53 ശതമാനം വരെ വരുമാനം നേടാം... 2023ൽ മികച്ച പ്രകടനം നടത്തിയ മ്യൂച്വൽ ഫണ്ടുകൾ ഏതൊക്കെ, വിശദമായി അറിയു

ഒരു കൂട്ടം ആളുകൾ അല്ലെങ്കിൽ നിക്ഷേപകർ ചേർന്ന് സമാഹരിക്കുന്ന പണം ഒന്നിച്ച് ചേർത്ത് രൂപീകരിക്കുന്നതാണ് മ്യൂച്വൽ ഫണ്ട്. ഒരു പ്രൊഫഷണൽ ഫണ്ട് മാനേജരാകും മ്യൂച്വൽ ഫണ്ട് കൈകാര്യം ചെയ്യുക. ഇക്വിറ്റികളായും ബോണ്ടുകളായും മണി മാർക്കറ്റ് ഉപകരണങ്ങളായും മറ്റു ധനകാര്യ സെക്യൂരിറ്റികളായും ഈ പണം നിക്ഷേപിക്കപ്പെടുന്നു. ലാർജ് ക്യാപ്, മിഡ് ക്യാപ്, സ്മോൾ ക്യാപ് ഫണ്ടുകൾ ഉൾപ്പെടെയുള്ള ഫണ്ട് വിഭാഗങ്ങളുണ്ട്. ഇതിൽ ഏത് വേണമെങ്കിലും നിക്ഷേപകന് തിരഞ്ഞെടുക്കുകയും ചെയ്യാം. ഈ വർഷം അതായത് 2023 ൽ ലാർജ് ക്യാപ് ഫണ്ടുകൾ ശരാശരി 16.15 ശതമാനം വാർഷിക റിട്ടേൺ നൽകി. മിഡ് ക്യാപ് ഫണ്ടുകൾ 30.77 ശതമാനവും സ്‌മോൾ ക്യാപ്‌സ് ശരാശരി 34.29 ശതമാനവും റിട്ടേൺ നൽകി.

മാനേജ്മെന്റിന് കീഴിലുള്ള ആസ്തികൾ ഉപയോഗിച്ച് ലാർജ് ക്യാപ് ഫണ്ടുകൾ നേടിയ പരമാവധി നിക്ഷേപം നേടിയത് 2,76,639 കോടി രൂപയാണ്. 2,64,277 കോടി രൂപ മിഡ് ക്യാപ് ഫണ്ടുകൾ നേടിയപ്പോൾ 2,20,176 കോടി രൂപ സ്മോൾ ക്യാപ് മ്യൂച്വൽ ഫണ്ടുകളുടേതാണ്. ലാർജ് ക്യാപ്, മിഡ് ക്യാപ്, സ്മോൾ ക്യാപ് വിഭാഗങ്ങളിലായി മികച്ച പ്രകടനം നടത്തുന്ന അഞ്ച് മ്യൂച്വൽ ഫണ്ടുകളെ പരിചയപ്പെടാം.

ലാർജ് ക്യാപ് ഫണ്ടുകൾ

ആകെ നിക്ഷേപത്തിന്റെ 80 ശതമാനമെങ്കിലും ലാർജ് ക്യാപ് കമ്പനികളുടെ ഓഹരികളിൽ മാത്രമായിരിക്കണമെന്നാണ് ലാർജ് ക്യാപ് മ്യൂച്വൽ ഫണ്ടുകൾക്ക് സെബി (സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യ) നൽകിയിരിക്കുന്ന നിർദേശം. അതായത് ഇന്ത്യയിലെ മുൻനിര കമ്പനികളുടെ ഓഹരികളിലാണ് ലാർജ് ക്യാപ് ഫണ്ടുകൾ പ്രധാനമായും നിക്ഷേപം നടത്തുന്നത്. സ്റ്റോക്കുകൾ ഏറ്റവും മികച്ച 100 കമ്പനികളുടെ ഓഹരികളാണ് ലാർജ് ക്യാപിൽ വരുന്നത്. മോണിംഗ് സ്റ്റാർ ഡാറ്റ പ്രകാരം ലാർജ് ക്യാപ് മ്യൂച്വൽ ഫണ്ടുകൾ നൽകുന്ന ശരാശരി ഒരു വർഷത്തെ റിട്ടേൺ 2023 ഡിസംബർ 21 വരെ 16.15 ശതമാനമാണ്.

