കനത്ത ചൂടിൽ വിയർത്ത് കേരളം, ആശ്വാസമായി ഇന്ന് മഴ പെയ്യുമോ.. അറിയാം ശ്രദ്ധിക്കേണ്ട കാര്യങ്ങൾ

കേരളം ചുട്ട് പൊള്ളുകയാണ്. കഴിഞ്ഞ വർഷങ്ങളിൽ ഏപ്രിൽ-മെയ് മാസങ്ങളിൽ അനുഭവപ്പെട്ട ചൂടാണ് ഈ വർഷം ഫെബ്രുവരിയിൽ തന്നെ അനുഭവപ്പെടുന്നത്. രാത്രി കാലങ്ങളിൽ തണുപ്പും പകൽ സമയങ്ങളിൽ അതി കഠിനമായ ചൂട് എന്നതാണ് നിലവിലെ കാലാവസ്ഥ. കഴിഞ്ഞ ​ദിവസങ്ങളിൽ പകൽ താപനില സാധാരണയെക്കാൾ 2 മുതൽ 4 ഡിഗ്രി സെൽഷ്യസ് വരെ ഉയർന്നനിലയിൽ അനുഭവപ്പെട്ടിരുന്നു. ഫെബ്രുവരി 2-ആം തീയ്യതി കണ്ണൂരിൽ രേഖപ്പെടുത്തിയത് രാജ്യത്തെ തന്നെ ഏറ്റവും ഉയർന്ന ചൂടാണ്. 37 ഡിഗ്രി സെൽഷ്യസ്.

ചൂട് കൂടാൻ കാരണം

വായുവിലെ ഉയർന്ന ഈർപ്പമാണ് ചൂട് കഠിനമാകാൻ കാരണം. ഉയർന്ന ഈർപ്പം ചൂട് യഥാർഥ താപനിലയെക്കാൾ 5 ഡിഗ്രി സെൽഷ്യസ് വരെ ഉയർന്നിരിക്കാൻ കാരണമാകുന്നു. വരും മാസങ്ങളിലും കഠിനമായ ചൂടിന് സാധ്യതയുണ്ടെന്നാണ് കാലാവസ്ഥ വിദ​ഗ്ധരുടെ വിലയിരുത്തൽ. സമുദ്രജലത്തിലെ താപനില ഉയർത്തുന്ന 'എൽ നിനോ' പ്രതിഭാസമാണ് കേരളം ഉൾപ്പെടെയുള്ള പ്രദേശങ്ങളിൽ വരണ്ട കാലാവസ്ഥയ്ക്ക് കാരണം. ഈ സാഹചര്യം പലപ്പോഴും ഇന്ത്യന്‍ മണ്‍സൂണിനെ ദുര്‍ബലപ്പെടുത്തും. അതുകൊണ്ടുതന്നെ വര്‍ഷത്തിന്‍റെ രണ്ടാം പകുതിയില്‍ എല്‍ നിനോ ആരംഭിച്ചാല്‍, അത് മണ്‍സൂണ്‍ മഴ കുറയ്ക്കുകയോ തടസ്സപ്പെടുത്തുകയോ ചെയ്യും.

ശ്രദ്ധിക്കേണ്ട കാര്യങ്ങൾ

ചൂട് കാലത്ത് ശരീരാരോഗ്യം സംരക്ഷിക്കാൻ കൂടുതൽ ശ്രദ്ധ ആവശ്യമുണ്ട്. ദിവസവും മതിയായ വെള്ളം കുടിക്കുക പ്രധാനമാണ്. ദാഹമുണ്ടാകുന്നതിന് മുമ്പ് തന്നെ വെള്ളം കുടിക്കുന്ന ശീലം പാലിക്കണം. പഴങ്ങൾ, പച്ചക്കറികൾ, ഇളനീർ പോലുള്ള പ്രകൃതിദത്ത പാനീയങ്ങൾ ഭക്ഷണത്തിൽ ഉൾപ്പെടുത്തുക.

കനത്ത ചൂടുള്ള സമയങ്ങളിൽ പുറത്ത് പോകുന്നത് ഒഴിവാക്കുകയും ലഘുവായ, വെളുത്ത നിറത്തിലുള്ള വസ്ത്രങ്ങൾ ധരിക്കുകയും ചെയ്യണം. സൂര്യാഘാതം ഒഴിവാക്കാൻ തൊപ്പിയോ കുടയോ ഉപയോഗിക്കുക നല്ലതാണ്. അമിതമായ കഫീൻ, മദ്യം എന്നിവ ഒഴിവാക്കി ശരീരത്തിന് വിശ്രമം നൽകുന്നതും ചൂടുകാല ആരോഗ്യസംരക്ഷണത്തിന് സഹായകരമാണ്.

ബെംഗളൂരു കാലാവസ്ഥ

ബെംഗളൂരുവിലെ താപനില 17 ഡിഗ്രി സെല്‍ഷ്യസില്‍ നിന്ന് 22 ആയി ഉയരും. മണിക്കൂറില്‍ 9.6 കിലോമീറ്റര്‍ വേഗതയില്‍ തണുത്ത കാറ്റിനും പകല്‍ സമയത്ത് വിവിധ ഭാഗങ്ങളില്‍ 30 ഡിഗ്രി സെല്‍ഷ്യസ് വരെ താപനില ഉയരാനും സാധ്യതയുണ്ടെന്നും കാലാവസ്ഥ വകുപ്പ് അറിയിച്ചു. രാത്രിയില്‍ താപനില ഉയര്‍ന്ന് കാറ്റിന്റെ വേഗത കുറയുന്നതാണ് നിലവില്‍ സംസ്ഥാനത്തെ രീതി.

കർണാടകയിൽ തുടർച്ചയായി ദിവസങ്ങളായി വരണ്ട കാലാവസ്ഥയാണ് അനുഭവപ്പെടുന്നതെന്നും ഇന്നും സമാനമായ അവസ്ഥ തുടരുമെന്നും വകുപ്പ് അറിയിച്ചു. മഴയുടെ അഭാവം രാത്രിയിലെ താപനില കുറയാൻ കാരണമായി, പ്രത്യേകിച്ച് ഉൾപ്രദേശങ്ങളിൽ, രാവിലെയും വൈകുന്നേരവും തണുപ്പ് ഗണ്യമായി കുറയാൻ കാരണമായി. കർണാടകയുടെ തെക്കൻ ഉൾപ്രദേശങ്ങളിൽ ദിവസം മുഴുവൻ വരണ്ട കാലാവസ്ഥയായിരിക്കും പ്രതീക്ഷിക്കുന്നത്. ഫെബ്രുവരി 10 വരെ ഉത്തരേന്ത്യയില്‍ മൂടല്‍മഞ്ഞുണ്ടാകും. ഉത്തര്‍പ്രദേശിലെയും ഉത്തരാഖണ്ഡിലെയും ഒറ്റപ്പെട്ട പ്രദേശങ്ങളില്‍ രാവിലെയും വൈകിട്ടും മൂടല്‍മഞ്ഞ് പ്രതീക്ഷിക്കുന്നു.