കേരളത്തിന് മൂന്ന് വന്ദേ ഭാരത് സ്ലീപ്പർ ട്രെയിനുകൾ! യാത്രാസമയം മൂന്ന് മണിക്കൂർ വരെ കുറയും; റൂട്ടുകൾ അറിയാം

ഇന്ത്യൻ റെയിൽവേയുടെ ചരിത്രത്തിലെ പുതിയൊരു വിപ്ലവത്തിന് തുടക്കം കുറിച്ചുകൊണ്ട് വന്ദേ ഭാരത് സ്ലീപ്പർ ട്രെയിനുകൾ ട്രാക്കിലിറങ്ങുന്നു. വന്ദേ ഭാരത് എക്സ്പ്രസുകൾ നൽകിയ ആധുനിക യാത്രാനുഭവം ഇനി ദീർഘദൂര യാത്രക്കാർക്കും ലഭ്യമാകും. രാജ്യത്തെ ആദ്യ വന്ദേ ഭാരത് സ്ലീപ്പർ ട്രെയിൻ ജനുവരി 17-ന് കൊൽക്കത്ത - ഹൗറ റൂട്ടിൽ കമ്മീഷൻ ചെയ്യും. ഇതിനു പിന്നാലെ ഈ വർഷം തന്നെ രാജ്യത്തെ വിവിധ പ്രധാന നഗരങ്ങളെ ബന്ധിപ്പിച്ചുകൊണ്ട് കൂടുതൽ സ്ലീപ്പർ സർവീസുകൾ വിന്യസിക്കാനാണ് റെയിൽവേ മന്ത്രാലയം ലക്ഷ്യമിടുന്നത്.

കേരളത്തിലെ റെയിൽവേ വികസനത്തിന് പുത്തൻ ഉണർവേകുന്ന വാർത്തയാണ് വന്ദേ ഭാരത് സ്ലീപ്പറിന്റെ വരവ്. ഏറ്റവും പുതിയ റിപ്പോർട്ട് പ്രകാരം, കേരളത്തിന് മൂന്ന് വന്ദേ ഭാരത് സ്ലീപ്പർ ട്രെയിനുകളാണ് അനുവദിച്ചിരിക്കുന്നത്. തിരുവനന്തപുരം - ചെന്നൈ, തിരുവനന്തപുരം - ബെംഗളൂരു, തിരുവനന്തപുരം - മംഗളൂരു എന്നിവയാണ് ഈ മൂന്ന് റൂട്ടുകൾ. ഇതിൽ ആദ്യ ഘട്ടമെന്ന നിലയിൽ തിരുവനന്തപുരത്ത് നിന്ന് ചെന്നൈയിലേക്കും ബെംഗളൂരുവിലേക്കുമായിരിക്കും സർവീസുകൾ ആരംഭിക്കുക. ഇത് അന്തർസംസ്ഥാന യാത്രക്കാരായ മലയാളികൾക്ക് വലിയ ആശ്വാസമാകും.

വന്ദേ ഭാരത് സ്ലീപ്പർ ട്രെയിനുകളുടെ ഏറ്റവും വലിയ പ്രത്യേകത കുറഞ്ഞ യാത്രാ സമയമാണ്. മികച്ച വേഗതയും കുറഞ്ഞ സ്റ്റോപ്പുകളും കാരണം നിലവിലുള്ള സൂപ്പർഫാസ്റ്റ് ട്രെയിനുകളെ അപേക്ഷിച്ച് മൂന്ന് മണിക്കൂർ വരെ ലാഭിക്കാൻ യാത്രക്കാർക്ക് സാധിക്കും.

തിരുവനന്തപുരം - മംഗളൂരു (കോട്ടയം വഴി): 631 കിലോമീറ്റർ ദൂരം പിന്നിടാൻ സാധാരണ ട്രെയിനുകൾ 14 മണിക്കൂറോളം എടുക്കുമ്പോൾ വന്ദേ ഭാരത് സ്ലീപ്പറിൽ ഇത് 11 മണിക്കൂറിൽ താഴെയായി ചുരുങ്ങും.

