ചൈനീസ് സംരഭക നേതാക്കളുടെ പട്ടികയില്‍ നിന്ന് ജാക്ക് മായെ പുറത്താക്കി ഔദ്യോഗിക സര്‍ക്കാര്‍ മാധ്യമങ്ങള്‍

ബീജിംഗ്: ആലിബാബ സ്ഥാപകന്‍ ജാക്ക് മായെ ചൈനീസ് സംരഭക നേതാക്കളുടെ പട്ടികയില്‍ നിന്ന് ഔദ്യോഗിക സര്‍ക്കാര്‍ മാധ്യമങ്ങള്‍ ഒഴിവാക്കിയതായി റിപ്പോര്‍ട്ട്. ചൈനയില്‍ സാങ്കേതിക വിപ്ലവം കൊണ്ടുവന്നതില്‍ പ്രധാന പങ്കാളിത്തം വഹിച്ച വ്യവസായികളെ പ്രശംസിക്കുന്ന ഒന്നാം പേജ് റിപ്പോര്‍ട്ടില്‍ നിന്നാണ് ജാക്ക് മായെ ഒഴിവാക്കിയത്. ഷാങ്ഹായ് സെക്യൂരിറ്റീസ് ന്യൂസാണ് ജാക്ക് മായെ ഒഴിവാക്കിയത്.

കഴിഞ്ഞ കുറച്ച് മാസങ്ങളായി ജാക്ക് മാ പൊതുവേദിയില്‍ പ്രത്യക്ഷപ്പെട്ടിരുന്നില്ലായിരുന്നു. ഈ അടുത്താണ് ഗ്രാമീണ ഓണ്‍ലൈന്‍ ചടങ്ങില്‍ അദ്ദേഹം പങ്കെടുത്തത്. ഇതിന്റെ വീഡിയോ വ്യാപകമായി പ്രചരിച്ചിരുന്നു. ഈ വീഡിയോയില്‍ എന്തുകൊണ്ടാണ് അദ്ദേഹം മാസങ്ങളോളം മാറി നിന്നതെന്ന് വിശദീകരിച്ചിരുന്നില്ല.

അതേസമയം, മൊബൈല്‍ യുഗത്തെ മാറ്റിയെഴുതിയവരുടെ പട്ടികയില്‍ പോണി മായുടെ പേര് പ്രസിദ്ധീകരിച്ചിട്ടുണ്ട്. ചൈനയിലെ സാമ്പത്തിക നിയന്ത്രണത്തെ കുറിച്ച് വിമര്‍ശനം ഉന്നയിച്ചതിന് പിന്നാലെയാണ് ജാക്ക് മായെ കാണാതായത്. കഴിഞ്ഞ വര്‍ഷം ഒക്ടോബര്‍ മുതലാണ് ജാക്ക് മാ പൊതുവേധിയില്‍ നിന്ന് അപ്രത്യക്ഷമായത്.