ഇനി ദിവസവും കോടീശ്വരൻമാർ, ഈ ലോട്ടറികൾ ഇനിയില്ല- കേരള സംസ്ഥാന ലോട്ടറികളിൽ അടിമുടി മാറ്റം

കോടീശ്വരനാവാൻ ഇനി മുതൽ ബംബർ ലോട്ടറിക്കായി കാത്തിരിക്കേണ്ട ആവശ്യമില്ല. കേരള സംസ്ഥാന ഭാ​ഗ്യക്കുറികളിൽ അടിമുടി മാറ്റം വരുന്നു. പേരിലും, ടിക്കറ്റ് നിരക്കിലും സമ്മാനഘടനയിലും മാറ്റം. ഇത് ഭാ​ഗ്യാന്വേഷികൾക്ക് ആവേശം പകരും. നിലവിൽ 7 ലോട്ടറികളാണ് ദിവസേന നറുക്കെടുപ്പ് നടത്തുന്നത്. ഇതുവരെ ഓരോ ലോട്ടറിയ്ക്കും വ്യത്യസ്ത സമ്മാനത്തുകയാണ്. പുതിയ മാറ്റത്തിലൂടെ എല്ലാ ലോട്ടറിയുടെ ഒന്നാം സമ്മാനവും 1 കോടി രൂപയാവും.

ടിക്കറ്റ് നിരക്കിൽ മാറ്റം...

നിലവിൽ ബുധനാഴ്ചകളിൽ നറുക്കെടുക്കുന്ന ഫിഫ്റ്റി ഫിഫ്റ്റി ഭാ​ഗ്യക്കുറിയാണ് ഒന്നാം സമ്മാനം 1 കോടി വാ​ഗ്ദാനം ചെയ്യുന്നത്. അതിനാൽ ഫിഫ്റ്റി ഫിഫ്റ്റിയുടെ ടിക്കറ്റ് നിരക്ക് 50 രൂപയാണ്. ബാക്കി 6 ടിക്കറ്റുകളും 40 രൂപയ്ക്കാണ് വിൽക്കുന്നത്. എന്നാൽ പുതിയ മാറ്റത്തിന് അനുസരിച്ച് മൊത്തം 7 ലോട്ടറി ടിക്കറ്റും 50 രൂപയ്ക്ക് വിൽപ്പന നടത്താൻ തീരുമാനിച്ചു. ഇതിനോപ്പം നറുക്കെടുപ്പ് സമയത്തിലും മാറ്റം സംഭവിക്കും.

നറുക്കെടുപ്പ് സമയം മാറും...

സാധാരണയായി ഉച്ചയ്ക്കുശേഷം മൂന്ന് മണിയ്ക്കാണ് നറുക്കെടുപ്പ് നടക്കുന്നത്. എന്നാൽ മെയ് 2 മുതൽ നറുക്കെടുപ്പ് രണ്ട് മണിക്ക് നടക്കും. അതിനാൽ ടിക്കറ്റ് എടുക്കുന്നവർ 2 മണിക്ക് തന്നെ നറുക്കെടുപ്പ് ഫലം പരിശോധിക്കുക. ടിക്കറ്റ് അച്ചടിക്കുന്നതിലും മാറ്റം വരുത്തും. അതായത് ഇതുവരെ 1.08 കോടി ടിക്കറ്റുകൾ വിൽപ്പനയ്ക്ക് എത്താറുണ്ട്. ടിക്കറ്റ് വില 50 രൂപയാക്കിയതോടെ വെറും 96 ലക്ഷം ടിക്കറ്റ് മാത്രമേ അടിക്കുന്നുള്ളൂ.

ലോട്ടറി ടിക്കറ്റിൻ്റെ പുതിയ പേരും സമ്മാനങ്ങളും അറിയാം...

ഞായറാഴ്ചത്തെ 'അക്ഷയ' ലോട്ടറിയ്ക്ക് പകരമായി ഇനി മുതൽ 'സമൃദ്ധി ലോട്ടറി' എന്നായിരിക്കും പേര് മാറ്റുന്നത്. അക്ഷയ ലോട്ടറിയുടെ ഒന്നാം സമ്മാനം 70 ലക്ഷം രൂപയാണ്. എന്നാൽ ഇനി മുതൽ ഈ ലോട്ടറിയുടെ രണ്ടാം സമ്മാനം 75 ലക്ഷം രൂപയായിരിക്കും.

