പ്രതികാരം രാജ്യത്തിന്‍റെ കടമ, തിരിച്ചടി കടുപ്പിച്ച് ഇറാൻ, ആയുധശേഖരത്തിനുള്ളിൽ എന്തെല്ലാം എന്നറിയാം

ലോകം മുഴുവൻ വലിയ ആശങ്കയിലാണ്, എന്തും സംഭവിക്കാമെന്ന പ്രതീതി എങ്ങും നിലനിൽക്കുന്നു. അമേരിക്കയും ഇസ്രായേലും സംയുക്തമായി നടത്തിയ ആക്രമണത്തിൽ പരമോന്നത നേതാവ് ആയത്തുള്ള അലി ഖമേനി കൊല്ലപ്പെട്ടതിനെത്തുടർന്ന് ശക്തമായി തിരിച്ചടിക്കുകയാണ് ഇറാൻ. മുതിർന്ന നേതാക്കളുടെ മരണത്തിന് പ്രതികാരം ചെയ്യുന്നത് രാജ്യത്തിന്‍റെ കടമയും നിയമപരമായ അവകാശവുമാണ് എന്ന് ഇറാൻ പ്രസിഡന്റ് മസൂദ് പെഷേഷ്കിയാൻ പ്രഖ്യാപിച്ചു കഴിഞ്ഞു. പക്ഷെ അതേസമയം ശക്തരായ രണ്ട് എതിരാളികൾക്ക് നേരെ പൊരുതാൻ എന്ത് ആയുധങ്ങളാണ് ഇറാന്‍റെ കയ്യിലുള്ളത് എന്നതാണ് എല്ലാവരും ഉയർത്തുന്ന ചോദ്യം.

മിസൈൽ ആയുധശേഖരം: പ്രതിരോധത്തിന്‍റെ കാതൽ

ഇറാന്‍റെ സൈനിക ശക്തിയുടെ കേന്ദ്രബിന്ദു അവരുടെ മിസൈൽ പദ്ധതിയാണ്. പ്രതിരോധ വിശകലന വിദഗ്ധർ ഇതിനെ മിഡിൽ ഈസ്റ്റിലെ ഏറ്റവും വിപുലവും വൈവിധ്യപൂർണ്ണവുമായി കണക്കാക്കുന്നു. പരമ്പരാഗത വ്യോമ മേധാവിത്വത്തെ ആശ്രയിക്കാതെ മേഖലയിലുടനീളം ആക്രമണം നടത്താൻ ഈ മിസൈൽ കരുത്തിലൂടെ ഇറാന് സാധിക്കുന്നു. ടെഹ്റാന്‍റെ കൈവശമുള്ള ബാലിസ്റ്റിക് മിസൈലുകൾ 2,000 മുതൽ 2,500 കിലോമീറ്റർ വരെ സഞ്ചരിക്കുമെന്ന് കണക്കാക്കപ്പെടുന്നു.

ഹ്രസ്വ-ദൂര മിസൈലുകൾ: ഉടനടി തിരിച്ചടിക്കാൻ

ഏകദേശം 150 മുതൽ 800 കിലോമീറ്റർ വരെ ദൂരപരിധിയുള്ള ഹ്രസ്വ-ദൂര ബാലിസ്റ്റിക് മിസൈലുകൾ ഇറാന്റെ "ആദ്യ പഞ്ച്" ശേഷി എന്ന് വിശകലന വിദഗ്ധർ പലപ്പോഴും വിശേഷിപ്പിക്കുന്ന ഒന്നാണ്. സോൾഫാഗർ, ക്വിയാം-1 മിസൈലുകൾ എന്നിവയുൾപ്പെടെ സമീപത്തുള്ള സൈനിക ലക്ഷ്യങ്ങൾക്കെതിരെ ദ്രുത ആക്രമണങ്ങൾക്കായി രൂപകൽപ്പന ചെയ്‌തിരിക്കുന്നു.

2020 ജനുവരിയിൽ ഖാസിം സുലൈമാനിയുടെ കൊലപാതകത്തിനുശേഷം ഇറാൻ, ഇറാഖിലെ ഐൻ അൽ-അസദ് വ്യോമതാവളത്തിൽ ബാലിസ്റ്റിക് മിസൈലുകൾ പ്രയോഗിച്ചിരുന്നു. ഈ ആക്രമണം നിരവധി നാശനഷ്ടങ്ങൾ ഉണ്ടാക്കുകയും 100-ൽ അധികം യുഎസ് ഉദ്യോഗസ്ഥർക്ക് പരിക്കേൽപ്പിക്കുകയും ചെയ്തു.

