സ്വർണ്ണാഭരണം ഇപ്പോൾ വാങ്ങാം; ജ്വല്ലറികളിൽ മെയ്ക്കിം​ഗ് ചാർജുകൾ വെട്ടിക്കുറക്കുന്നു, കാരണം ഇതാണ്

സ്വർണ വില കുതിച്ചുയരുകയാണ്. ഇനിയും മുന്നോട്ട് ഉയർന്നാൽ സാധാരണക്കാരനെ സംബന്ധിച്ച് സ്വർണം ഒരു ദുസ്വപ്നമായി മാറും. ഇന്ന് പവന് 320 രൂപ വർദ്ധിച്ചതോടെ 58,720 രൂപയായി ഉയർന്നു. സ്വർണം ​ഗ്രാമിന് 7,340 രൂപയാണ്. നിലവിൽ ആ​ഗോള തലത്തിലെ സ്വർണ വില ഉയരുന്നതും യു.എസ് തെരെഞ്ഞെടുപ്പുമായി ബന്ധപ്പെട്ട അനിശ്ചിതത്വവുമാണ് ഇന്ത്യയിൽ സ്വർണ വില ഉയരാൻ കാരണം.

സ്വർണ വ്യാപാരത്തിന്റെ കാര്യത്തിൽ ആഗോളതലത്തിൽ ഏറ്റവും വലിയ രണ്ടാമത്തെ രാജ്യമാണ് ഇന്ത്യ. അനുദിനം സ്വർണ വില മാറ്റമില്ലാതെ വർദ്ധിക്കുന്നത് ഇന്ത്യൻ വിപണിയെ കാര്യമായി ബാധിക്കുന്നുണ്ട്. നിലവിൽ ദീപാവലി പോലുള്ള ഉത്സവ സീസണാണ് വരാനിരിക്കുന്നത്. ഒപ്പം വിവാഹ സീസണും. ഈ സമയത്ത് സ്വർണ വിലയിൽ ഇടിവ് സംഭവിച്ചില്ലെങ്കിൽ സാധാരണക്കാർക്ക് സ്വർണം വാങ്ങുന്നത് ഏറെ ഭാരമേറിയ ചിലവാകും. ഈ വെല്ലുവിളിയെ ചെറുത്തു നിർത്താൻ ചില പുതിയ നടപടികൾ വിവിധ ജ്വല്ലറികൾ അവതരിപ്പിക്കുന്നു.

സ്വർണ വിപണിയിലെ പ്രധാനിയായ ടൈറ്റാൻ

സ്വർണ വിപണിയിലെ ഏറ്റവും പോപ്പുലറായ ബ്രാൻഡാണ് ടൈറ്റാൻ. പ്രധാനമായും സ്വർണം തിരികെ വാങ്ങാനുള്ള പദ്ധതിയിലാണ് ഇവർ ശ്രദ്ധ കേന്ദ്രീകരിച്ചിരിക്കുന്നത്. മാത്രമല്ല കുറഞ്ഞ മേക്കിംഗ് ചാർജ്ജുകളോടെ വരുന്ന ഭാരം കുറഞ്ഞ ആഭരണങ്ങൾ സൃഷ്ടിക്കുന്നതിനും പ്രാധാന്യം നൽകുന്നു. നിലവിൽ ദീപാവലി ആഘോഷങ്ങൾക്ക് സമയമായി. ഇതിനോടനുബന്ധിച്ച് 500 പുതിയ ലൈറ്റ് വെയ്റ്റ് ആഭരണങ്ങളാണ് ടൈറ്റാൻ പുറത്തിറക്കിയത്.

ഈ വിലക്കയറ്റത്തിനിടയിൽ കുറഞ്ഞ നിരക്കിൽ വേറിട്ട ഡിസൈനുകളിലുള്ള ആഭരണങ്ങളിടാൻ സാധിക്കുന്നു. നിങ്ങൾക്ക് ചെറിയ മുൻകൂർ തുക നൽകിയാൽ ഈ ആഭരണങ്ങൾ കുറഞ്ഞ നിരക്കിൽ ബുക്ക് ചെയ്യാം. ഇത് പ്രത്യേക ദീപാവലി ഓഫറിന്റെ ഭാ​ഗമായിട്ടാണ്. സെപ്റ്റംബർ പാദത്തിൽ 25% വളർച്ചയാണ് ബ്രാൻഡിനുണ്ടായത്.

