പെൺകുട്ടികൾക്ക് വിദേശ വിദ്യാഭ്യാസം; 3 ശതമാനം മുതൽ പലിശ നിരക്കിൽ സർക്കാർ വായ്പ

ഇന്നത്തെ കാലത്ത് വ്യക്തിപരവും തൊഴിൽപരവുമായ വളർച്ചയ്ക്ക് വിദ്യാഭ്യാസം മാറ്റിനിർത്താൻ സാധിക്കുന്ന ഒന്നല്ല. എന്റിനേറെ പറയുന്നു അതിജീവനം പോലും വിദ്യാഭ്യാസത്തിൽ അധിഷ്ഠിതമായ കാലഘട്ടത്തിൽ ഉന്നത വിദ്യാഭ്യാസം വലിയ പ്രാധാന്യമർഹിക്കുന്നുണ്ട്. എന്നാൽ വർധിച്ചുവരുന്ന വിദ്യാഭ്യാസ ചെലവുകൾ പലപ്പോഴും പെൺകുട്ടികളെ അവരുടെ ഉന്നത വിദ്യാഭ്യാസ ആഗ്രഹങ്ങളിൽ നിന്ന് പിന്നോട്ടടിക്കുന്നു. ഇത്തരത്തിൽ പിന്നോക്ക വിഭാഗങ്ങൾ, ന്യൂനപക്ഷ സമുദായങ്ങൾ, പട്ടികജാതി, പട്ടികവർഗ വിഭാഗങ്ങളിൽ നിന്നുള്ള വിദ്യാർത്ഥികളെ പിന്തുണയ്ക്കുന്നതിനായി, കേരള സംസ്ഥാന വനിതാ വികസന കോർപ്പറേഷൻ അഥവ കെ.എസ്.ഡബ്ല്യൂ.ഡി.സി അനുകൂലമായ നിബന്ധനകളോടെ വിദ്യാഭ്യാസ വായ്പകൾ വാഗ്ദാനം ചെയ്യുന്നു. ഇന്ത്യയിലും വിദേശത്തും വിദ്യാർത്ഥികളുടെ അക്കാദമിക് സ്വപ്നങ്ങൾ സാക്ഷാത്കരിക്കാൻ ഈ വായ്പകൾ സഹായിക്കുന്നു.

നാഷണൽ മൈനോറിറ്റീസ് ഡെവലപ്‌മെന്റ് & ഫിനാൻസ് കോർപ്പറേഷന്റെ (എൻഎംഡിഎഫ്സി) രണ്ട് ക്രെഡിറ്റ് ലൈനുകൾക്ക് കീഴിൽ കേരള സംസ്ഥാന വനിതാ വികസന കോർപ്പറേഷൻ വിദ്യാഭ്യാസ വായ്പകൾ വാഗ്ദാനം ചെയ്യുന്നുണ്ട്. ക്രെഡിറ്റ് ലൈൻ 1 പ്രകാരം, 98,000 രൂപ വരെ കുടുംബ വരുമാനമുള്ള ഗ്രാമീണ മേഖലയിലെ വിദ്യാർത്ഥികൾക്കും 1,20,000 രൂപ വരെ കുടുംബ വരുമാനമുള്ള നഗര വിദ്യാർത്ഥികൾക്കും അപേക്ഷിക്കാം. അവർക്ക് ഇന്ത്യയിൽ പഠിക്കാൻ 20 ലക്ഷം രൂപ വരെയും വിദേശത്ത് പഠിക്കാൻ 30 ലക്ഷം രൂപ വരെയും 3 ശതമാനം പലിശ നിരക്കിൽ ലഭിക്കും. തിരിച്ചടവ് കാലാവധി അഞ്ച് വർഷമാണ്.

ക്രെഡിറ്റ് ലൈൻ 2-ന് കീഴിൽ, 8 ലക്ഷം രൂപ വരെ കുടുംബ വാർഷിക വരുമാനമുള്ള ന്യൂനപക്ഷ സമുദായങ്ങളിൽ നിന്നുള്ള വിദ്യാർത്ഥികൾക്ക് അർഹതയുണ്ട്. അവർക്ക് ഇന്ത്യയിൽ പഠിക്കുന്നതിന് 20 ലക്ഷം രൂപയും വിദേശത്ത് പഠിക്കുന്നതിന് 30 ലക്ഷം രൂപയും ലഭിക്കും. ഈ സ്കീമിന് കീഴിലുള്ള പലിശ നിരക്ക് 5 ശതമാനം ആണ്, തിരിച്ചടവ് കാലയളവ് ഇവിടെയും അഞ്ച് വർഷമാണ്.

നാഷണൽ ബാക്ക്‌വേർഡ് ക്ലാസ് ഫിനാൻസ് & ഡെവലപ്‌മെന്റ് കോർപ്പറേഷന്റെ (എൻബിസിഎഫ്‌ഡിസി) സഹായത്തോടെ കേരള സംസ്ഥാന വനിതാ വികസന കോർപ്പറേഷൻ പിന്നാക്ക വിഭാഗ സമുദായത്തിലെ വിദ്യാർത്ഥികൾക്ക് വിദ്യാഭ്യാസ വായ്പ നൽകുന്നുണ്ട്. യോഗ്യരായ വിദ്യാർത്ഥികൾക്ക് ഇന്ത്യയിലും വിദേശത്തുമുള്ള പഠനത്തിനായി 15 ലക്ഷം രൂപ വരെ ലഭിക്കും. കുടുംബ വാർഷിക വരുമാനം 3 ലക്ഷം കവിയാൻ പാടില്ല, പലിശ നിരക്ക് 8 ശതമാനം ആണ്. തിരിച്ചടവ് കാലയളവ് അഞ്ച് വർഷവും. 18-32 വയസ് പ്രായമുള്ള വിദ്യാർത്ഥികൾക്ക് അപേക്ഷിക്കാം.