ഉയർന്ന റിട്ടേൺ നൽകിയ 5 കമ്പനികൾ

1. നിപ്പോൺ ഇന്ത്യ ലാർജ് ക്യാപ് ഫണ്ട് - 28.85 %

2. ബാങ്ക് ഓഫ് ഇന്ത്യ ബ്ലൂചിപ്പ് ഫണ്ട് - 27.05%

3. എച്ച്ഡിഎഫ്സി ടോപ്പ് 100 ഫണ്ട് - 26.61%

4. ജെഎം ലാർജ് ക്യാപ് ഫണ്ട് - 26.16 %

5. ഇൻവെസ്കോ ഇന്ത്യ ലാർജ്ക്യാപ് ഫണ്ട് - 24.45%

മിഡ് ക്യാപ് മ്യൂച്വൽ ഫണ്ടുകൾ

മിനിമം 65 ശതമാനമെങ്കിലും മിഡ് ക്യാപ് കമ്പനികളുടെ ഓഹരികളിൽ മാത്രം നിക്ഷേപം നടത്തുന്ന സ്കീമുകളാണ് മിഡ് ക്യാപ് ഫണ്ടുകൾ. മാർക്കറ്റ് ക്യാപിറ്റലൈസേഷൻ അനുസരിച്ച് 101 മുതൽ 250 വരെ റാങ്കുള്ള കമ്പനികളുടെ ഓഹരികളാണ് മിഡ് ക്യാപ് സ്റ്റോക്കുകൾ. മോണിംഗ് സ്റ്റാർ ഡാറ്റ പ്രകാരം മിഡ് ക്യാപ് മ്യൂച്വൽ ഫണ്ടുകളുടെ ശരാശരി ഒരു വർഷത്തെ വരുമാനം 30.77 ശതമാനമാണ്.

ഉയർന്ന റിട്ടേൺ നൽകിയ 5 കമ്പനികൾ

1. നിപ്പോൺ ഇന്ത്യ ഗ്രോത്ത് ഫണ്ട് - 42.93%

2. ജെഎം മിഡ്‌ക്യാപ് ഫണ്ട് - 42.88%

3. മഹീന്ദ്ര മാനുലൈഫ് മിഡ് ക്യാപ് ഫണ്ട് 41.31%

4. എച്ച്ഡിഎഫ്സി മിഡ് ക്യാപ് ഓപ്പർച്യുണിറ്റീസ് ഫണ്ട് - 41.11%

5.വൈറ്റ്ഓക്ക് ക്യാപിറ്റൽ മിഡ് ക്യാപ് ഫണ്ട് - 38.53%

സ്‌മോൾ ക്യാപ് മ്യൂച്വൽ ഫണ്ടുകൾ

സ്‌മോൾ ക്യാപ് സ്റ്റോക്കുകളിൽ 65 ശതമാനമെങ്കിലും നിക്ഷേപിക്കുന്ന സ്കീമുകളെയാണ് സ്‌മോൾ ക്യാപ് മ്യൂച്വൽ ഫണ്ടുകൾ സൂചിപ്പിക്കുന്നത്. സ്മോൾ ക്യാപ് സ്റ്റോക്കുകൾ അവരുടെ മാർക്കറ്റ് ക്യാപിറ്റലൈസേഷൻ അനുസരിച്ച് 251–ാമത്തെ റാങ്ക് മുതൽ താഴോട്ടു വരുന്ന ചെറുകിട കമ്പനികളാണ്. മോണിംഗ് സ്റ്റാർ ഡാറ്റ പ്രകാരം സ്‌മോൾ ക്യാപ് മ്യൂച്വൽ ഫണ്ടുകളുടെ ശരാശരി ഒരു വർഷത്തെ റിട്ടേൺ 34.29 ശതമാനമാണ്

ഉയർന്ന റിട്ടേൺ നൽകിയ 5 കമ്പനികൾ

1. മഹീന്ദ്ര മാനുലൈഫ് സ്മോൾ ക്യാപ് ഫണ്ട് - 53.22%

2. ബന്ധൻ സ്മോൾ ക്യാപ് ഫണ്ട് - 49.48%

3. ഫ്രാങ്ക്ലിൻ ഇന്ത്യ ചെറുകിട കമ്പനികളുടെ ഫണ്ട് - 49.44%

4. ഐടിഐ സ്മോൾ ക്യാപ് ഫണ്ട് - 48.54%

5. ക്വാണ്ട് സ്മോൾ ക്യാപ് ഫണ്ട് - 44.90%

അടിസ്ഥാനപരമായി ദീർഘകാല സാമ്പത്തിക ലക്ഷ്യങ്ങളോടെയാണ് നിക്ഷേപകൻ ഒരു ഫണ്ടിൽ നിക്ഷേപിക്കുന്നത്. അതുകൊണ്ടു തന്നെ നിക്ഷേപം ആ ലക്ഷ്യങ്ങളുമായി പൊരുത്തപ്പെടുകയും അസറ്റ് അലോക്കേഷന്റെ വിശാലമായ രൂപരേഖയിൽ പെടുകയും ചെയ്താൽ മാത്രമേ ഒരു നിക്ഷേപകന് നേട്ടുണ്ടാവുകയുള്ളു. ഒരു സ്കീം വാഗ്ദാനം ചെയ്യുന്ന ഉയർന്ന വരുമാനം തീർച്ചയായും അത് തിരഞ്ഞെടുക്കുന്നതിനുള്ള ഒരു പ്രധാന ഘടകമാണ്. എന്നാൽ അത് മാത്രം മാനദണ്ഡമായിരിക്കരുത്.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.