16 വയസ്സിന് താഴെയുള്ള കുട്ടികളെ മൊബൈല്‍ ഫോണ്‍ ഉപയോഗിക്കുന്നതില്‍ നിന്നും വിലക്കാന്‍ കര്‍ണ്ണാടക

കുട്ടികളുടെ അമിത മൊബൈല്‍ ഫോണ്‍ ഉപയോഗം നിങ്ങളെ അലോസപ്പെടുത്താറുണ്ടോ? ഈ ആശങ്കയ്‌ക്കൊരു പരിഹാരവുമായി എത്തിയിരിക്കയാണ് കര്‍ണ്ണാടക സര്‍ക്കാര്‍. 16 വയസ്സിന് താഴെയുള്ള വിദ്യാര്‍ത്ഥികളെ മൊബൈല്‍ ഫോണ്‍ ഉപയോഗിക്കുന്നതില്‍ നിന്നും വിലക്കാന്‍ സംസ്ഥാന സര്‍ക്കാര്‍ ആലോചിക്കുന്നു.

സ്‌ക്കൂളുകളിലും കോളേജുകളിലും മൊബൈല്‍ ഫോണ്‍ വിലക്കുമെന്ന് മുഖ്യമന്ത്രി സിദ്ധരാമയ്യ പറഞ്ഞു. ഇത് സംബന്ധിച്ച് സര്‍വകലാശാലകളിലെ വൈസ് ചാന്‍സലര്‍മാരുടെ അഭിപ്രായം അദ്ദേഹം തേടി. പല സ്ഥാപനങ്ങളും ഗൃഹപാഠം നല്‍കുന്നത് മൊബൈല്‍ ഫോണ്‍ വഴിയായതിനാല്‍ തീരുമാനം കൈക്കൊള്ളുക എളുപ്പമാകില്ല.

വര്‍ദ്ധിച്ചുവരുന്ന സോഷ്യല്‍ മീഡിയ ആസക്തി, വിദ്യാര്‍ത്ഥികളെ പഠനത്തില്‍ പിന്നിലാക്കുന്നതായി മുഖ്യമന്ത്രി ചൂണ്ടിക്കാട്ടി. മൊബൈല്‍ ഫോണ്‍, മയക്കുമരുന്നുപയോഗം വര്‍ദ്ധിപ്പിക്കുകയും വിദ്യാര്‍ത്ഥികളെ മാനസികമായി തകര്‍ക്കുകയും ചെയ്യുന്നു.

ഓസ്‌ട്രേലിയ മാതൃക
ഇക്കാര്യത്തില്‍ ഓസ്‌ട്രേലിയയെയാണ് സംസ്ഥാനം മാതൃകയാക്കുന്നത്. 16 വയസ്സിന് താഴെയുള്ള കുട്ടികളെ സോഷ്യല്‍ മീഡിയ ഉപയോഗിക്കുന്നതില്‍ നിന്നും ഓസ്‌ട്രേലിയ വിലക്കിയിട്ടുണ്ട്.ടിക് ടോക്ക്, എക്സ്, ഫേസ്ബുക്ക്, ഇന്‍സ്റ്റാഗ്രാം, യുട്യൂബ്, സ്നാപ്പ്ചാറ്റ്, ത്രെഡുകള്‍ എന്നിവ ഉപയോഗിക്കാനാണ് വിലക്ക്. സ്‌ക്രീന്‍ സമയം കുറച്ച്, മാനസികാരോഗ്യമുള്ള തലമുറയെ വാര്‍ത്തെടുക്കുകയാണ് ലക്ഷ്യം.
.

കൃത്രിമബുദ്ധിയുടെയും സോഷ്യല്‍ മീഡിയയുടെയും ഉത്തരവാദിത്തപരമായ ഉപയോഗം ഉറപ്പാക്കുമെന്ന് കര്‍ണാടക ഇലക്ട്രോണിക്‌സ്, ഐടി/ബിടി മന്ത്രി പ്രിയങ്ക് ഖാര്‍ഗെ നിയമസഭയെ അറിയിച്ചു. കേന്ദ്രസര്‍ക്കാര്‍ നടത്തിയ സര്‍വേയും ഇക്കാര്യം പറയുന്നു.

നേരത്തെ ആന്ധ്രാപ്രദേശും സമാന നടപടി സ്വീകരിക്കാനൊരുങ്ങിയിരുന്നു. "ഒരു നിശ്ചിത പ്രായം കവിയാത്ത കുട്ടികള്‍ക്ക് പല ഉള്ളടക്കങ്ങളും പൂര്‍ണ്ണമായി മനസ്സിലാകില്ല. ഇത് തെറ്റായ വഴിയിലേയ്ക്ക് അവരെ നയിക്കാന്‍ കാരണമാകും", സ്ഥാന ഐടി മന്ത്രി നര ലോകേഷ് ബ്ലുംബര്‍ഗിനോട് പറഞ്ഞു. ഇക്കാര്യം പഠിക്കുകയാണെന്നും തീരുമാനം ഉടനെയുണ്ടാകുമെന്നും മന്ത്രി പറഞ്ഞു.