പോസ്റ്റ് ഓഫീസ് സേവിംഗ്‌സ് സ്‌കീമുകള്‍ ഈടാക്കുന്ന നിരക്കുകള്‍ ഇങ്ങനെ

ദില്ലി: പോസ്റ്റ് ഓഫീസ് ടൈം ഡെപ്പോസിറ്റ്, പോസ്റ്റ് ഓഫീസ് പ്രതിമാസ വരുമാന സ്‌കീം, 5 വര്‍ഷത്തെ പോസ്റ്റ് ഓഫീസ് നിക്ഷേപ പദ്ധതി, സീനിയര്‍ സിറ്റിസണ്‍ സേവിംഗ്‌സ് സ്‌കീം, പോസ്റ്റ് ഓഫീസ് സേവിംഗ്‌സ് അക്കൗണ്ട്, നാഷണല്‍ സേവിംഗ്‌സ് സര്‍ട്ടിഫിക്കറ്റുകള്‍, സുകന്യ സമൃദ്ധി അക്കൗണ്ടുകള്‍, കിസാന്‍ വികാസ് പത്ര, 15 വര്‍ഷത്തെ പബ്ലിക് പ്രൊവിഡന്റ് ഫണ്ട് അക്കൗണ്ട് എന്നിങ്ങനെ നിവധി നിക്ഷേപ പദ്ധതികള്‍ പോസ്റ്റ് ഓഫീസുകള്‍ വാഗ്ദാനം ചെയ്യുന്നു. ഈ പദ്ധതികള്‍ എല്ലാം തന്നെ നിക്ഷേപകര്‍ക്കിടയില്‍ വളരെയധികം പ്രചാരത്തിലുള്ളവയുമാണ്. കാരണം ഇവ സര്‍ക്കാരിന്റെ പിന്തുണയോടെ പ്രവര്‍ത്തിക്കുന്നതും മിതമായ വരുമാനം വാഗ്ദാനം ചെയ്യുന്നവയുമാണ്.

മാത്രമല്ല ഈ പദ്ധതികളില്‍ പലതും നികുതി ആനുകൂല്യങ്ങള്‍ നേടാനും സെക്ഷന്‍ 80 സി പ്രകാരം ഇളവ് നേടാനും സഹായിക്കുന്നവയുമാണ്. അതേസമയം പ്രതിമാസ വരുമാന പദ്ധതി, പോസ്റ്റോഫീസ് സമയ നിക്ഷേപം, ദേശീയ സേവിംഗസ് സ്‌കീം തുടങ്ങിയ പദ്ധതികള്‍ ചില സേവനങ്ങള്‍ക്ക് ലെവി ചാര്‍ജ്ജുകള്‍ ഈടാക്കുന്നുണ്ട്. അവ ഏതൊക്കെയാണെന്ന് വിശദമായി അറിയാം. സേവന നിരക്കുകള്‍ ഈടാക്കുന്ന പോസ്റ്റ് ഓഫീസ് പദ്ധതികള്‍ ഇവയാണ്;

1 പാസ്ബുക്കിന്റെ തനിപ്പകര്‍പ്പ് ലഭിക്കാന്‍ - 50 രൂപ

2 അക്കൗണ്ട് സ്റ്റേറ്റ്‌മെന്റ് ലഭിക്കാന്‍ - 20 രൂപ.

3 നിക്ഷേപ രസീത് ലഭിക്കാന്‍ - 20 രൂപ.

4 പാസ്ബുക്ക് നഷ്ടപ്പെടുകയോ മോശമാകുകയോ ചെയ്താല്‍ പുതിയത് ലഭിക്കാന്‍- 10 രൂപ രജിസ്‌ട്രേഷന്‍

5 അനന്തരാവകാശിയെ മാറ്റുകയോ റദ്ദ് ചെയ്യുകയോ വേണമെങ്കില്‍ - 50 രൂപ

6 അക്കൗണ്ട് കൈമാറുകയോ പണയം വെക്കുകയോ ചെയ്യാന്‍ - 100 രൂപ

7 സേവിംഗ്‌സ് ബാങ്ക് അക്കൗണ്ടിലെ ചെക്ക് ബുക്ക് ഇഷ്യൂ ചെയ്യാന്‍ - ഓരോ ചെക്ക് ലീഫിനും രണ്ട് രൂപ വീതം

8 ചെക്ക് തള്ളിയാല്‍ - 100 രൂപ

ഈ ചാര്‍ജുകള്‍ പബ്ലിക് പ്രൊവിഡന്റ് ഫണ്ട് (പിപിഎഫ്), സീനിയര്‍ സിറ്റിസണ്‍ സേവിംഗ്‌സ് സ്‌കീം (എസ്സിഎസ്എസ്), സുകന്യ സമൃദ്ധി യോജന (എസ്എസ്വൈ), കിസാന്‍ വികാസ് പത്ര (കെവിപി) തുടങ്ങിയ സ്‌കീമുകള്‍ക്ക് അടക്കം ബാധകമാണ്.