മിണ്ടാത്തതെന്തെ, കിളിപ്പൊന്നേ! സംസ്ഥാനത്ത് സ്വർണ വില മാറ്റമില്ലാതെ തുടരുന്നു, രാജ്യാന്തര വിലയിലും നഷ്ടം

സ്വർണത്തിന് ഇന്ന് അനക്കമില്ല. ഇന്നലെ നേരിയ ഇടിവുണ്ടായ സ്വർണ വില ഇന്ന് മാറ്റമില്ലാതെ തുടരുന്നു. ഇത് ആഭരണപ്രേമികൾക്ക് വലിയ ആശ്വാസമാവുന്നു. ചിങ്ങ മാസത്തിലേക്ക് എത്തുന്നതോടെ സ്വർണം വാരിക്കൂട്ടാനുള്ള ആവേശം എല്ലാ മലയാളികൾക്കും ഉണ്ടായിരിക്കും. എന്നാൽ നിലവിലെ സ്വർണ വില അൽപം പേടിപ്പെടുത്തുന്നതാണ്. ഇന്നലെ പവന് 40 രൂപയാണ് കുറഞ്ഞത്. കേരളത്തിൽ വില മാറ്റമില്ലാതെ തുടരുന്നുണ്ടെങ്കിലും രാജ്യാന്തര വില വമ്പൻ കുതിപ്പിലേക്ക് ഉയർന്നിരുന്നു. ഇപ്പോൾ അൽപം കുറഞ്ഞിട്ടുണ്ട്.

ഇന്നത്തെ സ്വർണ വില

ഇന്ന് ഒരു ഗ്രാമിന് 9290 രൂപയും, ഒരു പവന് 74,320 രൂപയുമായി നിലനിൽക്കുന്നു. ഇന്നത്തെ വിലപ്രകാരം 10 ഗ്രാം സ്വർണം വാങ്ങാൻ 92,900 രൂപയാവുന്നു. 24 കാരറ്റ് സ്വർണത്തിന് ഒരു ഗ്രാമിന് 10,135 രൂപയും പവന് 81,080 രൂപയുമാവുന്നു. 18 കാരറ്റിന് ഒരു ഗ്രാമിന് 7601 രൂപയും പവന് 60,808 രൂപയുമാണ്.

രാജ്യാന്തര സ്വര്‍ണ വില ഇന്ന് 3,374 ഡോളർ വരെ ഉയ‍ർന്നിരുന്നെങ്കിലും പിന്നീട് താഴ്ന്നു. ഇന്ന് സ്പോട്ട് സ്വർണ വില ഔൺസിന് 3,361.01 ഡോളറിലെത്തി. വെള്ളി വിലയിൽ മുന്നേറ്റം തുടരുന്നു. ആ​ഗോള തലത്തിലെ മാറ്റങ്ങളാണ് ഇന്നത്തെ ചാഞ്ചാട്ടത്തിന് കാരണമായത്. ഇതോടെ ഡോളർ മൂല്യം ഇടിഞ്ഞിട്ടുണ്ട്.

Take a Poll

സ്വർണ വില നഷ്ടത്തിലാണോ?

ഇന്ന് രാജ്യാന്തര വില കുതിച്ചിരുന്നെങ്കിലും പിന്നീട് വില കുറ‍ഞ്ഞതാണ് കേരളത്തിൽ സ്വർണ വില മാറ്റമില്ലാതെ തുടരാൻ കാരണമായത്. ഏറ്റവും പുതിയ റിപ്പോർട്ട് പ്രകാരം അമേരിക്കയുടെ പണപ്പെരുപ്പം കുറഞ്ഞിട്ടുണ്ട്. ഇത് യുഎസിൻ്റെ അടിസ്ഥാന പലിശ നിരക്ക് കുറക്കാൻ കാരണമാവും. ഈ ആവശ്യം ഫെഡറൽ റിസർവ് ചെയർമാനോട് ഡൊണാൾഡ് ട്രംപ് വ്യക്തമാക്കിക്കഴിഞ്ഞു. പലിശ നിരക്ക് കുറഞ്ഞാൽ സ്വർണ വില കത്തിക്കയറും. ഇത് ഇന്ത്യയിലും വില ഉയരാൻ വഴിയൊരുക്കും. അതിനാൽ ഒരു ശക്തമായ വിലക്കയറ്റം എപ്പോൾ വേണമെങ്കിലും പ്രതീക്ഷിക്കാം.

നിലവിൽ യുക്രൈയിൻ-റഷ്യ യുദ്ധം അവസാനിക്കുവാൻ പുട്ടിൻ- ട്രംപ് സമാധാന ചർച്ച നടക്കുന്നു. ചർച്ച വിജയിച്ചാൽ സ്വർണ വില ഇടിയും. എന്നാൽ മറിച്ചാണെങ്കിൽ സ്വർണ വില ശക്തമായി ഉയരും.

സ്വർണാഭരണം വാങ്ങാൻ ഇന്ന് എത്ര രൂപ ആവശ്യമുണ്ട്?

ഇന്ന് സ്വർണ വില മാറ്റിമില്ലാതെ തുടരുന്നതിനാൽ ആഭരണ വിലയിലും കാര്യമായ മാറ്റമില്ല. 5% പണിക്കൂലി, 3% ജി.എസ്.ടി, ഹോൾമാർക്ക് ചാർജ് (53.10 രൂപ) എന്നിവ കണക്കാക്കിയാൽ ഇന്ന് ഒരു പവൻ ആഭരണം വാങ്ങാൻ ഏകദേശം 80,400 രൂപ നൽകേണ്ടി വരും. മാത്രമല്ല ഒരു ഗ്രാം ആഭരണത്തിന് ഏകദേശം 10,090 രൂപയും കരുതേണ്ടി വരും. ഇവിടെ മിനിമം 5 ശതമാനം പണിക്കൂലിയാണ് ഈടാക്കിയത്. എന്നാൽ ഇന്നത്തെ മാറ്റമില്ലാത്ത വിലയിൽ അമിതമായി ആശ്വസിക്കേണ്ട. സ്വർണ വില ഇനി കുതിച്ചുയരുമെന്നാണ് നിലവിലെ കണക്കുകൾ സൂചിപ്പിക്കുന്നത്. അങ്ങനെയെങ്കിൽ പവന് 90,000 രൂപ വരെ എത്താൻ സാധ്യതയുണ്ട്.