പൊന്നിന് വില കുതിക്കുന്നു; അറിയാം ഇന്നത്തെ സ്വര്‍ണം, വെള്ളി നിരക്കുകള്‍

കൊച്ചി: കേരളത്തില്‍ സ്വര്‍ണവില കുതിക്കുകയാണ്. ചൊവാഴ്ച്ച പവന് 80 രൂപയും ഗ്രാമിന് 10 രൂപയും കൂടി. ഇതോടെ പവന് 35,520 രൂപയും ഗ്രാമിന് 4,440 രൂപയുമായി ഇന്നത്തെ സ്വര്‍ണ നിരക്ക്. മൂന്ന് ദിവസത്തെ ഇടവേളയ്ക്ക് ശേഷമാണ് സംസ്ഥാനത്ത് സ്വര്‍ണവില വര്‍ധിക്കുന്നത്. ജൂണില്‍ സ്വര്‍ണം രേഖപ്പെടുത്തിയ ഏറ്റവും ഉയര്‍ന്ന വിലനിലവാരം പവന് 36,960 രൂപയാണ് (ജൂണ്‍ 3). ഏറ്റവും കുറഞ്ഞ വിലനിലവാരം 35,000 രൂപയും (ജൂണ്‍ 30). കഴിഞ്ഞ മാസം സ്വര്‍ണം പവന് 1,960 രൂപ കുറഞ്ഞിരുന്നു.

മുന്‍ മാസങ്ങളിലെ ചിത്രം വിലയിരുത്തിയാല്‍ മെയ്യിലും (1,680 രൂപ) ഏപ്രിലിലും (1,720 രൂപ) സ്വര്‍ണത്തിന് വിലകൂടുകയാണുണ്ടായത്. ഇതേസമയം, മാര്‍ച്ചില്‍ 1,560 രൂപയും ഫെബ്രുവരിയില്‍ 2,640 രൂപയും പവന് വില കുറഞ്ഞിരുന്നു. സംസ്ഥാനത്തെ വെള്ളി നിരക്കിലും ഇന്ന് മാറ്റമുണ്ട്. 1 ഗ്രാം വെള്ളിക്ക് 70.30 രൂപയാണ് ചൊവാഴ്ച്ച വില. 8 ഗ്രാം വെള്ളിക്ക് വില 562.40 രൂപ.

ഇന്ത്യയിലെ പ്രധാന നഗരങ്ങളിലെ സ്വര്‍ണവില ചുവടെ കാണാം (8 ഗ്രാം 22 കാരറ്റ് സ്വര്‍ണം).

• ബെംഗളൂരു: പവന് 35,520 രൂപ
• ചെന്നൈ: പവന് 35,920 രൂപ
• ദില്ലി: പവന് 37,208 രൂപ
• ഹൈദരാബാദ്: പവന് 35,520 രൂപ
• കൊല്‍ക്കത്ത: പവന് 37,536 രൂപ
• ലഖ്‌നൗ: പവന് 36,208 രൂപ
• മുംബൈ: പവന് 37,152 രൂപ
• സൂറത്ത്: പവന് 37,448 രൂപ

ഇന്ന് ദേശീയ വിപണിയില്‍ സ്വര്‍ണവില ഉയര്‍ന്നിട്ടുണ്ട്. പ്രമുഖ ചരക്ക് വ്യാപാര കേന്ദ്രമായ എംസിഎക്സില്‍ (മള്‍ട്ടി കമ്മോഡിറ്റി എക്സ്ചേഞ്ച്) 10 ഗ്രാമിന് 47,445 രൂപയാണ് സ്വര്‍ണം വില കുറിക്കുന്നത് (0.3 ശതമാനം നേട്ടം). വെള്ളിയിലും കാണാം ഉണര്‍വ്. കിലോയ്ക്ക് 70,254 രൂപ നിരക്കില്‍ വെള്ളി വ്യാപാരം പുരോഗമിക്കുന്നു (0.3 ശതമാനം നേട്ടം). ഇന്നലെ സ്വര്‍ണം 0.11 ശതമാനം നേട്ടവും വെള്ളി 0.18 ശതമാനം തകര്‍ച്ചയുമാണ് രേഖപ്പെടുത്തിയത്.

ഇന്ന് രാജ്യാന്തര വിപണിയിലും സ്വര്‍ണം നില മെച്ചപ്പെടുത്തി. കഴിഞ്ഞ രണ്ടാഴ്ച്ചക്കിടയിലുള്ള ഏറ്റവും ഉയര്‍ന്ന നിലയിലാണ് സ്വര്‍ണം ഇപ്പോഴുള്ളത്. ഔണ്‍സിന് 1,792.34 ഡോളര്‍ എന്ന നിലയില്‍ സ്വര്‍ണ വ്യാപാരം ചൊവാഴ്ച്ച പുരോഗമിക്കുന്നു. ദുര്‍ബലമായ ഡോളര്‍ സൂചിക സ്വര്‍ണത്തിന് മുന്നേറാനുള്ള അവസരമാണ് നല്‍കുന്നത്.

രാജ്യാന്തര വിപണിയില്‍ ഇന്ന് വെള്ളി നേരിയ തകര്‍ച്ച കുറിക്കുന്നുണ്ട്. വെള്ളിയുടെ ഔണ്‍സ് വില 0.1 ശതമാനം ഇടിഞ്ഞ് 26.44 ഡോളറില്‍ തുടരുന്നു. ഇതേസമയം, പ്ലാറ്റിനം വില 0.5 ശതമാനം ഉയര്‍ന്ന് 1,102.56 ഡോളറിലെത്തി.