115 മാസം കൊണ്ട് 1.2 ലക്ഷം 2.4 ലക്ഷമാക്കി മാറ്റും... പോസ്റ്റ് ഓഫിസിന്റെ കിടിലൻ സ്കീം, കൂടുതലറിയാം

ചെറുതും വലുതുമായി നിരവധി നിക്ഷേപ പദ്ധതികൾ പോസ്റ്റ് ഓഫീസ് നൽകുന്നുണ്ട്. ഇടത്തരം വരുമാനമുള്ളവർക്കും കുറഞ്ഞ നിക്ഷേപത്തിലൂടെ നല്ലൊരു സമ്പാദ്യം നേടാമെന്നതാണ് പോസ്റ്റ് ഓഫീസ് പദ്ധതികളെ ജനപ്രിയമാക്കുന്നത്. പോസ്‌റ്റ് ഓഫീസ് കിസാൻ വികാസ് പത്ര സർട്ടിഫിക്കറ്റുകൾ ജനപ്രിയ ചെറുകിട സമ്പാദ്യ പദ്ധതികളിലൊന്നാണ്. ഈ സ്കീമിൽ നിക്ഷേപിച്ചാൽ ഒമ്പത് വർഷവും ഏഴ് മാസവും (മൊത്തം 115 മാസം) കൊണ്ട് നിക്ഷേപകരുടെ പണം ഇരട്ടിയാകും.

കിസാൻ വികാസ് പത്ര ഉൾപ്പെടെയുള്ള ചെറുകിട സമ്പാദ്യ പദ്ധതികൾക്ക് ബാധകമായ പലിശ നിരക്കിൽ മാറ്റമില്ലെന്ന് സർക്കാർ വെള്ളിയാഴ്ച പ്രഖ്യാപിച്ചു. നിലവിൽ, കിസാൻ വികാസ് പത്ര നിക്ഷേപങ്ങൾക്ക് പ്രതിവർഷം 7.5 ശതമാനം ആണ് പലിശ നിരക്ക്. ലാഭകരമായൊരു നിക്ഷേപ പദ്ധതിയാണിത്. ഒരു നിശ്ചിത കാലയളവിനുള്ളിൽ നിക്ഷേപിച്ച തുകയുടെ ഇരട്ടി പണം ഈ സ്കീമിലൂടെ ലഭിക്കും.

ഒരു ചെറിയ സമ്പാദ്യ പദ്ധതിയാണ് കിസാൻ വികാസ് പത്ര. ഓരോ മൂന്നു മാസം കൂടുമ്പോഴും സർക്കാർ അതിന്റെ പലിശ നിരക്ക് അവലോകനം ചെയ്യുകയും, ആവശ്യാനുസരണം മാറ്റങ്ങൾ വരുത്തുകയും ചെയ്യുന്നു. ഒറ്റത്തവണ നിക്ഷേപം സാധ്യമാക്കുന്ന പദ്ധതി രാജ്യത്തെ കർഷകർക്ക് കൂടി ഉപകാരപ്പെടുന്ന വിധത്തിലാണ് സർക്കാർ ഒരുക്കിയിരിക്കുന്നത്. പോസ്റ്റ് ഓഫീസ് വഴിയോ ബാങ്കുകൾ വഴിയോ ഈ പദ്ധതിയിൽ നിക്ഷേപിക്കാം.

ഈ പദ്ധതിയിൽ നിക്ഷേപിക്കാവുന്ന കുറഞ്ഞ തുക 1000 രൂപയാണ്. അല്ലെങ്കില്‍ 100ന്റെ ഗുണിതങ്ങളുടെ തുകയും നിക്ഷേപിക്കാം. ഈ സ്‌കീമിലെ പരമാവധി നിക്ഷേപത്തിന് പരിധിയില്ല. ഈ പദ്ധതിയിൽ വ്യക്തിഗത അക്കൗണ്ടും സംയുക്ത അക്കൗണ്ടും തുടങ്ങാനാകും. പ്രായപൂർത്തിയായ 3 പേർ ചേർന്ന് സംയുക്ത അക്കൗണ്ട് ആരംഭിക്കാം. പ്രായപൂർത്തിയാകാത്ത ഒരാളുടെ പേരിൽ രക്ഷിതാവിന് അക്കൗണ്ട് തുറക്കാം. 10 വയസ്സിന് മുകളിലുള്ള പ്രായപൂർത്തിയാകാത്തവർക്ക് സ്വന്തം പേരിൽ അക്കൗണ്ട് തുടങ്ങാം. നിക്ഷേപത്തിന് പ്രായപരിധിയില്ലെന്നതും മറ്റൊരു സവിശേഷതയാണ്.

നിക്ഷേപ കാലാവധി പൂർത്തിയാക്കിയാൽ നിക്ഷേപം ഇരട്ടിയാകുമെന്നതാണ് കിസാൻ വികാസ് പത്ര സ്കീമിന്റെ നേട്ടം. അക്കൗണ്ട് ഉടമ മരണപ്പെടുക പോലുള്ള ചില സാഹചര്യങ്ങളിൽ കാലാവധി പൂർത്തിയാകുന്നതിനു മുൻപേ അക്കൗണ്ട് ക്ലോസ് ചെയ്യാം.

ഈ പദ്ധതിയിൽ ഒരു ലക്ഷം രൂപ നിക്ഷേപിക്കുകയാണെങ്കിൽ തുക 2 ലക്ഷം രൂപയായി മാറും. 1.2 ലക്ഷം നിക്ഷേപിച്ചാൽ 115 മാസത്തിനുശേഷം കാലാവധി പൂർത്തിയാകുമ്പോൾ 1.4 ലക്ഷം കയ്യിൽ കിട്ടും. 5 ലക്ഷം രൂപ നിക്ഷേപിച്ചാൽ 10 ലക്ഷം രൂപയായിരിക്കും ലഭിക്കുക.