കേരളത്തിൽ സ്വ‍ർണ വില വീണ്ടും 37000 കടന്നു, ഇന്നത്തെ സ്വ‍ർണ നിരക്ക് അറിയാം

കേരളത്തിൽ ഇന്നും സ്വർണ വിലയിൽ വ‍‍ർ​ദ്ധനവ്. പവന് 160 രൂപ ഉയർന്ന് 37120 രൂപയാണ് ഇന്നത്തെ സ്വർണ വില. ഒരു ​ഗ്രാമിന് 4640 രൂപയാണ് ഇന്നത്തെ നിരക്ക്. ഡിസംബറിലെ ഏറ്റവും കുറഞ്ഞ സ്വ‍‍ർണ വില ഡിസംബ‍ർ ഒന്നിന് രേഖപ്പെടുത്തിയ പവന് 35920 രൂപയാണ്. ഈ മാസത്തെ ഏറ്റവും ഉയ‍ർന്ന വില ഡിസംബ‍ർ എട്ടിന് രേഖപ്പെടുത്തിയ 37280 രൂപയാണ്.

ആഭ്യന്തര വിപണി

യു‌എസിന്റെ ഉത്തേജക ചർച്ചകളിൽ വഴിത്തിരിവുണ്ടാകുമെന്ന പ്രതീക്ഷയിൽ സ്വർണ്ണത്തിന്റെയും വെള്ളിയുടെയും വില ഇന്ന് ഉയർന്നു. എം‌സി‌എക്‌സിൽ ഫെബ്രുവരി സ്വർണ്ണ ഫ്യൂച്ചറുകൾ 10 ഗ്രാമിന് 0.35 ശതമാനം ഉയർന്ന് 49,770 രൂപയിലെത്തി. സിൽവർ ഫ്യൂച്ചറുകൾ കിലോയ്ക്ക് 1.2 ശതമാനം ഉയർന്ന് 66746 രൂപയിലെത്തി. കഴിഞ്ഞ സെഷനിൽ സ്വർണ്ണ ഫ്യൂച്ചറുകൾ 10 ഗ്രാമിന് 0.33 ശതമാനം അഥവാ 160 രൂപ ഉയർന്നു. വെള്ളി വില കിലോയ്ക്ക് 1.5 ശതമാനം അല്ലെങ്കിൽ 1,000 രൂപ ഉയർന്നു.

ആഗോള വിപണി

ആഗോള വിപണികളിൽ, സ്വർണ്ണ വില ഇന്ന് ഒരാഴ്ചത്തെ ഏറ്റവും ഉയർന്ന നിലയിലെത്തി. സ്പോട്ട് സ്വർണ വില ഔൺസിന് 1,864.36 ഡോളറായി ഉയർന്നു. സാമ്പത്തിക വീണ്ടെടുക്കൽ സുരക്ഷിതമാകുന്നതുവരെ നിരക്ക് കുറയ്ക്കാമെന്ന യുഎസ് ഫെഡറൽ റിസർവിന്റെ പ്രഖ്യാപനം സ്വർണ്ണ നിരക്ക് ഉയരാൻ സഹായിച്ചു.

മറ്റ് ലോഹങ്ങൾ

ഡോളറിന്റെ നിരക്ക് കുറഞ്ഞതാണ് സ്വർണ്ണത്തിന്റെ ഉയർച്ചയെ സഹായിച്ച മറ്റൊരു കാര്യം. യുഎസ് ഡോളർ സൂചിക 0.32 ശതമാനം ഇടിഞ്ഞ് 90.073 ൽ എത്തി. വിലയേറിയ മറ്റ് ലോഹങ്ങളിൽ വെള്ളി വില 0.3 ശതമാനം ഇടിഞ്ഞ് 25.27 ഡോളറിലും പ്ലാറ്റിനം വില 0.3 ശതമാനം ഇടിഞ്ഞ് 1,031.50 ഡോളറിലും പല്ലേഡിയം വില 0.3 ശതമാനം ഉയർന്ന് 2,333.83 ഡോളറിലും എത്തി.

വില വർദ്ധനവ്

സാമ്പത്തിക ഉത്തേജനം, കൊറോണ വൈറസ് നിയന്ത്രണങ്ങൾ എന്നിവ സ്വർണത്തെ പിന്തുണയ്ക്കുന്നതിനാൽ ഇന്ത്യയിൽ സ്വർണ്ണ വില ഈ വർഷം ഇതുവരെ 25% വരെ ഉയർന്നു.