ജാഗ്രത! സംസ്ഥാനത്ത് വരും ദിവസങ്ങളിൽ ശക്തമായ മഴയ്ക്ക് സാധ്യത; രണ്ട് ജില്ലകളിൽ യെല്ലോ അലർട്ട്

ബംഗാൾ ഉൾക്കടലിൽ രൂപപ്പെട്ട തീവ്ര ന്യൂനമർദത്തിന്റെ സ്വാധീനഫലമായി കേരളത്തിൽ വരും ദിവസങ്ങളിൽ ശക്തമായ മഴയ്ക്ക് സാധ്യതയുള്ളതായി കേന്ദ്ര കാലാവസ്ഥാ വകുപ്പ് അറിയിച്ചു. തെക്കുകിഴക്കൻ ബംഗാൾ ഉൾക്കടലിനും അതിനോട് ചേർന്ന കിഴക്കൻ ഭൂമധ്യരേഖാ ഇന്ത്യൻ മഹാസമുദ്രത്തിനും മുകളിലായി നിലനിന്നിരുന്ന ശക്തികൂടിയ ന്യൂനമർദം നിലവിൽ തീവ്ര ന്യൂനമർദമായി മാറിയിരിക്കുകയാണ്. ഇത് വരും മണിക്കൂറുകളിൽ അതിതീവ്ര ന്യൂനമർദമായി ശക്തിപ്രാപിക്കാൻ സാധ്യതയുള്ളതിനാൽ സംസ്ഥാനത്തുടനീളം ജാഗ്രതാ നിർദേശം പുറപ്പെടുവിച്ചു.

കഴിഞ്ഞ ദിവസങ്ങളിൽ പ്രഖ്യാപിച്ചിരുന്ന മഴ മുന്നറിയിപ്പുകൾക്ക് പിന്നാലെ അന്തരീക്ഷം മേഘാവൃതമായി തുടരുന്നുണ്ടെങ്കിലും കാര്യമായ മഴ ലഭിച്ചിരുന്നില്ല. ഇന്നലെ നേരിയ മഴയ്ക്കുള്ള സാധ്യത മാത്രമായിരുന്നു പ്രവചിക്കപ്പെട്ടിരുന്നത്. എന്നാൽ ഇന്നും കേരളത്തിലെ വിവിധയിടങ്ങളിൽ നേരിയതോ ഇടത്തരമോ ആയ മഴ ലഭിച്ചേക്കും. ജനുവരി 10 ശനിയാഴ്ചയോടെ മഴയുടെ തീവ്രത വർദ്ധിക്കുമെന്നും ഒറ്റപ്പെട്ടയിടങ്ങളിൽ ശക്തമായ മഴ പെയ്യാൻ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കി.

ന്യൂനമർദത്തിന്റെ സഞ്ചാരപഥം നിരീക്ഷിച്ചുവരികയാണെന്നും തീരദേശവാസികളും മലയോര മേഖലയിലുള്ളവരും പ്രത്യേക ജാഗ്രത പാലിക്കണമെന്നും അധികൃതർ നിർദേശിച്ചു. ശക്തമായ കാറ്റിനും കടൽ പ്രക്ഷുബ്ധമാകാനും സാധ്യതയുള്ളതിനാൽ മത്സ്യത്തൊഴിലാളികൾ കാലാവസ്ഥാ വകുപ്പിന്റെ നിർദേശങ്ങൾ കർശനമായി പാലിക്കേണ്ടതുണ്ട്. ഇന്ന് മുതൽ ഏതെല്ലാം ജില്ലകളിലാണ് മഴ മുന്നറിയിപ്പുള്ളതെന്നും, ആളുകൾ ഏതെല്ലാം ദിവസങ്ങളിൽ ജാ​ഗ്രത പാലിക്കണമെന്നും അറിയാം;

ജനുവരി 8: ഇന്ന് വ്യാഴാഴ്ച കേരളത്തിൽ കാലാവസ്ഥാ വകുപ്പിൻ്റെ മഴ മുന്നറിയിപ്പ് ഇല്ല.

