ബിസിനസിലൂടെ നേടിയത് കോടികൾ; അന്താരാഷ്ട്ര വനിതാ ദിനത്തിൽ ഓർമ്മിക്കേണ്ട 5 കരുത്തുറ്റ വനിതകൾ

മാർച്ച് 8 അന്താരാഷ്ട്ര വനിതാ ദിനം വെറുമൊരു ദിവസമല്ല. സമൂഹത്തിൽ നിരവധി സംഭാവനകൾ നൽകിയ ഒട്ടനവധി സ്ത്രീകൾക്കു വേണ്ടിയുള്ള ദിനമാണിത്. സ്ത്രീകൾ ഇപ്പോൾ എല്ലാ മേഖലകളിലും സജീവമായി പ്രവർത്തിക്കുന്നുണ്ട്. ഓരോ സ്ത്രീയുടേയും ഉയർക്കും പിന്നിൽ കഠിനാധ്വാനത്തിന്റെ കഥ പറയാനുണ്ട്. വനിതകൾക്ക് ഒരു ദിനം വേണോ എന്ന തരത്തിൽ പലതരം വിമർശനങ്ങൾ ഉയരാറുണ്ട്. എന്നാൽ സ്ത്രീകൾക്ക് അവരുടെ അധ്വാനത്തിന് പ്രോത്സാഹനം നൽകുവാൻ മാർച്ച് 8ലൂടെ സാധിക്കുമെന്നാണ് പ്രതീക്ഷിക്കുന്നത്.

ഈ പ്രത്യേക ദിനത്തിൽ ഇന്ത്യയിലെ അഞ്ച് വനിതാ സംരംഭകരെക്കുറിച്ച് അറിയാം. സാമ്പത്തിക രം​ഗത്ത് ഏറെ സംഭാവനകൾ നൽകിയ ഇവർ ഈ വനിതാ ദിനത്തിൽ ചർച്ച ചെയ്യേണ്ടവരാണ്.

1. റോഷ്‌നി നാടാർ മൽഹോത്ര - എച്ച്‌.സി.എൽ ടെക്‌നോളജീസ് ചെയർപേഴ്‌സൺ

എച്ച്‌.സി.എൽ ടെക്‌നോളജീസിന്റെ ചെയർപേഴ്‌സണാണ് റോഷ്‌നി നാടാർ മൽഹോത്ര. എച്ച്‌.സി.എൽ ഗ്രൂപ്പിന്റെ സ്ഥാപകനായ ശിവ് നാടാറിന്റെ ഏക മകളായ റോഷ്‌നി, രാജ്യത്ത് ഒരു പ്രമുഖ ഐടി കമ്പനിയെ നയിക്കുന്ന ആദ്യ വനിതയാണ്. വിവിധ ജീവകാരുണ്യ സംരംഭങ്ങളിലും അവർ പങ്കാളിയാണ്. 2019-ൽ ഫോർബ്‌സിന്റെ ലോകത്തിലെ ഏറ്റവും ശക്തരായ 100 സ്ത്രീകളുടെ പട്ടികയിൽ അവർ 54-ാം സ്ഥാനം നേടി. നിലവിലെ കണക്ക് പ്രകാരം റോഷ്നിയുടെ മൊത്തം ആസ്തി 3.26 ട്രില്ല്യനാണ്.

