3:1 അനുപാതത്തില്‍ ബോണസ് ഓഹരി പ്രഖ്യാപിച്ച് ഐടി കമ്പനി, റെക്കോര്‍ഡ് തീയതി പുറത്തുവിട്ടു

3:1 അനുപാതത്തില്‍ ബോണസ് ഓഹരികള്‍ പ്രഖ്യാപിച്ചിരിക്കയാണ് ഇന്‍ഫോബീന്‍സ് ടെക്‌നോളജീസ്. ഓഹരിയുടമകളുടെ പക്കലുള്ള 10 രൂപ മുഖവിലയുള്ള, ഓരോ മുഴുവനായും അടച്ചു തീര്‍ത്ത ഓഹരിയ്ക്കും കമ്പനിയുടെ മൂന്ന് ഓഹരികള്‍ ബോണസായി ലഭിക്കും. ജനുവരി 22 ന് ചേര്‍ന്ന ഡയറക്ടര്‍ ബോര്‍ഡാണ് തീരുമാനം കൈക്കൊണ്ടത്.

ബോണസ് ഓഹരി
നിലവിലെ ഓഹരി ഉടമകള്‍ക്ക് കമ്പനി നല്‍കുന്ന പ്രതിഫലമാണ് ബോണസ് ഓഹരി. ഒരു നിശ്ചിത അനുപാതത്തില്‍ കരുതല്‍ ധനം ഓഹരി മൂലധനമാക്കി മാറ്റുന്നു. ഇതിനായി പണമൊന്നും കമ്പനി ചെലവഴിക്കുന്നില്ല. കരുതല്‍ ശേഖരം ( ലാഭത്തിന്റെ ഒരുഭാഗം) പുതിയ ഓഹരികളാക്കി മാറ്റുന്നു. വളര്‍ച്ചയും സാമ്പത്തിക ശക്തിയും പ്രതിഫലിപ്പിക്കുന്നതിനാണ് കമ്പനികള്‍ ബോണസ് ഓഹരികള്‍ ഇഷ്യു ചെയ്യുന്നത്.

43.85 കോടി രൂപയുടെ കരുതല്‍ ശേഖരമാണ് ഇന്‍ഫോബീന്‍സ് ഇത്തരത്തില്‍ ബോണസ് ഓഹരിയ്ക്കായി നീക്കിവച്ചത്. കൂടാതെ സെക്യൂരിറ്റീസ് പ്രീമിയം അക്കൗണ്ടില്‍ നിന്നും 28.87 കോടി രൂപയും എടുത്തു.ബോണസ് ഓഹരി വിതരണത്തിന് ശേഷം ഓഹരികളുടെ എണ്ണം 2.42 കോടിയില്‍ നിന്ന് 9.7 കോടിയായി ഉയരും.

റെക്കോര്‍ഡ് തീയതി
ബോണസ് ഓഹരി വിതരണത്തിന്റെ റെക്കോര്‍ഡ് തീയതി ഫെബ്രുവരി 27 ആണ്. അര്‍ഹതയുള്ള ഓഹരി ഉടമകളെ കണ്ടെത്താനുള്ള കട്ട്-ഓഫ് തീയതിയാണ് ഇത്. റെക്കോര്‍ഡ് തീയതിയില്‍ രജിസ്റ്ററില്‍ പേരുള്ള നിക്ഷേപകര്‍ക്ക് ബോണസ് ഓഹരി ലഭ്യമാകും.

മൂന്നാംപാദ പ്രകടനം
ഡിസംബറിലവസാനിച്ച പാദത്തില്‍ കമ്പനി 138 കോടി രൂപയുടെ വരുമാനം നേടി. മുന്‍വര്‍ഷത്തെ സമാന പാദത്തെ അപേക്ഷിച്ച് 38 ശതമാനം അധികം. മുന്‍പാദവുമായി തട്ടിച്ചുനോക്കുമ്പോള്‍ വരുമാനം 6 ശതമാനം ഉയര്‍ന്നു. ഇബിറ്റ ഇരട്ടിയിലധികം വളര്‍ന്ന് 33 കോടി രൂപയായപ്പോള്‍ അറ്റാദായം 173 ശതമാനം ഉയര്‍ന്ന് 19 കോടി രൂപ. തുടര്‍ച്ചയായി ഇത് യഥാക്രമം 6 ശതമാനവും 15 ശതമാനവും ഇടിവാണ്.കമ്പനി ഓഹരി വെള്ളിയാഴ്ച 9.58 ശതമാനം ഇടിഞ്ഞ് 808.95 രൂപയിലെത്തി.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.