കേന്ദ്രം മൗനത്തിൽ: പ്രീമിയം ഉയ‍ർത്തിയില്ലെങ്കിൽ 5 ലക്ഷത്തിന്റെ വയ വന്ദന യോജന നടപ്പിലാക്കില്ലെന്ന് കേരളം

5 ലക്ഷം വരെ സൗജന്യ ചികിത്സ വാഗ്ദാനം ചെയ്യുന്ന ആരോഗ്യ ഇൻഷുറൻസ് പദ്ധതിയായ ആയുഷ്മാൻ വയ വന്ദന യോജന കേരളത്തിൽ നടപ്പിലാക്കേണ്ടെന്ന് കേരള സർക്കാർ തീരുമാനിച്ചു. 70 വയസും അതിനു മുകളിലുമുള്ള എല്ലാ മുതിർന്ന പൗരന്മാർക്കും സാമ്പത്തിക സുരക്ഷ ഉറപ്പാക്കുന്ന കേന്ദ്ര സർക്കാറിൻ്റെ പദ്ധതിയാണ് കേരളം അവ​ഗണിക്കുന്നത്.

ആയുഷ്മാന്‍ ഭാരത് വയ വന്ദന യോജനയെ കേരളത്തിൻ്റെ കാരുണ്യ ആരോഗ്യ സുരക്ഷാ പദ്ധതിയില്‍ (KASP) ലയിപ്പിച്ച് കേരളത്തില്‍ പദ്ധതി നടപ്പാക്കാനാണ് പദ്ധത്. എന്നാൽ ഇതിന് കേരളം ആവശ്യപ്പെട്ടതു പ്രകാരം കേന്ദ്രം വയ വന്ദന യോജനയുടെ പ്രീമിയം വർദ്ധിപ്പിക്കാത്തതാണ് ഈ അനിശ്ചിതത്വത്തിന് കാരണം.

കേരളത്തിൻ്റെ ആരോഗ്യ ഇൻഷുറൻസ് പദ്ധതിയായ കാരുണ്യ ആരോഗ്യ സുരക്ഷാ പദ്ധതി (KASP) 1,052 രൂപ എന്ന കുറഞ്ഞ പ്രീമിയം വാ​ഗ്ദാനം ചെയ്യുന്നു. അതിനാൽ ഇതേ തുകയിൽ വയ വന്ദന യോജനയും നടപ്പിലാക്കുവാനാണ് കേന്ദ്രം വ്യക്തമാക്കുന്നത്. എന്നാൽ വയ വന്ദന പദ്ധതിയുടെ വാർഷിക പ്രീമിയം 3,250 രൂപയാക്കുവാനും, തുകയുടെ 60% കേന്ദ്ര സർക്കാർ ധനസഹായം നൽകാനും കേരളം നിർദ്ദേശിച്ചു. ഇതോടെ ഏകദേശം 26 ലക്ഷത്തോളം വയോജനങ്ങളുടെ ഇൻഷുറൻസ് പരിരക്ഷയിൽ കേരളത്തിൻ്റെ ഈ തീരുമാനം പ്രതിസന്ധി ഉയർത്തുന്നു.

ആദ്യ ഘട്ട ചർച്ചകൾ മുതൽ കേരളം ആവശ്യപ്പെടുന്നത് വയ വന്ദന യോജനയുടെ പ്രീമിയം വർദ്ധിപ്പിക്കുവാനാണ്. കേരളത്തിൻ്റെ ആവശ്യം പരിശോധിക്കുമെന്ന് കേന്ദ്രം തുടക്കത്തിൽ പറഞ്ഞിരുന്നെങ്കിലും പിന്നീട് കാര്യമായ മറുപടിയൊന്നും ലഭിച്ചില്ല. കേന്ദ്രം ഈ വിഷയത്തിൽ മൗനം തുടരുന്നതിനാൽ കാരുണ്യ ആരോഗ്യ ഇൻഷുറൻസ് പദ്ധതിയിൽ മാത്രം ശ്രദ്ധ കേന്ദ്രീകരിക്കാൻ കേരളം തീരുമാനിച്ചു.

