കുറഞ്ഞ ചെലവില്‍ ഗോവയിലേയ്ക്ക് ഒരടിപൊളി യാത്ര, കെഎസ്ആര്‍ടിസിയുടെ ഗോവ ടൂര്‍ പാക്കേജ് ഉടന്‍

കെഎസ്ആര്‍ടിസി ഗോവയിലേക്ക് ടൂര്‍ പാക്കേജ് ആരംഭിക്കുന്നു. നേരത്തെ ആരംഭിച്ച ബജറ്റ് ടൂറിസം പാക്കേജുകള്‍ വന്‍ വിജയമായതിന്റെ പശ്ചാത്തലത്തിലാണ് കോര്‍പ്പറേഷന്‍ ഗോവയെ ലക്ഷ്യം വയ്ക്കുന്നത്. പദ്ധതി ഉടന്‍ നടപ്പിലാകും.

ബജറ്റ് ടൂറിസം
കുറഞ്ഞ ചെലവില്‍ യാത്ര പാക്കേജുകള്‍ വാഗ്ദാനം ചെയ്യുന്ന ഈ പദ്ധതി ബസ് യാത്ര, താമസം, സ്ഥലങ്ങള്‍ കാണാനുള്ള ക്രമീകരണം എന്നിവ വാഗ്ദാനം ചെയ്യും. ടിക്കറ്റ് എടുക്കേണ്ടതിന്റെയും ഹോട്ടല്‍ ബുക്ക് ചെയ്യേണ്ടതിന്റെയും ബുദ്ധിമുട്ടുകള്‍ ഒഴിവാക്കാം. യാത്ര ലളിതമാക്കാനും ചെലവ് കുറയ്ക്കാനുമാകും.

കേരളത്തിലെ പ്രധാന വിനോദ സഞ്ചാരകേന്ദ്രങ്ങളിലേയ്ക്ക് ഇത്തരം സര്‍വീസുകള്‍ കെഎസ്ആര്‍ടിസി നടത്തുന്നുണ്ട്. ഇനി അത് സംസ്ഥാനത്തിന് പുറത്തേയ്ക്ക് വ്യാപിപ്പിക്കാനാണ് തീരുമാനം. 2024-ല്‍ പരീക്ഷണാടിസ്ഥാനത്തില്‍ തമിഴ്‌നാട്ടിലേക്ക് ആരംഭിച്ച ടൂര്‍ പാക്കേജുകള്‍ വിജയമായിരുന്നു. 

കേരളത്തിനുള്ളിലെ സ്ഥലങ്ങള്‍ മിക്കതും ഉള്‍പ്പെടുത്തി

കേരളത്തിലെ പ്രധാന വിനോദസഞ്ചാര കേന്ദ്രങ്ങള്‍ തങ്ങള്‍ ഉള്‍പ്പെടുത്തിയതായും ഇനി സ്ഥലങ്ങള്‍ ചേര്‍ക്കാന്‍ സംസ്ഥാനത്തിന് പുറത്തേയ്ക്ക് പോകണമെന്നും കെഎസ്ആര്‍ടിസി ഉദ്യോഗസ്ഥര്‍ പറഞ്ഞു.

ഗോവ എന്തുകൊണ്ട്?

ഗോവ മലയാളികളുടെ ഇഷ്ട ലൊക്കേഷനുകളിലൊന്നാണ്.  യുവാക്കളാണ് കൂടുതലായി ഗോവ സന്ദര്‍ശിക്കുന്നത്. കടല്‍ത്തീരങ്ങള്‍, വിനോദങ്ങള്‍, പള്ളികള്‍, കൊളോണിയല്‍ കാലഘട്ടത്തിലെ കെട്ടിടങ്ങള്‍ എന്നിവ ഗോവയെ മികച്ച വിനോദ സഞ്ചാര കേന്ദ്രമാക്കുന്നു.

സ്വകാര്യ ടൂറിസം ഏജന്‍സികള്‍ ധാരാളം പാക്കേജുകള്‍ വാഗ്ദാനം ചെയ്യുന്നുണ്ടെങ്കിലും അവയ്ക്ക് ചെലവ് കൂടുതലാണ്. കെഎസ്ആര്‍ടിസി പാക്കേജ് വന്നാല്‍ കുറഞ്ഞ ചെലവില്‍ ഗോവ സന്ദര്‍ശിക്കാം.

ചെലവ് ