കുളിര് കോരി കേരളം, മൂന്നാറിൽ താപനില പൂജ്യത്തിലും താഴെ, മലയോരമേഖലകളിലേക്ക് സഞ്ചാരികളുടെ ഒഴുക്ക്

കേരളത്തിൽ നിന്നും മഴ പൂർണ്ണമായും പിൻവാങ്ങി. വരും ദിവസങ്ങളിൽ വരണ്ട കാലാവസ്ഥ തുടരുമെന്നാണ് കാലാവസ്ഥാ നിരീക്ഷണ കേന്ദ്രം പറയുന്നത്. ഡിസംബർ 25 വരെ എല്ലാ ജില്ലകളിലും വെള്ള അലർട്ടാണ്. സന്നിധാനം, പമ്പ, നിലക്കൽ എന്നിവിടങ്ങളിൽ ആകാശം ഭാ​ഗികമായി മേഘാവൃതമായിരിക്കുമെന്ന് കാലാവസ്ഥ വകുപ്പ് അറിയിച്ചു. അതേസമയം കേരളത്തിന്‍റെ മലയോര മേഖലകളിൽ തണുപ്പ് വർദ്ധിക്കുകയാണ്. ഹൈറേഞ്ച് മേഖലകളില്‍ മഞ്ഞുവീഴ്ചയും തണുപ്പും കടുത്തു.

തണുത്ത് വിറച്ച് മൂന്നാർ

മൂന്നാറിൽ ഓരോ ദിവസവും അന്തരീക്ഷ താപനില താഴേക്ക് പോകുന്ന സ്ഥിതിയാണ്. മൂന്നാർ സെവൻമല, ചെണ്ടുവര, ലക്ഷ്മി എസ്റ്റേറ്റ്, ഉപാസി എന്നിവിടങ്ങളിൽ അന്തരീക്ഷ താപനില ഞായറാഴ്ചയും മൈനസ് ഒന്ന് രേഖപ്പെടുത്തി. സൈലന്റ് വാലി, ദേവികുളം എന്നിവിടങ്ങളിൽ പൂജ്യമായിരുന്നു. ദേവികുളത്തും ലക്ഷ്മി എസ്റ്റേറ്റിലും ഇന്നലെയും പൂജ്യം ഡിഗ്രി രേഖപ്പെടുത്തി. ഈ സീസണിലെ ഏറ്റവും കുറഞ്ഞ താപനിലയാണ് കഴിഞ്ഞ രാത്രിയിലും പുലർച്ചെയുമായി മൂന്നാറിലെ വിവിധയിടങ്ങളിൽ രേഖപ്പെടുത്തിയിട്ടുള്ളത്. കടുത്ത ശൈത്യം പ്രകടമാക്കി ദേവികുളം മേഖലയില്‍ വാഹനങ്ങളുടെ മേല്‍ ഐസ് കണികകള്‍ രൂപപ്പെട്ടിരുന്നു.

സാധാരണ നിലയില്‍ നിന്ന് വ്യത്യസ്തമായി വയനാട്ടിലും ഇത്തവണ തണുപ്പ് നേരത്തേ കടുത്തു. ജില്ലയിലെ പലയിടങ്ങളിലും താപനില 11 ഡിഗ്രി സെല്‍ഷ്യസിലേക്ക് താഴ്ന്നു. പുലര്‍ച്ചെ അസഹ്യമായ തണുപ്പാണ് അനുഭവപ്പെടുന്നത്. വടക്കന്‍ കേരളത്തില്‍ രാത്രിയും പുലര്‍ച്ചെയുമായി 12 ഡിഗ്രി സെല്‍ഷ്യസിലും താഴെയാണ് താപനില.

സഞ്ചാരികൾക്ക് സന്തോഷം

കടുത്ത തണുപ്പിനൊപ്പം അവധി ദിനങ്ങളും എത്തിയതോടെ ഹൈറേഞ്ച് പ്രദേശങ്ങളിലേക്ക് സഞ്ചാരികളുടെ വന്‍ ഒഴുക്കാണ് അനുഭവപ്പെടുന്നത്. കൊടും തണുപ്പ് അനുഭവപ്പെടുന്ന വട്ടവടയില്‍ പുതുവത്സരം വരെ മുഴുവന്‍ റിസോര്‍ട്ടുകളും ഹോം സ്റ്റേകളും ബുക്കിംഗ് പൂര്‍ത്തിയായതായി ഉടമകള്‍ പറയുന്നു.

തണുപ്പിന് കാരണം

ലാ നിന പ്രതിഭാസമാണ് കാലാവസ്ഥ മാറ്റത്തിന് കാരണം. മധ്യ-കിഴക്കൻ പസഫിക് സമുദ്രത്തിലെ താപനില അസാധാരണമാം വിധം കുറയുന്നതാണ് കൊടും തണുപ്പിന് കാരണമായത്. ലാ നിന ആഗോള വായു സഞ്ചാരഗതിയിൽ മാറ്റം വരുത്തുന്നു. കൂടാതെ, ഇന്ത്യൻ ഭൂഖണ്ഡത്തിൽ കഠിനമായ ശൈത്യത്തിന് കാരണമായി. ഇന്ത്യയിൽ മാത്രമല്ല, ലോകമെമ്പാടും ലാ നിനയുടെ ആഘാതം അനുഭവപ്പെടും.

ശക്തമായ കാറ്റുമൂലം പടിഞ്ഞാറൻ പസഫിക് സമുദ്രഭാഗത്തേക്ക് ചൂടുവെള്ളം നീങ്ങുകയും കിഴക്കൻ പസഫിക്കിൽ തണുത്ത വെള്ളം മുകളിലേക്ക് ഉയരുകയും ചെയ്യുന്നതിനാലാണ് മധ്യ-കിഴക്കൻ പസഫിക് സമുദ്രത്തിലെ താപനില കുറയുന്നത്. ഓസ്ട്രേലിയയിലും ഇന്ത്യയിലുമെല്ലാം കൂടുതൽ മഴയും തണുപ്പും, അമേരിക്കയുടെ തെക്കൻ ഭാഗങ്ങളിൽ വരൾച്ചയും ഉണ്ടാകുന്നതിന് ഇത് കാരണമാകുന്നു.

തണുത്ത് വിറച്ച് ബെംഗളൂരു

ബെംഗളൂരു നഗരത്തിൽ കനത്ത തണുപ്പമാണ്. വരും ദിവസങ്ങളിലും മൂടല്‍ മഞ്ഞും തണുപ്പും വര്‍ദ്ധിക്കുമെന്നും കാലാവസ്ഥാ നിരീക്ഷകർ നൽകുന്ന മുന്നറിയിപ്പ്. സംസ്ഥാനത്തെ അഞ്ച് ജില്ലകളില്‍ കടുത്ത ശീതതരംഗം അനുഭവപ്പെടുമെന്നാണ് റിപ്പോര്‍ട്ട്. ബീദര്‍, ബാഗല്‍കോട്ട്, വിജയപുര, ബെലഗാവി, ധാര്‍വാഡ് എന്നീ ജില്ലകളില്‍ താപനില ഗണ്യമായി കുറയും.