കേരളത്തില്‍ സ്വര്‍ണവില കൂടി, അറിയാം ഇന്നത്തെ പവന്‍, ഗ്രാം നിരക്കുകള്‍

വെള്ളിയാഴ്ച്ച എംസിഎക്‌സ് വിപണിയില്‍ (മള്‍ട്ടി കമ്മോഡിറ്റി എക്‌സ്‌ചേഞ്ച്) 0.15 ശതമാനം വര്‍ധനവോടെ 49,149 രൂപയാണ് 10 ഗ്രാം സ്വര്‍ണം രേഖപ്പെടുത്തിയത്. വെള്ളിയുടെ കിലോ നിരക്കാകട്ടെ, 0.11 ശതമാനം കുറഞ്ഞ് 63,460 രൂപയിലുമെത്തി. കഴിഞ്ഞ സെഷനില്‍ സ്വര്‍ണം 0.3 ശതമാനവും വെള്ളി 0.12 ശതമാനവും ഇടിവ് രേഖപ്പെടുത്തിയിരുന്നു. ആഗോള വിപണിയിലും സ്വര്‍ണവില കൂടിയത് കാണാം. തൊഴിലവസരങ്ങള്‍ കുറയുന്ന സാഹചര്യത്തില്‍ അമേരിക്കന്‍ സമ്പദ്‌വ്യവസ്ഥയുടെ തിരിച്ചുവരവ് ദുഷ്‌കരമാകുമെന്ന വസ്തുത സ്വര്‍ണവിലയെ സ്വാധീനിക്കുന്നു.

നിലവില്‍ 1,836.54 ഡോളറാണ് സ്വര്‍ണം ഔണ്‍സിന് നിരക്ക്. 0.1 ശതമാനം വര്‍ധനവ് വിലയില്‍ സംഭവിച്ചു. മറ്റു വിലയേറിയ ലോഹങ്ങളുടെ കാര്യമെടുത്താല്‍ വെള്ളി ഔണ്‍സിന് 23.94 ഡോളറാണ് ഇപ്പോള്‍ നിരക്ക്. 0.1 ശതമാനം ഇടിവ് വെള്ളി നിരക്കില്‍ പ്രകടം. ഇതേസമയം, പ്ലാറ്റിനത്തിന്റെ വിലനിലവാരം 0.2 ശതമാനം കൂടി. 1,028.71 ഡോളറാണ് പ്ലാറ്റിനം ഔണ്‍സിന് വില. പലേഡിയം ഔണ്‍സിന് നിരക്ക് 2,334.03 ഡോളറും എത്തിനില്‍ക്കുന്നു.

നിലവില്‍ കഴിഞ്ഞ മൂന്നുമാസത്തെ ഏറ്റവും ഉയര്‍ച്ചയിലാണ് അമേരിക്കയിലെ തൊഴിലില്ലായ്മ നിരക്ക്. ഒപ്പം അമേരിക്കന്‍ ഐക്യനാടുകളിലെ കൊവിഡ് വ്യാപനവും സാമ്പത്തിക ഉത്തേജക പാക്കേജിനായി തുടരുന്ന കാത്തിരിപ്പും സ്വര്‍ണവില വര്‍ധിക്കാനുള്ള കാരണങ്ങളാണ്. വ്യാപാര കരാറില്ലാതെത്തന്നെ യൂറോപ്യന്‍ യൂണിയനില്‍ നിന്നും ബ്രിട്ടണ്‍ പുറത്തുപോകുമെന്ന ബോറിസ് ജോണ്‍സണിന്റെ മുന്നറിയിപ്പും സ്വര്‍ണവിലയെ സ്വാധീനിക്കുന്നുണ്ട്. സാമ്പത്തിക ഉത്തേജക പാക്കേജിനെച്ചൊല്ലിയുള്ള അനിശ്വിചത്വത്തില്‍ ആഗോള വിപണിയില്‍ ഡോളറിന് കാലിടറുന്നതും സ്വര്‍ണവില കൂടാനുള്ള കാരണമായി ചൂണ്ടിക്കാട്ടാം.