നൂതന തന്ത്രങ്ങളുമായി കല്യാൺ ജ്വല്ലേഴ്സ്

സ്വർണ വില ഉയർന്നു കൊണ്ടിരിക്കുന്നെങ്കിലും കല്യാൺ ജ്വല്ലേഴ്സിന് വമ്പൻ നേട്ടമാണ്. ഈ സാമ്പത്തിക വർഷത്തിലെ രണ്ടാം പാദത്തിൽ 39% വളർച്ചയാണ് കല്യാൺ ജ്വല്ലേഴ്സിനുണ്ടായത്. വരുന്ന പാദത്തിലും ഇതിലും അധികം ഡിമാന്റ് വർദ്ധിക്കുമെന്നാണ് കമ്പനി വിശ്വസിക്കുന്നത്. ഉപഭോക്താവിന്റെ ബജറ്റിന് അനുയോജ്യമായ ആഭരണങ്ങൾ സൃഷ്ടിക്കുവാനും ചെറിയ പട്ടണങ്ങളിൽ 18 കാരറ്റ് സ്വർണ്ണാഭരണങ്ങൾ കൊണ്ട് വരാനും ഇവർ ശ്രദ്ധിക്കുന്നു. ഇതുവഴി നല്ല ലാഭം പ്രതീക്ഷിക്കാം. ഈ കാരണങ്ങളാൽ ആളുകൾക്ക് അവരുടെ ആവശ്യതകൾ നിറവേറ്റാൻ സാധിക്കുന്നു, ഒപ്പം സ്വർണ വിപണി സജീവമായി മുന്നോട്ട് പോവുകയും ചെയ്യുന്നു.

ടൈറ്റാനും കല്യാൺ ജ്വല്ലേഴ്സും...

സ്വർണം സാധാരണക്കാരന് താങ്ങാവുന്നതിലും മുകളിലാവുന്നു. ഈ അവസരത്തിൽ ബഡ്ജറ്റ് ഫ്രണ്ട്‌ലി ഓപ്ഷനുകൾ തിരയുന്നവരാണോ നിങ്ങൾ? എങ്കിൽ ടൈറ്റനും കല്യാൺ ജ്വല്ലേഴ്‌സും ബെസ്റ്റ് ഓപ്ഷനാണ്. ഇവർ ലൈറ്റ് വെയ്റ്റും താരതമ്യേന ചിലവ് കുറഞ്ഞതുമായ ആഭരണങ്ങൾ ഉണ്ടാക്കുന്നു. വിപണിയിൽ പ്രതികൂല സാഹചര്യം നിലനിൽക്കുന്നതിനാൽ ഇത്തരം ബ്രാൻഡുകളിലൂടെ സ്വർണ്ണാഭരണം ഉപയോ​ഗിക്കുവാനുള്ള നിങ്ങളുടെ ആ​ഗ്രഹം പൂർത്തിയാക്കാം.

മെയ്ക്കിം​ഗ് ചാർജ് കുറക്കും....

സ്വർണ വില അപ്രതീക്ഷിതമായ ഉയർച്ചയിലേക്കാണ് മുന്നേറുന്നത്. ഈ ദീപാവലി സീസണിൽ മെയ്ക്കിം​ഗ് ചാർജ് കുറക്കുവാനും കൂടുതൽ ലൈറ്റ് വെയ്റ്റായ ആഭരണങ്ങൾ നൽകാനും ജ്വല്ലറികൾ പദ്ധതിയിടുന്നുണ്ട്. ഇന്ത്യയിൽ പ്രധാന ഉത്സവ സീസണുകളിലെല്ലാം ഇത്തരം ഓഫറുകൾ സാധാരണയായി കൊടുക്കാറുണ്ട്.

സ്വർണ വില ഉയർന്നെങ്കിലും ജനങ്ങളെ സ്വർണ്ണാഭരണങ്ങളിലേക്ക് ആകർഷിക്കാൻ ഇപ്പോഴും ജ്വല്ലറികൾ ശ്രമിക്കുന്നു. കനം കുറഞ്ഞതും പരിശുദ്ധി കുറഞ്ഞതുമായ ആഭരണങ്ങളിലൂടെ സ്വർണ വിപണി ഇപ്പോഴും ശക്തമായി തുടരുന്നു.