ഇറാന്‍-ഇസ്രായേല്‍ യുദ്ധം: ഈ വിമാനക്കമ്പനികള്‍ ഗള്‍ഫ് സര്‍വീസ് നിര്‍ത്തിവച്ചു, പൂര്‍ണ്ണ പട്ടിക ഇതാ

ഇറാന്‍-ഇസ്രായേല്‍ യുദ്ധം പൊട്ടിപ്പുറപ്പെട്ടതോടെ ഇന്ത്യന്‍, ഗള്‍ഫ് വിമാനകമ്പനികള്‍ മിഡില്‍ ഈസ്റ്റിലേയ്ക്കുള്ള സര്‍വീസ് നിര്‍ത്തിവച്ചു.

മുന്‍കരുതലെന്ന നിലയില്‍ മിഡില്‍ ഈസ്റ്റിലേയ്ക്കുള്ള സര്‍വീസുകള്‍ നിര്‍ത്തുകയാണെന്ന് എയര്‍ ഇന്ത്യ പോസ്റ്റ് ചെയ്തപ്പോള്‍ വ്യോമാതിര്‍ത്തി നിയന്ത്രണങ്ങള്‍ ചൂണ്ടിക്കാട്ടിയ ഇന്‍ഡിഗോ, മിഡില്‍ ഈസ്റ്റിലേക്കും തിരിച്ചുമുള്ള എല്ലാ വിമാനങ്ങളും 12 മണിവരെ റദ്ദാക്കുകയാണെന്ന് അറിയിച്ചു.

"ഉപഭോക്താക്കളുടെയും ജീവനക്കാരുടെയും സുരക്ഷയ്ക്കാണ് ഞങ്ങള്‍ മുന്‍ഗണന നല്‍കുന്നത്. അതിനാല്‍ ഈ നടപടി സ്വീകരിക്കുന്നു," എയര്‍ലൈന്‍ എക്‌സ് പോസ്റ്റില്‍ പറഞ്ഞു. യാത്രാവിവരങ്ങള്‍ക്കായി യാത്രികര്‍ അതത് വിമാനക്കമ്പനികളുമായി ബന്ധപ്പെടേണ്ടതാണ്.

ഇന്ത്യന്‍ വ്യോമയാനക്കമ്പനികള്‍ക്ക് പുറമേ മലയാളികള്‍ ഏറെ ആശ്രയിക്കുന്ന ഖത്തര്‍ എയര്‍വേസ്, എമിറേറ്റ്‌സ്, ഒമാന്‍ എയര്‍ എന്നിവയും സര്‍വീസുകള്‍ നിര്‍ത്തലാക്കിയിട്ടുണ്ട്. സര്‍വീസുകള്‍ നിര്‍ത്തലാക്കുകയാണെന്ന് കുവൈത്ത് വ്യോമയാന മന്ത്രാലയവും അറിയിച്ചു. സര്‍വീസുകള്‍ തടസ്സപ്പെടുമെന്ന് ഫ്‌ലൈ ദുബായി അറിയിച്ചു.

എമിറേറ്റ്‌സ്
എമിറേറ്റ്‌സ് യാത്രികര്‍ സ്റ്റാറ്റസ് അറിയാന്‍ http://emirat.es/travelupdates , http://emirat.es/flightstatsu വെബ്‌സൈറ്റുകള്‍ പരിശോധിക്കണം.

തുര്‍ക്കിഷ് എയര്‍ലൈന്‍സ്, ഖത്തര്‍ എയര്‍വേസ്, എയര്‍ഫ്രാന്‍സ്,ലുഫ്ത്താന്‍സ്,വിസ് എയര്‍ എന്നിവയും സര്‍വീസുകള്‍ താല്‍ക്കാലികമായി റദ്ദാക്കി.

യുഎസും ഇസ്രായേലും ഉച്ചയോടെയാണ് ഇറാനില്‍ മിസൈല്‍ വര്‍ഷം നടത്തിയത്. തുടര്‍ന്ന് അമേരിക്കന്‍ താവളങ്ങള്‍ സ്ഥിതി ചെയ്യുന്ന അബുദാബിയേയും ബഹ്‌റൈനേയും കുവൈത്തിനേയും ഇറാന്‍ ലക്ഷ്യമിട്ടു.

യുഎഇ, ഇക്കാര്യം സ്ഥിരീകരിച്ചിട്ടുണ്ട്. അക്രമത്തില്‍ ഒരാള്‍ കൊല്ലപ്പെട്ടുവെന്നും തിരിച്ചടിയ്ക്കാന്‍ പൂര്‍ണ്ണ അവകാശമുണ്ടെന്നും യുഎഇ വൃത്തങ്ങള്‍ വ്യക്തമാക്കി. ഈ രാഷ്ട്രങ്ങളെല്ലാം തങ്ങളുടെ വ്യോമപാത അടച്ചിരിക്കയാണ്.