തിരുവനന്തപുരം - ചെന്നൈ (പാലക്കാട് വഴി): 922 കിലോമീറ്റർ ദൂരം പിന്നിടാൻ നിലവിൽ 16.30 മണിക്കൂർ വേണമെങ്കിൽ, വന്ദേ ഭാരത് സ്ലീപ്പർ എത്തുന്നതോടെ യാത്ര 13.30 മണിക്കൂറായി കുറയും.

തിരുവനന്തപുരം - ബെംഗളൂരു: 844 കിലോമീറ്റർ സഞ്ചരിക്കാൻ സാധാരണയായി എടുക്കുന്ന 15.30 മണിക്കൂർ, വന്ദേ ഭാരത് വഴി 12.30 മണിക്കൂറായി കുറയും.

യാത്രാസമയം ലാഭിക്കുന്നതിനൊപ്പം വിമാനയാത്രയ്ക്ക് സമാനമായ സൗകര്യങ്ങളാണ് വന്ദേ ഭാരത് സ്ലീപ്പറിൽ ഒരുക്കിയിരിക്കുന്നത്. മികച്ച ഇന്റീരിയർ, ജെർക്കുകൾ അനുഭവപ്പെടാത്ത യാത്ര, ഓട്ടോമാറ്റിക് ഡോറുകൾ, വാക്വം ടോയ്‌ലറ്റുകൾ, സെൻസർ അധിഷ്ഠിത ലൈറ്റുകൾ എന്നിവ ഇതിന്റെ പ്രത്യേകതകളാണ്. ഇന്ത്യൻ റെയിൽവേയുടെ ഈ ആധുനികവൽക്കരണം കേരളത്തിലെ ടൂറിസം, വാണിജ്യ മേഖലകൾക്കും വലിയ മുതൽക്കൂട്ടാകും.

ടിക്കറ്റ് നിരക്ക്

സാധാരണ സൂപ്പർഫാസ്റ്റ് എക്സ്പ്രസ് ട്രെയിനുകളെ അപേക്ഷിച്ച് വന്ദേ ഭാരത് സ്ലീപ്പറിൽ നിരക്ക് അല്പം കൂടുതലായിരിക്കും. ഈ ട്രെയിനുകളിൽ കൺഫേം ടിക്കറ്റുകൾ മാത്രമേ അനുവദിക്കൂ. അതായത് RAC, വെയ്റ്റിംഗ് ലിസ്റ്റ് ടിക്കറ്റുകൾ വന്ദേ ഭാരത് സ്ലീപ്പറിൽ ഉണ്ടായിരിക്കുന്നതല്ല.

തിരുവനന്തപുരം - മംഗളൂരു സർവീസിന് നിലവിലെ എക്സ്പ്രസ് ട്രെയിനുകളുടെ 3-ടയർ, 2-ടയർ നിരക്കുകളേക്കാൾ ഏകദേശം 500 രൂപയുടെ വർദ്ധനവുണ്ടാകും. തിരുവനന്തപുരം - ചെന്നൈ റൂട്ടിൽ 1000 രൂപയും, തിരുവനന്തപുരം - ബെംഗളൂരു റൂട്ടിൽ 800 രൂപയും അധികമായി നൽകേണ്ടി വന്നേക്കാം.

വന്ദേ ഭാരത് സ്ലീപ്പർ ട്രെയിനുകളിലെ അടിസ്ഥാന നിരക്കുകൾ (ഏറ്റവും പുതിയത്)

• 3AC ടിക്കറ്റ്: കുറഞ്ഞ നിരക്ക് 960 രൂപ + ജിഎസ്ടി
• 2AC ടിക്കറ്റ്: 1240 രൂപ + ജിഎസ്ടി
• 1AC ടിക്കറ്റ്: 1520 രൂപ + ജിഎസ്ടി