കൊവിഡ് രോഗികള്‍ക്ക് കല്യാണ്‍ ജുവലേഴ്‌സിന്റെ കൈത്താങ്ങ്; പത്ത് ലക്ഷം രൂപയുടെ ചികിത്സാ സഹായം

തൃശൂര്‍: കൊവിഡ് രോഗികള്‍ക്ക് ചികിത്സ സൗകര്യമൊരുക്കി കല്യാണ്‍ ജുവലേഴ്‌സ്. തൃശൂര്‍ അമല ആശുപത്രിയുമായി ചേര്‍ന്ന് 200 കൊവിഡ് രോഗികള്‍ക്കാണ് ചികിത്സാ സൗകര്യം ഒരുക്കുന്നത്. സാമ്പത്തികമായി പിന്നാക്കം നില്‍ക്കുന്ന കൊവിഡ് രോഗികള്‍ക്ക് ചികിത്സ സഹായം ലഭ്യമാക്കുന്ന പദ്ധതിക്ക് പത്ത് ലക്ഷം രൂപയാണ് കല്യാണ്‍ ജുവലേഴ്‌സ് മാറ്റിവച്ചിരിക്കുന്നത്.

അമല ആശുപത്രിയുടെ ഐസിയുവില്‍ ചികിത്സയില്‍ കഴിയുന്ന 20 രോഗികള്‍ക്കും വാര്‍ഡില്‍ ചികിത്സയില്‍ കഴിയുന്ന 180 രോഗികള്‍ക്കുമാണ് സഹായം ലഭ്യമാക്കുന്നത്. അമല ആശുപത്രി നിര്‍ദ്ദേശിക്കുന്ന സാമ്പത്തികമായി പിന്നാക്കം നില്‍ക്കുന്ന കൊവിഡ് രോഗികള്‍ക്ക് അവരുടെ ചികിത്സ ചെലവിന്റെ നിശ്ചിത ശതമാനമാണ് കല്യാണ്‍ ജുവലേഴ്‌സ് നല്‍കുന്നത്.

ഈ മഹാമാരി കാലത്ത് അര്‍ഹരായവര്‍ക്ക് സഹായമെക്കിക്കേണ്ടടത് കടമയായി കരുതുന്നുവെന്ന് കല്യാണ്‍ ജുവലേഴ്‌സ് ചെയര്‍മാനും എംഡിയുമായ ടിഎസ് കല്യാണ രാമന്‍ അറിയിച്ചു. ആതുര സേവന രംഗത്ത് മികച്ച പാരമ്പര്യമുള്ള തൃശൂര്‍ അമല ആശുപത്രിയുമായി ചേര്‍ന്ന് പ്രവര്‍ത്തിക്കുന്നതില്‍ ഏറെ സന്തോഷമുണ്ടെന്നും അദ്ദേഹം വ്യക്തമാക്കി. കൊവിഡ് രോഗികള്‍ക്ക് പിന്തുണ നല്‍കാന്‍ തയ്യാറായ കല്യാണ്‍ ജുവലേഴ്‌സ് മാനേജ്‌മെന്റിനെ അഭിനന്ദിക്കുന്നെന്ന് അമല ആശുപത്രി ഡയറക്ടര്‍ അറിയിച്ചു.