2. ഗസൽ അലഗ് - മാമേർത്തിൻ്റെ സഹസ്ഥാപകൻ

ഐ.ടിയിൽ ബി.സി.എ ബിരുദധാരിയായ ഗസൽ അലാഗ് മാമാ എർത്ത് കമ്പനിയുടെ സ്ഥാപകയാണ്. ഇന്ത്യയുടെ സൗന്ദര്യ സങ്കൽപ്പങ്ങൾക്ക് മറ്റൊരു തലം സൃഷ്ടിച്ച കമ്പനിയാണ് മാമാ എർത്ത്.. എട്ട് വർഷം മുമ്പ് സ്ഥാപിതമായ ഈ കമ്പനിക്ക് 200-ലധികം ഉൽപ്പന്നങ്ങളുടെ പോർട്ട്‌ഫോളിയോ ഉണ്ട്. കമ്പനി ഇതിനകം 1,000 രൂപയിലധികം വരുമാനം നേടിയിട്ടുണ്ട്. 2020-ൽ ​ഗസൽ ദി ഡെർമ കമ്പനി ആരംഭിച്ചു. ചർമ്മ സംരക്ഷണത്തിനു വേണ്ടിയുള്ള ഉൽപ്പന്നങ്ങളാണ് ഇതിലും നിർമ്മിക്കുന്നത്. ​ഗസൽ അല​ഗിൻ്റെ നിലവിലെ ആസ്തി 150 കോടിയാണ്.

3. ശ്രീലക്ഷ്മി സുരേഷ് - eDesign ൻ്റെ സ്ഥാപക

3 വയസ്സുള്ളപ്പോൾ മുതൽ കമ്പ്യൂട്ടറുകളോടുള്ള അഭിനിവേശം ശ്രീലക്ഷ്മി സുരേഷിന് ആരംഭിച്ചിരുന്നു. വെറും 6 വയസ്സുള്ളപ്പോൾ അവർ തന്റെ ആദ്യ വെബ്‌സൈറ്റ് ഡിസൈൻ ചെയ്തു. ലോകത്തിലെ ഏറ്റവും പ്രായം കുറഞ്ഞ സി.ഇ.ഒയും വെബ് ഡിസൈനറുമാണ് ശ്രീലക്ഷ്മി. 10 വയസ്സുള്ളപ്പോഴാണ് ഇ-ഡിസൈൻ എന്ന ആശയം അവർ കൊണ്ടുവന്നത്.

4. നിസാബ ഗോദ്‌റെജ് - ഗോദ്‌റെജ് കൺസ്യൂമർ പ്രോഡക്‌ട്‌സിന്റെ ചെയർപേഴ്‌സൺ

ഗോദ്‌റെജ് കൺസ്യൂമർ പ്രോഡക്‌ട്‌സ് ലിമിറ്റഡിന്റെ (ജി.സി.പി.എൽ) ചെയർപേഴ്‌സണാണ് നിസാബ ഗോദ്‌റെജ്. ​ഗോദ്റേജിൻ്റെ പുതിയ ഉൽപ്പന്നങ്ങൾ സൃഷ്ടിച്ച് കമ്പനിയെ ആ​ഗോള തലത്തിലേക്ക് വളർത്തിയതിൽ നിസാബക്ക് വലിയ പങ്കുണ്ട്. ഫോർബ്‌സിന്റെ കണക്കനുസരിച്ച്, നിസാബ വന്നതിനു ശേഷമാണ് കമ്പനിയുടെ വരുമാനം 221 മില്യൺ ഡോളറിൽ നിന്ന് 1.5 ബില്യൺ ഡോളറായി ​ഗോദ്റേജ് ഉയർന്നത്.

5. വന്ദന ലുത്ര - VLCC യുടെ സ്ഥാപക

1989 ൽ 20,000 രൂപയുടെ നിക്ഷേപത്തോടെ വന്ദന ലുത്ര കേൾസ് ആൻഡ് കർവ്സ് (വി.എൽ.സി.സി) എന്ന കമ്പനി ആരംഭിച്ചു. ഇപ്പോൾ ഈ സ്ഥാപനത്തിൻ്റെ ആസ്തി 1,300 കോടി രൂപയിലധികമാണ്. 2023 ൽ 144 നഗരങ്ങളിലായി വി.എൽ.സി.സിക്ക് 311 കേന്ദ്രങ്ങളും 100 പരിശീലന സ്ഥാപനങ്ങളും ഉണ്ടായിരുന്നുവെന്ന് റിപ്പോർട്ടുകൾ പറയുന്നു.