കനത്ത ചൂടിന് ആശ്വാസം, കേരളത്തിലെ ഈ ജില്ലകളിൽ ഇന്ന് മഴയുണ്ട്, കുട എടുക്കാൻ മറക്കരുത്...

സംസ്ഥാനത്ത് ഇന്നും നേരിയ മഴയ്ക്കുള്ള സാധ്യതയുണ്ടെന്നാണ് കാലാവസ്ഥാ നിരീക്ഷണകേന്ദ്രം നൽകുന്ന മുന്നറിയിപ്പ്. ബംഗാൾ ഉൾക്കടലിനു മുകളിൽ കിഴക്കൻ കാറ്റ് ശക്തമായതോടെ കേരളത്തിന്‍റെ കാലാവസ്ഥയിൽ വലിയ മാറ്റമുണ്ടാകുമെന്നാണ് കേന്ദ്ര കാലാവസ്ഥാ വകുപ്പിന്റെ പ്രവചനം. അടുത്ത മൂന്ന് മണിക്കൂറിൽ കേരളത്തിലെ കണ്ണൂർ, കാസറഗോഡ് ജില്ലകളിൽ ഒറ്റപ്പെട്ടയിടങ്ങളിൽ നേരിയ മഴയ്ക്ക് സാധ്യതയുണ്ട്. കൂടാതെ മലപ്പുറം, കോഴിക്കോട്, വയനാട്, കണ്ണൂർ ജില്ലകളിൽ ഒറ്റപ്പെട്ടയിടങ്ങളിൽ നേരിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. അതേസമയം ഇന്ന് ഒരു ജില്ലയിലും അലർട്ടുകൾ പ്രഖ്യാപിച്ചിട്ടില്ല.

മത്സ്യത്തൊഴിലാളി ജാഗ്രത നിർദേശം

കേരള - കർണാടക - ലക്ഷദ്വീപ് തീരങ്ങളിൽ ഇന്ന് മത്സ്യബന്ധനത്തിന് തടസമില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.

പ്രത്യേക ജാഗ്രത നിർദ്ദേശം

27/01/2026: വടക്കു കിഴക്കൻ അറബിക്കടൽ, വടക്കൻ ഗുജറാത്ത് തീരം എന്നിവിടങ്ങളിൽ മണിക്കൂറിൽ 40 മുതൽ 50 കിലോമീറ്റർ വരെയും ചില അവസരങ്ങളിൽ മണിക്കൂറിൽ 60 കിലോമീറ്റർ വരെയും വേഗതയിൽ ശക്തമായ കാറ്റിന് സാധ്യത.

ഇടിമിന്നൽ ജാഗ്രത

ഇടിമിന്നലിന്‍റെ ആദ്യ ലക്ഷണം കണ്ടുകഴിഞ്ഞാൽ ഉടൻ തന്നെ സുരക്ഷിതമായ കെട്ടിടത്തിനുള്ളിലേക്ക്‌ മാറണം. തുറസായ സ്ഥലങ്ങളിൽ തുടരുന്നത് ഇടിമിന്നലേൽക്കാനുള്ള സാധ്യത വർധിപ്പിക്കും. ശക്തമായ കാറ്റിനും ഇടിമിന്നലിനും സാധ്യതയുള്ള ഘട്ടത്തിൽ ജനലും വാതിലും അടച്ചിടണം. വാതിലിനും ജനലിനും അടുത്ത് നിൽക്കരുതെന്നും കെട്ടിടത്തിനകത്ത് തന്നെ ഇരിക്കുകയും പരമാവധി ഭിത്തിയിലോ തറയിലോ സ്പർശിക്കാതിരിക്കാൻ ശ്രമിക്കുകയും ചെയ്യണമെന്നും നിർദ്ദേശമുണ്ട്.

ഇടിമിന്നലുള്ള സമയത്ത് വാഹനത്തിനകത്ത് തന്നെ തുടരുക. കൈകാലുകൾ പുറത്തിടാതിരിക്കുക. വാഹനത്തിനകത്ത് നിങ്ങൾ സുരക്ഷിതരായിരിക്കും. സൈക്കിൾ, ബൈക്ക്, ട്രാക്ടർ തുടങ്ങിയ വാഹനങ്ങളിലുള്ള യാത്ര ഇടിമിന്നൽ സമയത്ത് ഒഴിവാക്കുകയും ഇടിമിന്നൽ അവസാനിക്കുന്നത് വരെ സുരക്ഷിതമായ ഒരു കെട്ടിടത്തിൽ അഭയം തേടുകയും വേണം.

തണുത്ത് വിറച്ച് ബെംഗലൂരു

ബെംഗളൂരു ഉൾപ്പെടെ കർണാടകയുടെ പല ഭാഗങ്ങളിലും ഇന്നലെ മേഘാവൃതമായിരുന്നു. മിതമായ മഴയും. എന്നാൽ ഇന്ന് സംസ്ഥാനത്തിന്റെ കാലാവസ്ഥാ പ്രവചനം സാധാരണ നിലയിലായി. തീരദേശ, വടക്കൻ ഉൾപ്രദേശങ്ങളിൽ കടുത്ത തണുപ്പുള്ള വരണ്ട കാലാവസ്ഥയായിരിക്കും അനുഭവപ്പെടുക. അതേസമയം തെക്കൻ ഉൾപ്രദേശങ്ങളിലും വരണ്ട കാലാവസ്ഥയുണ്ടാകുമെന്ന് കാലാവസ്ഥാ വകുപ്പ് അറിയിച്ചു. ബെംഗളൂരുവിൽ തണുപ്പുള്ള മൂടൽമഞ്ഞുള്ള കാലാവസ്ഥയായിരിക്കും അനുഭവപ്പെടുക, ആളുകൾ ചൂടുള്ള വസ്ത്രങ്ങൾ ധരിക്കണമെന്ന് ഡോക്ടർമാർ നിർദ്ദേശിച്ചിട്ടുണ്ട്.

തെക്കൻ ഉൾപ്രദേശങ്ങളായ മൈസൂർ, ശിവമോഗ, ചിക്കമംഗളൂരു, ഹാസൻ, കുടക്, ചാമരാജനഗർ, കോലാർ, ബാംഗ്ലൂർ റൂറൽ, ബാംഗ്ലൂർ അർബൻ, ബെല്ലാരി, തുംകൂർ, ചിക്കബല്ലാപ്പൂർ, രാമനഗര, മാണ്ഡ്യ, ചിത്രദുർഗ, ദാവൻഗരെ, വിജയനഗർ എന്നിവിടങ്ങളിലും വരണ്ട കാലാവസ്ഥയാണ്. കർണാടകയുടെ ഉൾപ്രദേശങ്ങളിൽ ഒന്നോ രണ്ടോ സ്ഥലങ്ങളിൽ താപനില സാധാരണയേക്കാൾ 1.6-3°C കുറവായിരിക്കുമെന്നും തീരദേശ കർണാടകയിലും ഉൾപ്രദേശങ്ങളിലെ ചില സ്ഥലങ്ങളിലും താപനില സാധാരണയേക്കാൾ 1.6°-3.0°C കൂടുതലായിരിക്കുമെന്നും തെക്കൻ കർണാടകയിലെ ഒന്നോ രണ്ടോ സ്ഥലങ്ങളിൽ താപനില സാധാരണയേക്കാൾ 3.1°-5.0°C കൂടുതലായിരിക്കുമെന്നും ഇന്ത്യൻ കാലാവസ്ഥാ വകുപ്പ് അറിയിച്ചു.