സ്വർണ വിലയിൽ കനത്ത ഇടിവ്, രാജ്യാന്തര വിലയും താഴേക്ക്: സംഘർഷം നിലച്ചില്ലെങ്കിലും വാങ്ങുന്നവർക്ക് ആവേശം

കേരളത്തിൽ തുടർച്ചയായ രണ്ടാം ദിനത്തിലും സ്വർണ വില ഇടിഞ്ഞു. രാജ്യാന്തര വിലയും വമ്പൻ ഇടിവിലെത്തി. ഇറാനും ഇസ്രായേലും വെടിനിർത്തലിലേക്ക് എത്തുന്നു എന്ന യുഎസ് പ്രസിഡന്റ് ഡോണൾഡ് ട്രംപിൻ്റെ പ്രഖ്യാപനത്തെ തുടർന്നാണ് ഈ ഇടിവ്. സാധാരണയായി ഇത്തരം യുദ്ധ സാഹചര്യങ്ങളിൽ സ്വർണ വില കുതിച്ചുയരുകയാണ് പതിവ്. ഇന്ന് കേരളത്തിലെ സ്വർണം പവന് 600 രൂപ ഇടിഞ്ഞു. ഇന്നലെ വെറും 40 രൂപയായിരുന്നു കുറഞ്ഞത്. ഇന്നും വില ഇടിഞ്ഞതോടെ ആഭരണപ്രേമികൾക്ക് ആവേശമായി. എങ്കിലും ഇന്നും സ്വർണ വില 73,000 തന്നെയാണ് തുടരുന്നത്.

കനത്ത ഇടിവാണ് നിലവിൽ പ്രതീക്ഷിക്കുന്നത്. രണ്ട് ദിവസം കൊണ്ട് പവന് 640 രൂപയും ​ഗ്രാമിന് 80 രൂപയുമാണ് ഇടിഞ്ഞത്. ഈ ആഴ്ചയിൽ ഇനിയും കനത്ത ഇടിവുണ്ടായാൽ സ്വർണ വില 72,000ലേക്ക് വീണേക്കാം.

ഇന്നത്തെ സ്വർണ വില

ഇന്ന് ഒരു ഗ്രാമിന് 75 രൂപ കുറഞ്ഞ് 9155 രൂപയായി. പവന് 600 രൂപ കുറഞ്ഞ് 73,240 രൂപയായി. ഇന്നത്തെ വിലപ്രകാരം 10 ഗ്രാം സ്വർണം വാങ്ങാൻ 91,550 രൂപയാവുന്നു. 24 കാരറ്റ് സ്വർണത്തിന് ഒരു ഗ്രാമിന് 99,87 രൂപയും പവന് 79,896 രൂപയുമാവുന്നു. 18 കാരറ്റിന് ഒരു ഗ്രാമിന് 7491 രൂപയും പവന് 59,928 രൂപയുമാണ്.

ഇന്ന് രാജ്യാന്തര സ്വർണ വിലയും വൻ തകർച്ചയിലാണ്. ഔൺസിന് 3,386 ഡോളറിൽ നിന്ന് 3,351 ഡോളറിലേക്കാണ് രാജ്യാന്തരവില ഇടിഞ്ഞത്. ഇപ്പോൾ സ്പോട്ട് സ്വർണ വില ഔൺസിന് 3,338.05 ഡോളറിലെത്തി. ഇതിൻ്റെ പ്രതിഫലമായാണ് ഇന്ന് കേരളത്തിലും കനത്ത ഇടിവുണ്ടായത്.

Take a Poll

സംഘർഷം ഉടൻ അവസാനിച്ചേക്കാം..

ഇസ്രയേൽ-ഇറാൻ സംഘർഷം അവസാനിക്കുമെന്ന സാധ്യതകളാണ് സ്വർണ വില ഇടിയാനുള്ള വഴിയൊരുക്കിയത്. വെടിനിർത്തലിലേക്ക് ഇരു രാജ്യങ്ങളും എത്തും എന്നായിരുന്നു യുഎസ് പ്രസിഡൻ്റ് ഡൊണാൾഡ് ട്രംപ് വ്യക്തമാക്കിയത്. യുദ്ധം അവസാനിക്കുന്നത് സ്വർണ നിക്ഷേപങ്ങളുടെ ശക്തി ദുർബലാക്കുന്നു. മാത്രമല്ല ഡോളറിന്റെ വീഴ്ചയും ഓഹരി വിപണികളുടെ കുതിപ്പും സ്വർണ വിലക്ക് ഇടിവുണ്ടാക്കി. ഓഹരി വിപണി കുതിച്ചതോടെ രൂപ ഡോളറിനെതിരെ കുതിച്ചുയർന്നതും കേരളത്തിൽ സ്വർണ വില ഇടിയാൻ കാരണം.

എന്നാൽ മറുവശത്ത് സ്വർണ വില കുതിച്ചുയരാനും സാധ്യതയുണ്ട്. യുഎസ് പ്രസിഡന്റ് ഡൊണാൾഡ് ട്രംപും കേന്ദ്ര ബാങ്കായ ഫെഡ് റിസർവിൻ്റെ ചെയർമാൻ ജെറോം പവലും തമ്മിലുള്ള പ്രശ്നം കൂടുതൽ വഷളാവുന്നുണ്ട്. ഇത് ചിലപ്പോൾ സ്വർണ വില കുതിക്കാൻ കാരണമാവും. അതായത് യുഎസിൻ്റെ അടിസ്ഥാന പലിശ നിരക്ക് കുറക്കുവാനുള്ള ട്രംപിൻ്റെ ആവശ്യം ഫെഡ് റിസർവ് ചെയർമാൻ അം​ഗീകരിക്കാത്തതാണ് ഈ തർക്കത്തിന് കാരണം. ഒരുപക്ഷേ പവൽ അടിസ്ഥാന പലിശ നിരക്ക് കുറച്ചാൽ സ്വർണ വില വീണ്ടും കുതിക്കും.

ഇന്ന് സ്വർണാഭരണം വാങ്ങാൻ ഒരു പവന് എത്ര വേണം?

ഇന്ന് 5% പണിക്കൂലി, 3% ജി.എസ്.ടി, ഹോൾമാർക്ക് ചാർജ് (53.10 രൂപ) എന്നിവ ഈടാക്കിയാൽ ഒരു പവൻ സ്വർണാഭരണം വാങ്ങാൻ ഏകദേശം 79,262 രൂപ വേണം. ഒരു ഗ്രാം ആഭരണത്തിന് ഏകദേശം 9,950 രൂപയും കൊടുക്കേണ്ടി വരും. ഇന്ന് സ്വർണ വില ഇടിഞ്ഞതിനാൽ ആഭരണ വിലയും കുറയും. നിലവിൽ സ്വർണാഭരണ വില 80,000 രൂപക്ക് അരികിലാണ്. വീണ്ടും വില ഉയർന്നാൽ പവൻ വില 80,000 കടക്കും. വില കുറഞ്ഞതോടെ ഇന്ന് ജ്വല്ലറികളിൽ തിരക്കേറും.