തിളക്കം മങ്ങാതെ! സംസ്ഥാനത്ത് സ്വർണ വില ഇന്നും മുന്നേറ്റത്തിൽ, പവൻ 73,000 കടന്നു: താരിഫ് യുദ്ധം പിടിവള്ളിയായി

സാധാരണക്കാർക്കും ആഭരണപ്രേമികൾക്കും തിരിച്ചടിയായി ഇന്നും കേരളത്തിൽ സ്വർണ വില ഉയർന്നു. ഇതോടെ വീണ്ടും പവൻ വില 73,000 കടന്നിരിക്കുന്നു. നേരിയ ആശ്വാസം പോലുമില്ലാതെയാണ് ഇന്നു കത്തിക്കയറിയത്. ഒറ്റയടിക്ക് പവന് 520 രൂപ ഇന്ന് ഉയർന്നിട്ടുണ്ട്. ഡൊണാൾഡ് ട്രംപിൻ്റെ ഇറക്കുമതിച്ചുങ്ക നയം താരിഫ് യുദ്ധത്തിലേക്ക് തന്നെയാണ് എത്തുന്നത്. രാജ്യങ്ങൾക്കിടയിൽ പ്രതിസന്ധി ഉയർന്നാൽ തീർച്ചയായും അത് സ്വർണത്തിന് ഉയരാനുള്ള പ്രധാന കാരണമാവും. തുടർച്ചയായ മൂന്ന് ദിവസം കൊണ്ട് പവന് 1,120 രൂപയും ​ഗ്രാമിന് 140 രൂപയുമാണ് കുതിച്ചത്.

ഇന്നത്തെ സ്വർണ വില

ഇന്ന് ഒരു ഗ്രാമിന് 65 രൂപ വർദ്ധിച്ച് 9140 രൂപയായി. ഒരു പവന് 520 രൂപ വർദ്ധിച്ച് 73,120 രൂപയുമായി. ഇന്നത്തെ വിലപ്രകാരം 10 ഗ്രാം സ്വർണം വാങ്ങാൻ 91,400 രൂപയാവുന്നു. 24 കാരറ്റ് സ്വർണത്തിന് ഒരു ഗ്രാമിന് 9971 രൂപയും 8 ​ഗ്രാമിന് 79,768 രൂപയുമാവുന്നു. 18 കാരറ്റിന് ഒരു ഗ്രാമിന് 7479 രൂപയും 8 ​ഗ്രാമിന് 59,832 രൂപയുമാണ്.

ഇന്ന് രാജ്യാന്തര വിലയും മുന്നേറുന്നു. താരിഫ് പ്രശ്നങ്ങൾ ശക്തമാവുന്നതാണ് രാജ്യാന്തര വിലക്കും കരുത്തേകുന്നത്. രാജ്യാന്തര സ്പോട്ട് സ്വർണ വില ഔൺസിന് 3,355.95 ഡോളറിലെത്തി. വെള്ളി വിലയും നേട്ടത്തിലെത്തി.

Take a Poll

സ്വർണത്തിൻ്റെ കുതിച്ചു ചാട്ടം, പിന്നിൽ താരിഫ് യുദ്ധവും

താരിഫ് യുദ്ധം കടുക്കുന്നതോടെ സ്വർണത്തിന് ശക്തിയാർജ്ജിക്കുന്നു. സ്വർണ വില ഓരോ ദിവസവും വർദ്ധിക്കുന്നതിനു കാരണം താരിഫ് നയങ്ങൾ കൂടുതൽ വഷളാവുന്നതാണ്. മാത്രമല്ല ഡോളർ കൂപ്പു കുത്തിയതും ഈ വിലക്കയറ്റത്തിന് ഒരു പ്രധാന കാരണമായി മാറി. എന്നാൽ ഇതിനിടയിൽ യുഎസിൻ്റെ അടിസ്ഥാന പലിശ നിരക്ക് കൂടെ കുറഞ്ഞാൽ ചിലപ്പോൾ പവന് 75,000 രൂപ കടക്കാനും സാധ്യതയുണ്ട്.

സ്വർണാഭരണം വാങ്ങാൻ എത്ര രൂപ വേണം?

ഇന്നും വില കുതിക്കുന്നു. സ്വർണാഭരണം വാങ്ങണമെങ്കിൽ അതിൻ്റെ വില കണക്കാക്കുന്നത് പണിക്കൂലി, ജിഎസ്ടി, ഹാൾമാർക്ക് ചാർജ് എന്നിവയും ചേരുമ്പോഴാണ്. അങ്ങനെയെങ്കിൽ ഇന്നത്തെ സ്വർണ വിലക്കൊപ്പം 5% പണിക്കൂലി, 3% ജി.എസ്.ടി, ഹോൾമാർക്ക് ചാർജ് (53.10 രൂപ) എന്നിവ ഈടാക്കിയാൽ ഒരു പവൻ സ്വർണാഭരണം വാങ്ങാൻ ഏകദേശം 79,130 രൂപ വേണം. ഒരു ഗ്രാം ആഭരണത്തിന് ഏകദേശം 9,930 രൂപയും കൊടുക്കേണ്ടി വരും. പണിക്കൂലി വർദ്ധിച്ചാൽ ആഭരണ വിലയും ഉയരും. നിലവിലെ കണക്ക് അനുസരിച്ച് 80,000 രൂപയോളം 22 കാരറ്റ് പവന് കണക്കാക്കണം.

നിക്ഷേപങ്ങളാണോ മികച്ച ഓപ്ഷൻ?

സ്വർണ വില കുതിക്കുന്നതോടെ ആഭരണം വാങ്ങുവാനുള്ള സാധാരണക്കാരുടെ മോഹവും മങ്ങുന്നു. എന്നാൽ ഇതോടെ സ്വർണം വാങ്ങാനുള്ള ആ​ഗ്രഹം അവസാനിപ്പിക്കണ്ട. ഏറ്റവും ഉയർന്ന നേട്ടത്തോടെ വിവിധ സ്വർണ നിക്ഷേപങ്ങളിൽ നിക്ഷേപിക്കുന്നത് പരി​ഗണിക്കുക. എങ്കിൽ നിശ്ചിത കാലത്തിനുള്ള ഉയർന്ന ലാഭം കൊയ്യാനാവും. അതിലൂടെ സ്വർണം വാങ്ങാനും സാധിക്കും.