ബെംഗളൂരു: ചരിത്ര നേട്ടം സ്വന്തമാക്കി ഇന്ഫോസിസ്. വ്യാഴാഴ്ച ഇന്ഫോസിസിന്റെ മാര്ക്കറ്റ് ക്യാപിറ്റല് (വിപണി മൂല്യം) അഞ്ച് ട്രില്യണ് രൂപ കവിഞ്ഞു. അതായത് അഞ്ച് ലക്ഷം കോടി രൂപയുടെ മൂല്യം!
അഞ്ച് ലക്ഷം കോടി വിപണി മൂല്യം മറികടക്കുന്ന രാജ്യത്തെ രണ്ടാമത്തെ ഐടി കമ്പനിയായി ഇതോടെ ഇന്ഫോസിസ് മാറിയിരിക്കുകയാണ്. ടിസിഎസ് ആണ് ഇന്ത്യയിലെ ഒന്നാം നമ്പര് ഐടി കമ്പനി. വിശദാംശങ്ങള്...
വിപണിയില്
ഓഹരി വിപണിയിലെ കുതിപ്പാണ് ഇന്ഫോസിസിന് ഈ ചരിത്ര നേട്ടം സമ്മാനിച്ചത്. ഈ വര്ഷം ഇതുവരെ ഇന്ഫോസിസിന്റെ ഓഹരി വിലയില് 61 ശതമാനത്തിന്റെ വര്ദ്ധനയാണ് ഉണ്ടായിട്ടുള്ളത്. അത് തന്നെയാണ് ഈ നേട്ടത്തിന് വഴിവച്ചതും.
ഒരു ഓഹരിയുടെ വില
ഒക്ടോബര് 15, വ്യാഴാഴ്ച ഇന്ഫോസിസിന്റെ ഒരു ഓഹരിയുടെ വില 1,185 രൂപ ഉയര്ന്നു. കഴിഞ്ഞ ദിവസം വിപണി ക്ലോസ് ചെയ്യുമ്പോള് ഉണ്ടായിരുന്നതിന്റെ 4.3 ശതമാനം ഉയര്ച്ചയാണ് വ്യാഴാഴ്ച ഇന്ഫോസിസ് ഓഹരികള് നേടിയത്. ഇതോടെ കമ്പനിയുടെ വിപണി മൂല്യം 5.04 ട്രില്യണ് കവിയുകയായിരുന്നു.
നമ്പര് വണ് റിലയന്സ്
വിപണി മൂല്യത്തിന്റെ കാര്യത്തില് രാജ്യത്തെ ഒന്നാംനമ്പര് കമ്പനി മുകേഷ് അംബാനിയുടെ റിലയന്സ് ഇന്ഡസ്ട്രീസ് ആണ്. 15.43 ട്രില്യണ് രൂപയാണ് റിലയന്സിന്റെ വിപണി മൂല്യം. 10 ട്രില്യണ് വിപണി മൂല്യം മറികടക്കുന്ന ആദ്യ ഇന്ത്യന് കമ്പനിയും റിലയന്സ് തന്നെ ആയിരുന്നു.
ടിസിഎസ് രണ്ടാമത്
ടാറ്റയുടെ ഉടമസ്ഥതയില് ഉള്ള ടാറ്റ കണ്സള്ട്ടന്സി സെര്വീസ് (ടിസിഎസ്) ആണ് വിപണി മൂല്യത്തില് രാജ്യത്ത് രണ്ടാമത്. ഐടി മേഖലയില് ഒന്നാമനും ടിസിഎസ് തന്നെ. 10.42 ട്രില്യണ് രൂപയാണ് ടിസിഎസിന്റെ ഇപ്പോഴത്തെ വിപണി മൂല്യം. അഞ്ച് ട്രില്യണ് മുകളില് വിപണിമൂല്യമുള്ള മറ്റൊരു കമ്പനി എച്ച്ഡിഎഫ്സി ആണ്.
തുടര്ച്ചയായ നേട്ടം
കഴിഞ്ഞ പാദത്തില് ഇന്ഫോസിസിന് ലാഭം കഴിഞ്ഞ വര്ഷത്തെ അപേക്ഷിച്ച് 20.5 ശതമാനം ഉയര്ത്താനായിരുന്നു. വരുമാനം 8.6 ശതമാനം വര്ദ്ധിച്ച് 24,570 കോടിയായി ഉയരുകയും ചെയ്തിരുന്നു.