പട്ടികജാതി വിഭാഗത്തിൽപ്പെട്ട വിദ്യാർത്ഥികൾക്ക്, ദേശീയ പട്ടികജാതി ധനകാര്യ വികസന കോർപ്പറേഷന്റെ (എൻഎസ്എഫ്ഡിസി) സഹായത്തോടെയാണ് വിദ്യാഭ്യാസ വായ്പ നൽകി വരുന്നത്. ഇന്ത്യയിലെ പഠനത്തിന് 30 ലക്ഷം രൂപയും വിദേശ പഠനത്തിന് 40 ലക്ഷം രൂപയുമാണ് പരമാവധി വായ്പ തുക. പലിശ നിരക്ക് 5.5 ശതമാനം മുതൽ 6.5 ശതമാനം വരെയാണ്, തിരിച്ചടവ് കാലയളവ് അഞ്ച് വർഷവും. അപേക്ഷകർ 18 നും 32 നും ഇടയിൽ പ്രായമുള്ളവരായിരിക്കണം.

ദേശീയ പട്ടികവർഗ ധനകാര്യ വികസന കോർപ്പറേഷൻ (എൻഎസ്ടിഎഫ്ഡിസി) സഹായത്തോടെ വാഗ്ദാനം ചെയ്യുന്ന വിദ്യാഭ്യാസ വായ്പകളിൽ നിന്ന് പട്ടികവർഗത്തിൽ നിന്നുള്ള വിദ്യാർത്ഥികൾക്ക് പ്രയോജനം നേടാം. ഇന്ത്യയിൽ പഠിക്കുന്നതിന് പരമാവധി വായ്പ തുക 10 ലക്ഷം രൂപയാണ്, അതേസമയം വിദേശ പഠനത്തിന് വായ്പകളൊന്നും ലഭ്യമല്ല. പലിശ നിരക്ക് 6 ശതമാനം ആണ്, വിദ്യാർത്ഥികൾക്ക് അഞ്ച് വർഷത്തെ തിരിച്ചടവ് കാലയളവും ലഭിക്കുന്നു.

കേരള സംസ്ഥാന വനിതാ വികസന കോർപ്പറേഷൻ സുഗമമാക്കുന്ന ഈ വായ്പാ പദ്ധതികൾ, സാമ്പത്തികമായി പിന്നാക്കം നിൽക്കുന്ന വിഭാഗങ്ങളിലെ വിദ്യാർത്ഥിനികൾക്ക് സാമ്പത്തിക സമ്മർദ്ദമില്ലാതെ ഉന്നത വിദ്യാഭ്യാസം നേടാനാകുമെന്ന് ഉറപ്പാക്കാൻ രൂപകൽപ്പന ചെയ്തിട്ടുള്ളതാണ്. കുറഞ്ഞ പലിശ നിരക്കുകളും വഴക്കമുള്ള തിരിച്ചടവ് നിബന്ധനകളും വിദ്യാർത്ഥിനികൾക്ക് അവരുടെ വിദ്യാഭ്യാസ ചെലവുകൾ കൈകാര്യം ചെയ്യുന്നത് എളുപ്പമാക്കുന്നു. ഈ ലോണുകൾക്ക് അപേക്ഷിക്കാൻ താൽപ്പര്യമുള്ള വിദ്യാർത്ഥികൾ അപേക്ഷിക്കുന്നതിന് മുമ്പ് യോഗ്യതാ മാനദണ്ഡങ്ങൾ പരിശോധിക്കുകയും ആവശ്യമായ രേഖകൾ ശേഖരിക്കുകയും വേണം. ഓരോ കോർപ്പറേഷനും വരുമാനം, പ്രായം, വായ്പ തുക എന്നിവ സംബന്ധിച്ച് പ്രത്യേക നിബന്ധനകളാണുള്ളതെന്ന കാര്യം പ്രത്യേകം ശ്രദ്ധിക്കുക.

ശരിയായ സാമ്പത്തിക പിന്തുണയോടെ, നിരവധി വിദ്യാർത്ഥികൾക്ക് ഇപ്പോൾ ഉന്നത വിദ്യാഭ്യാസത്തെക്കുറിച്ചുള്ള അവരുടെ സ്വപ്നങ്ങൾ പിന്തുടരാനാകും. ഈ വിദ്യാഭ്യാസ വായ്പാ പദ്ധതികൾ അക്കാഡമിക് മികവ് ലക്ഷ്യമാക്കിയുള്ള നിരാലംബരായ വിദ്യാർത്ഥികൾക്ക് പ്രത്യാശയുടെ വെളിച്ചമായി വർത്തിക്കുന്നു. ലോൺ സ്കീമുകളെയും അപേക്ഷാ പ്രക്രിയയെയും കുറിച്ചുള്ള കൂടുതൽ വിവരങ്ങൾക്ക്, www.kswdc.org എന്ന വെബ്സൈറ്റ് സന്ദർശിക്കുക.

കേരള വനിതാ വികസന കോർപ്പറേഷന്റെ മേഖല/ജില്ലാ ഓഫീസുകളിൽ നിന്നും www.kswdc.org എന്ന വെബ്സൈറ്റില്‍ നിന്നും അപേക്ഷ ഫോം സൗജന്യമായി ലഭിക്കും. അപേക്ഷ ഫോം പൂരിപ്പിച്ച് ആവശ്യമായ രേഖകൾക്കൊപ്പം സമർപ്പിക്കണം.