മീഡിയം-റേഞ്ച് മിസൈലുകൾ: യുദ്ധക്കളത്തിലെ കരുത്തർ

ഹ്രസ്വ-ദൂര സംവിധാനങ്ങൾ ഉടനടി തിരിച്ചടി നൽകുന്നുണ്ടെങ്കിൽ മീഡിയം-റേഞ്ച് മിസൈലുകൾ കൂടുതൽ കരുത്ത് നൽകുന്നതാണ്. ഷഹാബ്-3, ഇമാദ്, ഗാദർ-1, ഖോറാംഷഹർ അതോടൊപ്പം സെജ്ജിൽ തുടങ്ങിയ മിസൈലുകൾ ഇറാന്റെ ദൂരപരിധി ഏകദേശം 1,500 മുതൽ 2,000 കിലോമീറ്റർ വരെ വർദ്ധിപ്പിക്കുന്നു. ഖൈബാർ ഷെകാൻ, ഹജ് ഖാസിം എന്നിവയുൾപ്പെടെയുള്ള പുതിയ സംവിധാനങ്ങൾ ആക്രമണത്തിന് കരുത്ത് നൽകുന്നതാണ്. മൊത്തത്തിൽ, ഈ ആയുധങ്ങൾ ഇസ്രായേലിനെയും ഖത്തർ, ബഹ്‌റൈൻ, കുവൈറ്റ്, സൗദി അറേബ്യ, യുണൈറ്റഡ് അറബ് എമിറേറ്റ്സ് എന്നിവിടങ്ങളിലുടനീളമുള്ള യുഎസുമായി ബന്ധപ്പെട്ട കേന്ദ്രങ്ങളേയും തകർക്കാൻ കഴിയുന്നതാണ്.

ക്രൂയിസ് മിസൈലുകളും ഡ്രോണുകളും: പുത്തൻ സാങ്കേതിക വിദ്യ

ബാലിസ്റ്റിക് മിസൈലുകൾക്ക് പുറമേ വ്യോമ പ്രതിരോധ സംവിധാനങ്ങളെ സങ്കീർണ്ണമാക്കുന്നതിനായി രൂപകൽപ്പന ചെയ്ത ക്രൂയിസ് മിസൈലുകളെയും ആളില്ലാ ആകാശ വാഹനങ്ങളെയും ഇറാൻ വളരെയധികം ആശ്രയിക്കുന്നു. സൗമർ, യാ-അലി, ഖുദ്‌സ് വകഭേദങ്ങൾ, ഹൊവെയ്‌സെ, പാവേ, റാദ് എന്നിവയുൾപ്പെടെയുള്ള ക്രൂയിസ് മിസൈലുകൾ താഴ്ന്ന ഉയരത്തിൽ പറക്കുന്നവയും ഭൂപ്രകൃതിയെ പിന്തുടരാൻ കഴിയുന്നതുമായതിനാൽ കണ്ടെത്തൽ കൂടുതൽ ബുദ്ധിമുട്ടാണ്. സൗമറിന് 2,500 കിലോമീറ്റർ വരെ ദൂരപരിധിയുണ്ടെന്ന് കണക്കാക്കപ്പെടുന്നു. പ്രതിരോധത്തെ തകർക്കുന്നതിനും വിമാനത്താവളങ്ങൾ, തുറമുഖങ്ങൾ, ഊർജ്ജ സൗകര്യങ്ങൾ എന്നിവയിൽ ദീർഘകാല തടസ്സങ്ങൾ നിലനിർത്തുന്നതിനും ഇറാൻ മിസൈലുകൾക്കൊപ്പം വൺ-വേ അറ്റാക്ക് ഡ്രോണുകൾ ഉപയോഗിക്കുമെന്ന് വിശകലന വിദഗ്ധർ പ്രതീക്ഷിക്കുന്നു.

ഭൂഗർഭ 'മിസൈൽ നഗരങ്ങൾ': അതിജീവനത്തിനായി നിർമ്മിച്ചത്

ഇറാന്റെ പോരാട്ടം തുടരാനുള്ള കഴിവ് ആയുധങ്ങളെ മാത്രമല്ല, അതിജീവനത്തെയും ആശ്രയിച്ചിരിക്കുന്നു. വർഷങ്ങളായി ആ രാജ്യം നിരവധി ഭൂഗർഭ അറകളും മറഞ്ഞിരിക്കുന്ന വിക്ഷേപണ സൗകര്യങ്ങളും നിർമിച്ചിട്ടുണ്ട്. അതോടൊപ്പം "മിസൈൽ നഗരങ്ങൾ" എന്ന് പലപ്പോഴും വിളിക്കപ്പെടുന്ന ശക്തമായ തുരങ്കങ്ങൾ എന്നിവയും നിർമ്മിച്ചിട്ടുണ്ട്. അതുകൊണ്ടുതന്നെ എതിരാളികളെ സംബന്ധിച്ചിടത്തോളം, ഇറാന്റെ മിസൈൽ ശേഷി വേഗത്തിൽ നശിപ്പിക്കുക എന്നത് അസംഭവ്യമാണ്.