വയ വന്ദന യോജനയുടെ വ്യവസ്ഥകൾ കണക്കിലെടുക്കുമ്പോൾ സാമ്പത്തികമായി മുന്നോക്കമുള്ള പ്രായമായ വ്യക്തികൾക്ക് വയ വന്ദനയുടെ കീഴിൽ കവറേജ് നൽകേണ്ടതില്ലെന്ന് കേരള സർക്കാർ വ്യക്തമാക്കുന്നു. കാരണം ഇത് അമിതമായ സാമ്പത്തിക ബാധ്യത നൽകിയേക്കും. എന്നാൽ പ്രീമിയം ഉയർത്തിയാൽ കേരളവും വയ വന്ദനയെ പ്രോത്സാഹിപ്പിക്കുമെന്നും വ്യക്തമാക്കുന്നു.

എന്താണ് കാരുണ്യ ആരോ​ഗ്യ ഇൻഷുറൻസ് പദ്ധതി?

കേരളത്തിലെ സാമ്പത്തികമായും സാമൂഹികമായും പിന്നാക്കം നിൽക്കുന്ന വിഭാഗങ്ങൾക്ക് 5 ലക്ഷം രൂപയുടെ സൗജന്യ ആരോ​ഗ്യ പരിരക്ഷ നൽകുന്ന ഇൻഷുറൻസ് പദ്ധതിയാണിത്. സാമ്പത്തിക പ്രതിസന്ധികൾ അനുഭവിക്കുന്നവർക്ക് ഉറപ്പുള്ള ആരോ​ഗ്യ സുരക്ഷ നൽകുവാനാണ് ഈ പദ്ധതി ലക്ഷ്യം വെച്ചത്. 2018ലാണ് ഈ പദ്ധതി കേരള സർക്കാർ ആരംഭിച്ചത്. കൂടാതെ, കാരുണ്യ ബെനവലന്റ് ഫണ്ട് 3 ലക്ഷത്തിൽ താഴെ വാർഷിക വരുമാനമുള്ള കുടുംബങ്ങൾക്ക് 2 ലക്ഷം രൂപ വരെ സാമ്പത്തിക സഹായം നൽകുന്നു.

വയ വന്ദന ഇൻഷുറൻസ് പദ്ധതി

70 വയസ്സും അതിൽ കൂടുതലുമുള്ള എല്ലാ പൗരന്മാർക്കും, അവരുടെ വരുമാനം പരിഗണിക്കാതെ, പ്രതിവർഷം 5 ലക്ഷം രൂപ വരെ സൗജന്യ ചികിത്സ നൽകുക ഇൻഷുറൻസ് പദ്ധതിയാണ് ആയുഷ്മാൻ വയ വന്ദന യോജന. ഇത് വയോജനങ്ങളുടെ സാമ്പത്തിക, ആരോ​ഗ്യ സുരക്ഷക്കുള്ള ഉചിതമായ തിരഞ്ഞെടുപ്പായിരിക്കും. ആധാർ പരിശോധനയിലൂടെ അപേക്ഷകൻ്റെ പ്രായം ഉറപ്പാക്കുന്നത്.

ആയുഷ്മാൻ ഭാരതിന് കീഴിലുള്ള വയ വന്ദന യോജന 2024ൻ്റെ തുടക്കത്തിൽ പ്രഖ്യാപിച്ചെങ്കിലും ഒക്ടോബർ 29 നാണ് പ്രധാനമന്ത്രി നരേന്ദ്ര മോദി ഔദ്യോഗികമായി ഉദ്ഘാടനം ചെയ്തത്. രാജ്യത്തെ എല്ലാ സർക്കാർ, സ്വകാര്യ ആശുപത്രികളിലും ഈ പദ്ധതി പ്രയോജനപ്പെടുത്താം എന്നതാണ് ഏറ്റവും പ്രധാനപ്പെട്ട കാര്യം.