12 കോടി അടിച്ചാൽ അക്കൗണ്ടിലെത്തുന്നത് പകുതി മാത്രം...; പൂജാ ബമ്പർ നറുക്കെടുപ്പ് നാളെ

ഭാ​ഗ്യാന്വേഷികളുടെ കാത്തിരിപ്പിന് നാളെ വിരാമമാവും. നാളെ ഡിസംബർ 4നാണ് പൂജാ ബമ്പർ BR-100ന്റെ നറുക്കെടുപ്പ്. തിരുവനന്തപുരം ​ഗോർക്കി ഭവനിൽ വെച്ച് ഉച്ച കഴിഞ്ഞ് 2 മണിക്ക് ശേഷം ഭാ​ഗ്യശാലികളെ അറിയാം. ഈ വർഷത്തെ അവസാനത്തെ ബമ്പർ നറുക്കെടുപ്പാണ് നാളെ നടക്കാനിരിക്കുന്നത്. മലയാളികൾ പൊതുവേ ലോട്ടറിപ്രിയരാണ്. 12 കോടിയുടെ ഭാ​ഗ്യശാലിയ്ക്കായുള്ള കാത്തിരിപ്പ് അവസാനിക്കാൻ ഇനി മണിക്കൂറുകൾ മാത്രം ബാക്കി. നിങ്ങളായിരിക്കുമോ ആ ഭാ​ഗ്യശാലി?

സംസ്ഥാന ധനമന്ത്രി കെ.എൻ ബാലഗോപാൽ ഒക്ടോബർ 9നായിരുന്നു പൂജാ ബമ്പർ ഔദ്യോ​ഗികമായി ലോഞ്ച് ചെയ്തത്. ഏകദേശം 40 ലക്ഷം ടിക്കറ്റുകളാാണ് കേരള ഭാ​ഗ്യക്കുറി വകുപ്പ് അച്ചടിച്ചത്. അതിൽ ഇതുവരെ 37 ലക്ഷത്തോളം ടിക്കറ്റുകൾ വിറ്റഴിഞ്ഞിട്ടുണ്ട്. 300 രൂപയാണ് ഓരോ പൂജാ ബമ്പർ ടിക്കറ്റിന്റെയും വില.

പൂജാ ബമ്പർ BR-100

പൂജാ ബമ്പർ അടിച്ചാൽ ഏജന്റ് ഉൾപ്പെടെ 7 പേരാണ് കോടീശ്വരൻമാരാവുന്നത്. മാത്രമല്ല 20 പേർ ലക്ഷപ്രഭുക്കളാവും. ഒന്നാം സമ്മാനം 12 കോടിയുടെ ബമ്പറാണ്.

രണ്ടാം സമ്മാനം - 1 കോടി (അഞ്ച് പേർക്ക് വീതം)
മൂന്നാം സമ്മാനം - 10 ലക്ഷം (പത്ത് പേർക്ക് വീതം)
നാലാം സമ്മാനം - 3 ലക്ഷം (അഞ്ചു പേർക്ക് വീതം)
അഞ്ചാം സമ്മാനം - 2 ലക്ഷം രൂപ (അഞ്ച് പേർക്ക് വീതം)

മറ്റു സമ്മാനങ്ങൾ 5000 , 1000, 500, 300 രൂപ എന്നിങ്ങനെയാണ്. സമാശ്വാസ സമ്മാനമായി നാല് പേർക്ക് 1 ലക്ഷം രൂപ വീതവും ലഭിക്കും.

2023ലെ നറുക്കെടുപ്പിൽ പൂജാ ബമ്പറടിച്ചത് കാസർകോട് ജില്ലയിലെ ഹൊസങ്കടിയിലെ ഭാരത് എന്ന ലോട്ടറി ഓഫീസിൽ നിന്നായിരുന്നു. ഇത്തവണ ഏത് ജില്ലയിലാവും 12 കോടി എത്തിച്ചേരുന്നത്? ഈ വർഷത്തെ ഇതുവരെയുള്ള കണക്ക് നോക്കിയാൽ ഏറ്റവും കൂടുതൽ പൂജാ ബമ്പർ വിൽപ്പന നടന്നത് പാലക്കാട് ജില്ലയിലാണ്. തൊട്ടുപിന്നിൽ തൃശൂർ, തിരുവനന്തപുരം ജില്ലകളുമുണ്ട്.

12 കോടി അടിച്ചാൽ എത്ര അക്കൗണ്ടിൽ എത്തും?

12 കോടി ബമ്പർ അടിച്ചാൽ ആദ്യം ഏജന്റ് കമ്മീഷൻ നൽണം. അത് ഏകദേശം 10 ശതമാനമായിരിക്കും. 12 കോടിയുടെ 10% ഏകദേശം 1.2 കോടി രൂപ കൊടുക്കണം. ബാക്കിയുള്ള 10.8 കോടി രൂപയിൽ 30% നികുതി അടക്കേണ്ടി വരും. അതായത് 10 ലക്ഷം രൂപയില്‍ കൂടുതൽ വാർഷിക വരുമാനമുള്ളവർ ഇതുപോലെ നികുതി. 30% നികുതി കണക്കാക്കിയാൽ 3.24 കോടി രൂപ വേണ്ടി വരും. ഇനി നിങ്ങളുടെ അക്കൗണ്ടിൽ ഏകദേശം 7.56 കോടി രൂപയായിരിക്കും ബാക്കിയുള്ളത്. എന്നാൽ അതിൽ നിന്നും ചെറിയ തുക സർക്കാരിലേക്ക് അടക്കണം.

50 ലക്ഷം രൂപയിലധികം പ്രതിവർഷം വരുമാനമുള്ളവര്‍ ആദായ നികുതിക്കൊപ്പം സര്‍ചാര്‍ജ് നൽകണം. 50 ലക്ഷം മുതല്‍ 1 കോടി വരെയുള്ളവർ 10% സർചാർജ് നൽകണം. 1 കോടി മുതല്‍ 2 കോടി വരെയുള്ളവർ 15% സർചാർജ് നൽകണം. 2 കോടി മുതല്‍ 5 കോടി വരെയുള്ളവർ 25% സർചാർജും 5 കോടിക്ക് മുകളിൽ വരുമാനമുള്ളവർക്ക് 37% സര്‍ചാര്‍ജും കൊടുക്കണം.

5 കോടിയ്ക്ക് മുകളിൽ വരുമാനം കണക്കാക്കിയാൽ ഏകദേശം 1.19 കോടി രൂപ സർചാർജ് അടക്കേണ്ടി വരും. ഒപ്പം ഹെല്‍ത്ത് & എജ്യുക്കേഷന്‍ സെസ് നൽകണം. 12 കോടി ബമ്പറടിച്ചയാൾ ഏകദേശം 17.7 ലക്ഷം രൂപ സെസ് നൽകണം. അതായത് എല്ലാം കഴിഞ്ഞാൽ ഏകദേശം 6.19 കോടി രൂപയായാണ് അക്കൗണ്ടിൽ ഉണ്ടായിരിക്കുക.