ജനുവരി 9: നാളെ സംസ്ഥാനത്ത് വിവിധ ജില്ലകളിൽ ​ഗ്രീൻ അലേർട്ടാണ്. പ്രധാനമായും തിരുവനന്തപുരം, കൊല്ലം, പത്തനംതിട്ട, ഇടുക്കി ജില്ലകളിലാണ് മുന്നറിയിപ്പ്. ഈ ജില്ലകളിൽ നേരിയ മഴയ്ക്ക് സാധ്യതയുണ്ട്.

ജനുവരി 10: പത്തനംതിട്ട, ഇടുക്കി ജില്ലകളിൽ ശക്തമായ മഴ മുന്നറിയിപ്പ് ഉള്ളതിനാൽ ഈ ജില്ലകളിൽ യെല്ലോ അലർട്ട് പ്രഖ്യാപിച്ചു. ഇതിനു പുറമേ തിരുവനന്തപുരം, കൊല്ലം, ആലപ്പുഴ, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട് ജില്ലകളിൽ നേരിയ മഴ സാധ്യത നിലനിൽക്കുന്നതിനാൽ ഗ്രീൻ അലർട്ട് പ്രഖ്യാപിച്ചിട്ടുണ്ട്.

ജനുവരി 11: തിരുവനന്തപുരം, കൊല്ലം, പത്തനംതിട്ട, ഇടുക്കി, പാലക്കാട്, മലപ്പുറം ജില്ലകളിൽ നേരിയ മഴയ്ക്ക് സാധ്യതയുള്ളതിനാൽ ​ഗ്രീൻ അലേർട്ട് പ്രഖ്യാപിച്ചിട്ടുണ്ട്.

ജാ​ഗ്രത പാലിക്കുക

സംസ്ഥാനത്തെ കാലാവസ്ഥ നിലവിൽ പ്രവചനാതീതമായതിനാൽ മത്സ്യത്തൊഴിലാളികൾക്കും ജാഗ്രതാ നിർദേശം നൽകിയിട്ടുണ്ട്. ജനുവരി 10 വരെ തമിഴ്‌നാട് തീരം, ഗൾഫ് ഓഫ് മന്നാർ, കന്യാകുമാരി പ്രദേശം എന്നിവിടങ്ങളിൽ മണിക്കൂറിൽ 45 മുതൽ 65 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ട്. ഈ കാരണത്താൽ കടലിൽ പോയി മത്സ്യ ബന്ധനം ചെയ്യുന്നവർ കൂടുതൽ സൂക്ഷിക്കേണ്ടതുണ്ട്.

ജനുവരി 11 എത്തുമ്പോഴേക്കും കാറ്റിന്റെ വേഗത 35 മുതൽ 55 കിലോമീറ്റർ വരെ കുതിക്കുമെന്നും മുന്നറിയിപ്പിൽ പറയുന്നുണ്ട്. ബംഗാൾ ഉൾക്കടലിന്റെ വിവിധ ഭാഗങ്ങളിലും കന്യാകുമാരി തീരങ്ങളിലും കടൽ അത്യന്തം അപകടകരമാകാൻ സാധ്യതയുള്ളതിനാൽ മത്സ്യത്തൊഴിലാളികൾ ഈ പ്രദേശങ്ങളിൽ പോകാതിരിക്കാൻ ശ്രദ്ധിക്കണം. ആഴക്കടലിൽ മത്സ്യബന്ധനത്തിൽ ഏർപ്പെട്ടിരിക്കുന്നവർ ഉടൻ സുരക്ഷിത തീരങ്ങളിലേക്ക് മാറണമെന്നും കേന്ദ്ര കാലാവസ്ഥാ വകുപ്പ് നിർദേശിച്ചു.