ഇനിയൊരു തിരിച്ചു പോക്കില്ല, സ്വർണ വില സർവ്വകാല റെക്കോർഡിൽ: ട്രംപിൻ്റെ താരിഫ് നയങ്ങൾ പൊന്നിന് കരുത്തേകി

ആഭരണപ്രേമികളേ.... ഇന്നും പ്രതീക്ഷകളെ കാറ്റിൽ പറത്തി സ്വർണ വില പുത്തൻ റെക്കോർഡിൽ എത്തി. 65,000ൽ നിന്നും വീണ്ടും 66,000ലേക്ക് കുത്തനെ കുതിച്ചു. പവന് 840 രൂപയാണ് ഇന്ന് ഒറ്റ ദിവസം കൊണ്ട് ഉയർന്നത്. ഇതോടെ ആഭരണപ്രേമികൾക്കും വിവാഹ പാർട്ടികൾക്കും നിരാശയായി. രാജ്യാന്തര വിപണിയിലെ മാറ്റങ്ങളാണ് ഇന്ത്യയിൽ സ്വർണ വില കുതിക്കാൻ കാരണമായത്. ആഗോള വ്യാപാര യുദ്ധ ഭീഷണിയും സ്വർണ വിലക്ക് മാറ്റ് കൂട്ടുന്നുണ്ട്. ഇന്ന് സ്വർണം വാങ്ങാൻ ആരെല്ലാം ജ്വല്ലറികളിലേക്ക് പോവുന്നുണ്ട്?

ഇന്നത്തെ സ്വർണ വില

ഇന്ന് ഒരു ഗ്രാമിന് 105 രൂപ വർദ്ധിച്ച് 8340 രൂപയായി. പവന് 840 രൂപ വർദ്ധിച്ച് 66,720 രൂപയായി. ഇന്നത്തെ വിലപ്രകാരം 10 ഗ്രാം സ്വർണം വാങ്ങാൻ 83,400 രൂപയാവുന്നു. 24 കാരറ്റ് സ്വർണത്തിന് ഒരു ഗ്രാമിന് 9098 രൂപയും പവന് 72,784 രൂപയുമാവുന്നു. 18 കാരറ്റിന് ഒരു ഗ്രാമിന് 6824 രൂപയും പവന് 54,592 രൂപയുമാണ്.

രാജ്യാന്തര സ്പോട്ട് സ്വർണ വില ഔൺസിന് ഇന്ന് 3,073.8 ഡോളറിലാണ് വ്യാപാരം നടക്കുന്നത്. സ്വർണ വില ശക്തിയാർജ്ജിക്കുന്നതിന് നിരവധി കാരണങ്ങളുണ്ട്. അതിൽ പ്രധാനപ്പെട്ടതാണ് യു.എസ് പ്രസിഡൻ്റ് ഡൊണാൾഡ് ട്രംപിൻ്റെ ഇറക്കുമതി താരിഫ് നയങ്ങൾ. ഏപ്രിൽ 2ന് ഇതുമായി ബന്ധപ്പെട്ട വലിയൊരു പ്രഖ്യാപനം നടക്കും. അതിനാൽ സ്വർണ വില ഇനിയും കുതിക്കാൻ സാധ്യതയുണ്ട്.

സ്വർണ വില കുതിക്കുന്നു...

യു.എസ് പ്രസിഡൻ്റ് ഡൊണാൾഡ് ട്രംപിൻ്റെ വിദേശ വാഹന ഇറക്കുമതി താരിഫ് 25% എന്ന നിരക്കിലേക്ക് ഉയർത്തിയതോടെ ആ​ഗോള വിപണിയിൽ വലിയ പ്രതിസന്ധികൾ ഉണ്ടായി. യു.എസിൽ വാഹനങ്ങളുടെ വില ഉയരുന്നതിനൊപ്പം കമ്പനികളുടെ വിൽപനയും വരുമാനവുമെല്ലാം നഷ്ടത്തിലേക്ക് എത്തും. ഈ സാഹചര്യങ്ങൾ സ്വർണ വില കുതിക്കാനുള്ള കാരണങ്ങളാവുന്നു. മാത്രമല്ല താരിഫ് ശക്തമാക്കിയതോടെ ഡോളർ ഇടിഞ്ഞതും സ്വർണത്തിന് കരുത്തായി. എന്നാൽ രൂപയുടെ മൂല്യം അൽപം ഉയർന്നു. അല്ലായിരുന്നെങ്കിൽ ഇതിലും ശക്തമായി സ്വർണം കുതിച്ചേനെ.

സ്വർണം ശക്തിയാർജ്ജിച്ചതോടെ സ്വർണ നിക്ഷേപങ്ങളിലേക്കുള്ള ആളുകൾ ഒഴുക്ക് വർദ്ധിച്ചു. ട്രംപിൻ്റെ ഈ താരിഫ് നയങ്ങൾ അമേരിക്കയുടെ സമ്പദ് വ്യവസ്ഥയെ തകിടം മറിക്കും. ഇത് പണപ്പെരുപ്പം വർദ്ധിക്കാനുള്ള പ്രധാന കാരണമാവും. പൊതുവേ യു.എസിൻ്റെ സാമ്പത്തിക രം​ഗം മാന്ദ്യത്തിലാണ്. 

ഇന്ന് സ്വർണാഭരണം വാങ്ങാൻ എത്ര രൂപ വേണം?

പണിക്കൂലി, 3% ജി.എസ്.ടി, ഹോൾമാർക്ക് ചാർജ് (53.10 രൂപ) എന്നിവ ചേരുമ്പോൾ ഒരു പവൻ സ്വർണാഭരണം വാങ്ങാൻ ഏകദേശം 72,215 രൂപ വേണം. ഒരു ഗ്രാം ആഭരണത്തിന് ഏകദേശം 9,030 രൂപ കൊടുക്കേണ്ടി വരും. 5% പണിക്കൂലിയിലാണ് ഈ വില കണക്കാക്കുന്നത്. എന്നാൽ 30 ശതമാനം വരെ പണിക്കൂലി ഉയരാൻ സാധ്യതയുണ്ട്. ഇന്നത്തെ ആഭരണത്തിൻ്റെ വില അപ്രതീക്ഷിതമായ കയറ്റത്തെയാണ് സൂചിപ്പിക്കുന്നത്. നിലവിൽ രാജ്യാന്തര വിലയിൽ കുതിപ്പ് തുടർന്നാൽ സ്വർണ വില 70,000ലേക്ക് എത്തും. അതായത് ആഭരണത്തിൻ്റെ വില 75,000 ഭേദിക്കുമെന്ന് അർത്ഥം. 

സ്വർണം വാങ്ങുന്നുണ്ടോ?

സ്വർണം എല്ലാ കാലത്തും സുരക്ഷിതമായ നിക്ഷേപമാണ്. അതിനാൽ ലാഭം ഉറപ്പാക്കാം. ​ഗോൾഡ് ഇ.ടി.എഫ് പോലുള്ള നിക്ഷേപങ്ങളിലൂടെ വലിയ ലാഭം ലഭിക്കും. സ്വർണാഭരണം വാങ്ങുന്നത് സാധാരണക്കാരനെ സംബന്ധിച്ച് ഏറെ പ്രയാസകരമായ കാര്യമാണ്. സ്വർണ നിക്ഷേപങ്ങളിൽ നിന്ന് ലാഭം നേടിയിൽ ഭാവിയിൽ സ്വർണം വാങ്ങാനും സാധിക്കും.