'കേരളത്തിന്റെ ഹരിത വിപ്ലവത്തിന് പച്ചക്കൊടി', ഗ്രീൻ ഹൈഡ്രജൻ പൈലറ്റ് പദ്ധതിയ്ക്ക് കേന്ദ്ര സഹായം

കേരളത്തിന്റെ ഗ്രീൻ ഹൈഡ്രജൻ പൈലറ്റ് പദ്ധതിക്ക് ₹34.84 കോടി ധനസഹായം നൽകി കേന്ദ്രം. ഗതാഗത മേഖലയ്ക്ക് പുത്തൻ ഉണർവ് നൽകുന്ന ഈ പദ്ധതിക്ക് കേന്ദ്ര ഊർജ മന്ത്രാലയമാണ് (MNRE) ധനസഹായം പ്രഖ്യാപിച്ചിരിക്കുന്നത്. കേന്ദ്ര സർക്കാരിന്റെ പിന്തുണയോടെ ഓട്ടോമോട്ടീവ് ഇൻഡസ്ട്രി സ്ഥാപിച്ച ഓട്ടോമോട്ടീവ് റിസർച്ച് അസോസിയേഷൻ ഓഫ് ഇന്ത്യ (ARAI) ഈ പദ്ധതിക്ക് അംഗീകാരം നൽകും.

കേരള സർക്കാർ നിയന്ത്രണത്തിലുള്ള ഏജൻസി ഫോർ ന്യൂ ആൻഡ് റിന്യൂബിള്‍ എനര്‍ജി റിസർച്ച് ആൻഡ് ടെക്നോളജി (ANERT) യുടെ ചീഫ് എക്സിക്യൂട്ടീവ് ഓഫീസർ എൻ. വെലൂരി ആണ് ഈ വിവരം മാധ്യമങ്ങളോട് പങ്കുവച്ചത്. 40 കോടിയാണ് പദ്ധതിയുടെ ആകെ തുകയായി കേരളം കണക്കാക്കുന്നത്. ഇതിന്റെ 90 ശതമാനത്തോളം ഇപ്പോൾ കേന്ദ്രം നല്കിയിരിക്കുകയാണ്. ഇന്ധന സെൽ അടിസ്ഥാനമാക്കിയുള്ള രണ്ട് ട്രക്കുകളും ഹൈഡ്രജൻ ഇന്റേണൽ കംബക്ഷൻ എഞ്ചിൻ അടിസ്ഥാനമാക്കിയുള്ള രണ്ട് ട്രക്കുകളും, കൂടാതെ രണ്ട് ഹൈഡ്രജൻ ഇന്ധന നിറയ്ക്കൽ യൂണിറ്റുകളും ഈ പദ്ധതിയിൽ ഉൾപ്പെടുന്നുണ്ട്.

 

വയബിലിറ്റി ഗ്യാപ് ഫണ്ടിംഗ് (VGF) വഴിയാണ് ഊർജ മന്ത്രാലയം ഈ ഫണ്ട് കേരളത്തിന് അനുവദിക്കുന്നത്. കേന്ദ്ര സർക്കാരിന്റെ ഒരു പദ്ധതിയാണ് VGF. ഇത് പൊതുമേഖല-സ്വകാര്യ മേഖല (PPP) പങ്കാളിത്തത്താൽ നടപ്പിലാക്കുന്ന അടിസ്ഥാന സൗകര്യ പദ്ധതികൾക്ക് സാമ്പത്തിക സഹായം നൽകുന്നതിനുള്ളതാണ്.

പദ്ധതിയുടെ ഭാഗമായി അനുമതി ലഭിച്ച രണ്ട് റൂട്ടുകൾ തിരുവനന്തപുരം-കൊച്ചി, കൊച്ചി-എടപ്പള്ളി എന്നിവയാണെന്ന് റിപ്പോർട്ടിൽ വ്യക്തമാക്കിയിട്ടുണ്ട്. പ്രമുഖ നിർമ്മാതാക്കളായ അശോക് ലേലാൻഡ് പദ്ധതിയുടെ ഭാഗമായി ഹൈഡ്രജൻ ട്രക്കുകൾ കേരളത്തിൽ എത്തിക്കും, അതേസമയം ഭാരത് പെട്രോളിയം കോർപ്പറേഷൻ (BPCL) ഗ്രീൻസ്റ്റാറ്റ് ഇന്ത്യയാണ് ഹൈഡ്രജൻ ഇന്ധന നിറയ്ക്കൽ അടിസ്ഥാന സൗകര്യം കേരളത്തിൽ ലഭ്യമാകുക.

ഗ്രീൻ എനർജിയുടെ സാധ്യതകളെ ഉപയോഗപ്പെടുത്തുക എന്നതാണ് ഈ പദ്ധതികൊണ്ട് സർക്കാർ ലക്ഷ്യമിടുന്നത്. രണ്ട് ഹൈഡ്രജൻ ഫില്ലിംഗ് സ്റ്റേഷനുകളാണ് ഇതിൽ ഉൾപ്പെട്ടിരിക്കുന്നത്. ദിവസേന 260 kg സംഭരിക്കാൻ തക്ക ശേഷിയുള്ള ഇവ തിരുവനന്തപുരം ജില്ലയിലെ മുട്ടത്തറയിലും, കൊച്ചിയിലെ ഉദ്യോഗമണ്ഡലിലുമാണ് നിർമിക്കുക.

ഈ പദ്ധതിയുടെ ലക്ഷ്യം ഹൈഡ്രജൻ സാങ്കേതികവിദ്യ ഗതാഗത മേഖലയിലേക്കു കൊണ്ടുവരുന്നതിന്റെ പ്രായോഗികതയും വ്യാപനക്ഷമതയും തെളിയിക്കുന്നതും അതിനായി ഹൈഡ്രജൻ പവർ ഉപയോഗിക്കുന്ന വാഹനങ്ങൾ പ്രയോഗിക്കുകയും, ഹൈഡ്രജൻ ഇന്ധന നിറയ്ക്കൽ കേന്ദ്രങ്ങൾ കേരളത്തിൽ സ്ഥാപിക്കുകയും ചെയ്യുന്നതുമാണ്.