എല്‍പിജി ക്ഷാമം: കേരളത്തില്‍ മാര്‍ച്ച് 23 ന് ഹോട്ടലുകള്‍ അടച്ചിടും, പിഎന്‍ജിയിലേക്ക് മാറാന്‍ നിര്‍ദ്ദേശം

എല്‍പിജി വിതരണ പ്രശ്നങ്ങള്‍ തുടരുന്നതിനിടെ, കേരള ഹോട്ടല്‍ ആന്‍ഡ് റെസ്റ്റോറന്റ് അസോസിയേഷന്‍ മാര്‍ച്ച് 23 ന് സംസ്ഥാനവ്യാപക പണിമുടക്ക് പ്രഖ്യാപിച്ചു.ഹോട്ടലുകളും ഭക്ഷണശാലകളും സംസ്ഥാനത്തുടനീളം അടച്ചിടും.

ഹോട്ടലുകളെ അവശ്യ സേവന പട്ടികയില്‍ ഉള്‍പ്പെടുത്തണമെന്നും മതിയായ എല്‍പിജി വിതരണം ഉറപ്പാക്കണമെന്നും സംഘടന ആവശ്യപ്പെട്ടു. എല്‍പിജി വില കുത്തനെ വര്‍ദ്ധിപ്പിക്കുക വഴി സ്വകാര്യ കമ്പനികള്‍ സാഹചര്യം മുതലെടുക്കുകയാണെന്ന് ഇവര്‍ ആരോപിച്ചു.

പ്രതിഷേധത്തിന്റെ ഭാഗമായി അസോസിയേഷന്‍ വ്യാഴാഴ്ച മാര്‍ച്ച് നടത്തും. 

വാണിജ്യ സിലിണ്ടര്‍ വിതരണം പുന:രംഭിച്ചതായി പെട്രോളിയം, പ്രകൃതിവാതക മന്ത്രാലയം (മാര്‍ക്കറ്റിംഗ്, ഓയില്‍ റിഫൈനറി) ജോയിന്റ് സെക്രട്ടറി സുജാത ശര്‍മ്മ അറിയിച്ചു.ഇന്ത്യയിലുടനീളം ഏകദേശം 7,200 ടണ്‍ പാചക വാതകം വിതരണം ചെയ്തു.

ഇതില്‍ ബള്‍ക്ക് സപ്ലൈകളും വാഹനങ്ങള്‍ക്കുള്ള ഇന്ധനവും ഉള്‍പ്പെടും.

15 സംസ്ഥാനങ്ങള്‍, ഡീലര്‍മാര്‍ക്ക് ഗ്യാസ് എത്തിച്ചു. 40-ലധികം രാജ്യങ്ങളില്‍ നിന്ന് അസംസ്‌കൃത എണ്ണ വാങ്ങുന്നതിനാല്‍ രാജ്യത്തിന് ആവശ്യത്തിന് എണ്ണ ശേഖരമുണ്ട്. ശുദ്ധീകരണശാലകള്‍ പൂര്‍ണ്ണ ശേഷിയില്‍ പ്രവര്‍ത്തിക്കുന്നു. പ്രകൃതിവാതകവും (എല്‍എന്‍ജി) ലഭ്യമാണ്.

എല്‍പിജി സിലിണ്ടറുകളില്‍ നിന്ന് പൈപ്പ് ചെയ്ത പ്രകൃതിവാതകത്തിലേക്ക് (പിഎന്‍ജി) മാറാന്‍ കേന്ദ്രസര്‍ക്കാര്‍ നിര്‍ദ്ദേശിച്ചു.പിഎന്‍ജി കൂടുതല്‍ സ്ഥിരതയുള്ളതും സൗകര്യപ്രദവുമാണ്.

ടാങ്കര്‍ ജഗ് ലാഡ്കി മുന്ദ്രയിലെത്തി

യുഎഇയില്‍ നിന്ന് കൊണ്ടുവന്ന് ഫുജൈറയില്‍ ലോഡ് ചെയ്ത ഏകദേശം 80,886 മെട്രിക് ടണ്‍ അസംസ്‌കൃത എണ്ണ ഗുജറാത്തിലെ മുന്ദ്ര ടെര്‍മിനലിലെത്തി. ഇന്ത്യന്‍ പതാകയുള്ള ക്രൂഡ് ഓയില്‍ ടാങ്കര്‍, ജഗ് ലാഡ്കിയാണ് എണ്ണവഹിക്കുന്നത്. പുതിയ ലോഡ്, ശുദ്ധീകരണ പ്രവര്‍ത്തനങ്ങളെ പിന്തുണയ്ക്കുകയും ഊര്‍ജ്ജ വിതരണം ശക്തിപ്പെടുത്തുകയും ചെയ്യും.