻഡസ്ഇൻഡ് ബാങ്ക് സ്വർണ വായ്പ- 10.35% പലിശ മുതൽ 17.05% വരെ ഈടാക്കും. വായ്പാ തുക 20 ലക്ഷം വരെ ഉറപ്പാക്കാം.

• പഞ്ചാപ് നാഷണൽ ബാങ്ക് സ്വർണ വായ്പ- 9.15% പലിശയാണ് ഈടാക്കുന്നത്. ഇവിടെ 25,000 രൂപ മുതൽ 25 ലക്ഷം വരെ വായ്പാ തുക ലഭിക്കും.