തിങ്കളാഴ്ചകളിൽ നറുക്കെടുക്കുന്ന വിൻ വിൻ ലോട്ടറിയ്ക്ക് പകരമായി ഇനി മുതൽ 'ഭാഗ്യധാര' എന്നായിരിക്കും ടിക്കറ്റ് അറിയപ്പെടുന്നത്. ഈ ലോട്ടറിയുടെ ഒന്നാം സമ്മാനം 75 ലക്ഷം രൂപയാണ്. എന്നാൽ ഇനി 'ഭാഗ്യധാര'യുടെ രണ്ടാം സമ്മാനമായിരിക്കും 75 ലക്ഷം.

ചൊവ്വാഴ്ചകളിൽ നറുക്കെടുക്കുന്ന സ്ത്രീശക്തി ഭാ​ഗ്യക്കുറിയുടെ പേരിൽ യാതൊരു മാറ്റവുമില്ല. എന്നാൽ സമ്മാന ഘടനയിൽ മാറ്റമുണ്ട്. ഇനി മുതൽ സ്ത്രീ ശക്തിയുടെ രണ്ടാം സമ്മാനം 40 ലക്ഷം രൂപയാണ്.

ബുധനാഴ്ചത്തെ 'ഫിഫ്റ്റി-ഫിഫ്റ്റി ലോട്ടറിയ്ക്ക് പകരമായി വരുന്നത് 'ധനലക്ഷ്മി' ലോട്ടറിയാണ്. ഈ ലോട്ടറിയുടെ ഒന്നാം സമ്മാനം 1 കോടിയും രണ്ടാം സമ്മാനം 10 ലക്ഷവുമായിരുന്നു. എന്നാൽ ഇനി മുതൽ 'ധനലക്ഷ്മി' ലോട്ടറിയുടെ രണ്ടാം സമ്മാനം 50 ലക്ഷമാണ്.

വ്യാഴാഴ്ചകളിൽ നറുക്കെടുക്കുന്ന 'കാരുണ്യ പ്ലസ്' ലോട്ടറിയുടെ പേരിൽ മാറ്റമില്ല. എന്നാൽ ഈ ലോട്ടറിയുടെ രണ്ടാം സമ്മാനം ഇനി മുതൽ 50 ലക്ഷമായിരിക്കും. ഇതുവരെ 10 ലക്ഷം രൂപയായിരുന്നു രണ്ടാം സമ്മാനം.

വെള്ളിയാഴ്ച നറുക്കെടുക്കുന്നത് 'നിർമൽ' ലോട്ടറിയാണ്. ഇനി മുതൽ വെള്ളിയാഴ്ചകളിൽ 'സുവർണ കേരളം' എന്നായിരിക്കും ഈ ലോട്ടറി അറിയപ്പെടുന്നത്. സുവർണ കേരളത്തിൻ്റെ രണ്ടാം സമ്മാനം 30 ലക്ഷമാണ്. ഇതുവരെ നിർമൽ ഭാ​ഗ്യക്കുറിയുടെ രണ്ടാം സമ്മാനം 10 ലക്ഷമായിരുന്നു.

എല്ലാം ശനിയാഴ്ചയും നറുക്കെടുക്കുന്ന 'കാരുണ്യ' ലോട്ടറിയുടെ പേരിൽ മാറ്റമില്ല. എന്നാൽ ഇനി മുതൽ ഈ ലോട്ടറിയുടെ രണ്ടാം സമ്മാനം 50 ലക്ഷം രൂപയായിരിക്കും. ഇതുവരെ രണ്ടാം സമ്മാനം 5 ലക്ഷം രൂപയായിരുന്നു.

സുവർണ കേരളം എന്ന ലോട്ടറി കഴിഞ്ഞ വെള്ളിയാഴ്ച വിപണിയിലെത്തിയിരുന്നു. പുതിയ ലോട്ടറിയുടെ ആദ്യ നറുക്കെടുപ്പ് എന്ന നിലയിൽ മെയ് 2 വെള്ളിയാഴ്ച 'സുവർണ്ണ കേരളം' ലോട്ടറിയുടെ നറുക്കെടുപ്പ് നടക്കും. മാത്രമല്ല ഇനി മുതൽ കൂടുതൽ സമ്മാനങ്ങളും ലഭിക്കും. ഇതുവരെ അവസാനത്തെ സമ്മാനം 100 രൂപയായിരുന്നു. എന്നാൽ ഇനി മുതൽ അത് 50 രൂപയായിരിക്കും.