സാമ്പത്തിക ഇടപാടിൽ ശ്രദ്ധ വേണം, 4 ദിവസം ബാങ്ക് അവധിയാണ്, എടിഎം കാലിയായേക്കാം

എത്രയൊക്കെ ഡിജിറ്റലാണെന്ന് പറഞ്ഞാലും സാമ്പത്തിക ഇടപാടുകൾ നടത്താൻ നേരിട്ട് ബാങ്കിൽ പോകുന്ന നിരവധി ആളുകൾ ഇപ്പോഴുമുണ്ട്. അതുകൊണ്ടുതന്നെ ബാങ്ക് പ്രവർത്തി ദിവസവുമായി ബന്ധപ്പെട്ട കാര്യങ്ങൾ ശ്രദ്ധിക്കുന്നത് നല്ലതാണ്. കാരണം ഈ മാസം 4 ദിവസം അടുപ്പിച്ച് ബാങ്കുകൾ അടഞ്ഞ് കിടക്കും. ബാങ്ക് ജീവനക്കാരുടെ പണിമുടക്കും ഞാറാഴ്ചയും ശനിയാഴ്ചയും എല്ലാം ഒരുമിച്ച് വരുന്നതാണ് തുടർച്ചയായ ബാങ്ക് അവധിക്ക് കാരണം.

അവധി ദിവസങ്ങൾ

ജനുവരി 27ന് ബാങ്ക് യൂണിയനുകൾ പണിമുടക്കിന് ആഹ്വാനം ചെയ്തിട്ടുണ്ട്. 2026 ജനുവരി 24 മാസത്തെ 4-ആമത്തെ ശനിയാഴ്ചയാണ്. തുടര്‍ന്ന് ജനുവരി 25 ഞായര്‍, ജനുവരി 26 തിങ്കള്‍ രാജ്യം റിപ്പബ്ലിക് ദിനം. അതായത് തുടർച്ചയായ 4 ദിവസം ബാങ്കുകൾ അടഞ്ഞ് കിടക്കും.

ശ്രദ്ധിക്കേണ്ട കാര്യങ്ങൾ

തുടര്‍ച്ചയായ അവധി ഉപയോക്താക്കളെ സാരമായി ബാധിച്ചേക്കാം. അതിനാല്‍ ബാങ്കിംഗ് സംബന്ധമായ നടപടികളിലൂടെ കടന്നുപോകേണ്ടവര്‍ കാര്യങ്ങള്‍ മുന്‍കൂട്ടി പ്ലാന്‍ ചെയ്യുക. അവധികള്‍ കണ്ട് യാത്രകളും മറ്റും പ്ലാന്‍ ചെയ്തിരിക്കുന്നവര്‍ കൈയ്യില്‍ പണം കരുതുക. കാരണം ഈ അവധികള്‍ ഇന്ത്യ ഒട്ടാകെ ബാധകമാണ്. അതിനാല്‍ എടിഎമ്മുകളും മറ്റും കാലിയാകാനുള്ള സാധ്യത കൂടുതലാണ്. അതോടൊപ്പം തുടര്‍ച്ചയായി അവധി ചെക്ക് ക്ലിയറിങ്, പണം നിക്ഷേപിക്കല്‍, പിന്‍വലിക്കല്‍, ഡ്രാഫ്റ്റുകള്‍, കൗണ്ടര്‍ സേവനങ്ങള്‍ എന്നിവയിലും തടസ്സങ്ങളുണ്ടാക്കും. അതുകൊണ്ടുതന്നെ കാര്യങ്ങൾ നേരത്തെ പ്ലാൻ ചെയ്യേണ്ടത് അത്യാവശ്യമാണ്.

പണിമുടക്കിന് കാരണം

ബാങ്ക് പ്രവര്‍ത്തി ദിനങ്ങള്‍ തിങ്കള്‍ മുതല്‍ വെള്ളി വരെയായി നിശ്ചയിക്കണമെന്നാണ് ബാങ്ക് ജീവനക്കാരുടെ പ്രധാന ആവശ്യം. പക്ഷെ അങ്ങനെ നിശ്ചയിച്ചാൽ അത് പലമേഖലകളേയും പ്രതികൂലമായി ബാധിക്കുമെന്നാണ് വിലയിരുത്തൽ. തിങ്കള്‍ മുതല്‍ വെള്ളി വരെ പ്രവര്‍ത്തി ദിവസം ആക്കുന്ന പക്ഷം പ്രവര്‍ത്തി ദിനങ്ങളില്‍ 40 മിനിറ്റ് അധികമായി ജോലി ചെയ്യാന്‍ തയ്യാറാണെന്ന് ബാങ്ക് ജീവനക്കാരുടെ സംഘടനകള്‍ വ്യക്തമാക്കിയിട്ടുണ്ട്. അങ്ങനെവരുമ്പോള്‍ എല്ലാ ശനിയാഴ്ചയും അവധിയായാലും ആഴ്ചയിലെ മൊത്തം പ്രവര്‍ത്തന മണിക്കൂറില്‍ കുറവുണ്ടാകില്ലെന്ന് അവര്‍ വാദിക്കുന്നു

മറ്റ് അവധി ദിവസങ്ങളും പ്രദേശങ്ങളും

1. ജനുവരി 12 തിങ്കളാഴ്ച - സ്വാമി വിവേകാനന്ദന്‍റെ ജന്മദിനം - പശ്ചിമ ബംഗാളിൽ ബാങ്ക് അവധി

2. ജനുവരി 14 ബുധനാഴ്ച - മകര സംക്രാന്തി / മാഘ ബിഹു - അസം, ഒഡീഷ, അരുണാചൽ പ്രദേശിൽ ബാങ്ക് അവധി

3. ജനുവരി 15 വ്യാഴാഴ്ച - ഉത്തരായന പുണ്യകാല / പൊങ്കൽ / മാഘേ സംക്രാന്തി / മകര സംക്രാന്തി - തമിഴ്നാട്, കർണാടക, ആന്ധ്രപ്രദേശ്, തെലങ്കാന സംസ്ഥാനങ്ങളിൽ ബാങ്ക് അവധി

4. ജനുവരി 16 വെള്ളിയാഴ്ച - തിരുവള്ളുവർ ദിനം - തമിഴ്നാടിൽ ബാങ്ക് അവധി

5. ജനുവരി 17 ശനിയാഴ്ച -ഉഴവർ തിരുനാൾ - തമിഴ്നാടിൽ ബാങ്ക് അവധി

6. ജനുവരി 23 വെള്ളിയാഴ്ച - നേതാജി സുഭാഷ് ചന്ദ്രബോസിൻ്റെ ജന്മദിനം / സരസ്വതി പൂജ / ബസന്ത പഞ്ചമി / വീർ സുരേന്ദ്രസായി ജയന്തി - പശ്ചിമ ബംഗാൾ, ഒഡീഷ, ത്രിപുര സംസ്ഥാനങ്ങളിൽ ബാങ്ക് അവധി