തുടർച്ചയായ കുതിപ്പിനൊടുവിൽ സ്വർണ വില ബ്രേക്കിട്ടു, കേരളത്തിലും വില ഇടിഞ്ഞു: യുദ്ധം തുടർന്നാൽ വിലയും ഉയരും

സ്വർണ വിലയിൽ ഇടവേള. തുടർച്ചയായ 5 ദിവസത്തിനു ശേഷം സ്വർണ വിലയിൽ ഇന്ന് നേരിയ ഇടിവ്. പവന് 120 രൂപയാണ് ഇന്ന് ഇടിഞ്ഞത്. ഇറാനും ഇസ്രായേലും തമ്മിലുള്ള സംഘർഷങ്ങൾ ശക്തിയാർജ്ജിച്ചതാണ് കഴിഞ്ഞ ദിവസങ്ങളിൽ സ്വർണ വില കുത്തനെ ഉയരാൻ കാരണമായത്. യുദ്ധ സാഹചര്യം അവസാനിച്ചില്ലെങ്കിലും ഇന്ന് രാജ്യാന്തര വിലയും നേരിയ ഇറക്കത്തിലാണ്. ഇതോടെ ആഭരണപ്രേമികൾക്ക് നേരിയ ആശ്വാസം നൽകുന്നു. എന്നിരുന്നാലും സ്വർണ വില പവന് 74,000 തന്നെയാണ് ഇന്നും തുടരുന്നത്.

യുദ്ധങ്ങൾ പോലുള്ള പ്രതിസന്ധികൾ സ്വർണ വില കുതിക്കാൻ ഏറെ സഹായിക്കുന്നു എങ്കിലും അമിതമായ വിലക്കുതിപ്പ് സംഭവിച്ചാൽ നിക്ഷേപകർ വ്യാപകമായി സ്വർണത്തിൽ നിന്നും ലാഭം എടുക്കാനുള്ള സാധ്യതയും കൂടുതലാണ്. അതിനാൽ വില ഇടിയാനും വഴിയൊരുക്കും.

ഇന്നത്തെ സ്വർണ വില

ഇന്ന് ഒരു ഗ്രാമിന് 15 രൂപ കുറഞ്ഞ് 9305 രൂപയായി. പവന് 120 രൂപ കുറഞ്ഞ് 74,440 രൂപയായി. ഇന്നത്തെ വിലപ്രകാരം 10 ഗ്രാം സ്വർണം വാങ്ങാൻ 93,050 രൂപയാവുന്നു. 24 കാരറ്റ് സ്വർണത്തിന് ഒരു ഗ്രാമിന് 10,151 രൂപയും പവന് 81,208 രൂപയുമാവുന്നു. 18 കാരറ്റിന് ഒരു ഗ്രാമിന് 7614 രൂപയും പവന് 60,912 രൂപയുമാണ്.

ഇന്ന് രാജ്യാന്തര സ്വർണ വിലയിൽ നേരിയ ഇടിവുണ്ട്. രാജ്യാന്തര സ്പോട്ട് സ്വർണ വില ഔൺസിന് 3,430.28 ഡോളറിലെത്തി.

Take a Poll

ഇടവേളയെടുത്ത് സ്വർണം, വില ഇനിയും കുതിക്കുമോ?

ഇസ്രയേൽ-ഇറാൻ സംഘർഷം സ്വർണ വിലയെ കാര്യമായി സ്വാധീനിച്ചിട്ടുണ്ട്. കഴിഞ്ഞ വ്യാപാര ദിനമായ ജൂൺ 14 ശനിയാഴ്ച സ്വർണ വില റെക്കോർഡ് ഉയരത്തിൽ എത്തിയിരുന്നു. എന്നാൽ ഇന്ന് നേരിയ ഇടിവുണ്ടായതിനു കാരണങ്ങൾ നിരവധിയാണ്. യുദ്ധം പോലുള്ള പ്രതിസന്ധി ഘട്ടത്തിൽ ആളുകൾ സ്വർണത്തെ ഒരു സുരക്ഷിത നിക്ഷേപമായി കാണുന്നു എന്നതാണ് ഈ സാഹചര്യങ്ങളിൽ സ്വർണത്തിൻ്റെ വില കുതിക്കുന്നത്. എന്നാൽ തുടർച്ചയായി വില കുതിച്ചതോടെ സ്വർണത്തിൽ നിന്ന് ലാഭം എടുത്തതോടെ ഇന്ന് വിലയിൽ നേരിയ ഇടിവുണ്ടായി.

അതായത് സംഘർഷത്തിന് ശമനം ഇല്ലാത്തതിനാൽ ഇന്നത്തെ വിലക്കുറവിൽ ആശ്വസം വേണ്ട എന്നർത്ഥം. യുദ്ധം വീണ്ടും ശക്തിയാർജ്ജിച്ചാൽ സ്വർണ വില അപ്രതീക്ഷിത റെക്കോർഡുകൾ ഭേദിക്കും. മാത്രമല്ല അമേരിക്കയുടെ വരാനിരിക്കുന്ന പണ നയവും നിർണായകമാണ്. നിലവിൽ പലിശ കുറയില്ലെന്നാണ് വിദ​ഗ്ധർ പറയുന്നത്. എന്നാൽ ഏറ്റവും പുതിയ പണപ്പെരുപ്പ റിപ്പോർട്ട് പരി​ഗണിച്ചാൽ പലിശ നിരക്ക് കുറക്കാനും സാധ്യതയുണ്ട്.

യുഎസിൻ്റെ റിപ്പോ നിരക്ക് കുറച്ചാൽ സ്വർണ വില ​ഗണ്യമായി കുതിക്കും. മറുവശത്ത് യുഎസിൻ്റെ കടപ്പത്രങ്ങളും, ഡോളറും തളരും. ഇത് കേരളത്തിലും പ്രതിഫലിക്കുകയും സ്വർണ വില കത്തിക്കയറുകയും ചെയ്യും.

ഇന്ന് സ്വർണാഭരണം വാങ്ങാൻ എത്ര രൂപ വേണം?

ഇന്ന് 5% പണിക്കൂലി, 3% ജി.എസ്.ടി, ഹോൾമാർക്ക് ചാർജ് (53.10 രൂപ) എന്നിവ ഈടാക്കിയാൽ ഒരു പവൻ സ്വർണാഭരണം വാങ്ങാൻ ഏകദേശം 80,559 രൂപ വേണം. ഒരു ഗ്രാം ആഭരണത്തിന് ഏകദേശം 9,823 രൂപയും കൊടുക്കേണ്ടി വരും. 5 മുതൽ 35 ശതമാനം വരെയാണ് പണിക്കൂലി സാധാരണയായി കണക്കാക്കുന്നത്. ഇവിടെ മിനിമം 5 ശ‌തമാനം മാത്രമാണ് കണക്കാക്കിയത്, അതിനാൽ ആഭരണ വില ഇതിലും ഉയർന്നേക്കാം. എങ്കിലും ഒരു പവൻ വാങ്ങാൻ 80,000 രൂപയ്ക്ക് മുകളിൽ കരുതേണ്ടി വരും.