ടൈം മാഗസീന്റെ ഏറ്റവും സ്വാധീനമുള്ള 100 കമ്പനികളുടെ പട്ടികയില്‍ ബൈജൂസും ജിയോയും

ദില്ലി: ടൈം മാഗസീന്‍ പുറത്തുവിട്ട ഏറ്റവും സ്വാധീനമുള്ള 100 കമ്പനികളുടെ പട്ടികയില്‍ ഇ ലേണിംഗ് സ്റ്റാര്‍ട്ടപ്പായ ബൈജൂസും റിലയന്‍സ് ഇന്‍ഡസ്ട്രീസിന്റെ ടെക്‌നോളജി വിഭാഗമായ ജിയോയും ഇടം നേടി. ഡിസ്‌റപ്‌റ്റേഴ്‌സ് വിഭാഗത്തിലാണ് ബൈജൂസ് ഇടം നേടിയത്. ഇന്നൊവേറ്റര്‍ വിഭാഗത്തിലാണ് ജിയോ ഇടം നേടിയത്.

അഡിഡാസ്, സൂം, ടിക് ടോക്, മോഡേണ, നെറ്റ്ഫ്‌ളിക്‌സ് തുടങ്ങിയ കമ്പനികള്‍ക്കൊപ്പമാണ് ജിയോ ഇടം നേടിയിരിക്കുന്നത്. വളരെ പെട്ടെന്ന് ഇന്ത്യയിലെ ഉപഭോക്താക്കളുടെ മനസില്‍ ഇടം നേടാന്‍ ജിയോയ്ക്ക് സാധിച്ചിരുന്നു. ഏറ്റവും കുറഞ്ഞ നിരക്കില്‍ ഇന്ത്യയിലെ രാജ്യത്ത് 4 ജി ഡാറ്റ വാഗ്ദാനം ചെയ്തത് ജിയോ ആയിരുന്നു. ലോകത്ത് വമ്പന്‍ കമ്പനികളായ ഫേസ്ബുക്ക് അടക്കമുള്ളവര്‍ ജിയോയില്‍ നിക്ഷേപം നടത്തിയിട്ടുണ്ട്. 2000 കോടി ഡോളറിലധികമാണ് ജിയോ കഴിഞ്ഞ വര്‍ഷം മാത്രം സമാഹരിച്ച നിക്ഷേപം. 4.10 കോടി വരിക്കാര്‍ ഇപ്പോള്‍ ജിയോയ്ക്ക് ഉണ്ട്.

ഹുവാവെ, ടെസ്ല, ഷോപ്പിഫൈ, ഡിഡി ചക്‌സിംഗ് എന്നീ കമ്പനികള്‍ക്കൊപ്പമാണ് ബൈജൂസ് ഇടം നേടിയത്. ഇന്ത്യയില്‍ ഏറ്റവും ലാഭകരമായ സ്റ്റാര്‍ട്ടപ്പ് കമ്പനികളില്‍ ഒന്നാണ് ബൈജൂസ്. കൊവിഡ് കാലത്ത് മാത്രം വലിയ വളര്‍ച്ചയാണ് കമ്പനി നേടിയെടുത്തത്. ആപ്പ് ഉപയോഗിക്കുന്നവരുടെ എണ്ണം എട്ട് കോടിയിലധികം വര്‍ദ്ധിച്ചിരുന്നു. മലയാളിയായ ബൈജു രവീന്ദ്രനാണ് ബൈജൂസിന്റെ സ്ഥാപകന്‍. ടെന്‍സന്റ്, ബ്ലാക്ക് റോക്ക് തുടങ്ങിയ കമ്പനികള്‍ കഴിഞ്ഞ വര്‍ഷം ബൈജൂസില്‍ നിക്ഷേപം നടത്തിയിരുന്നു.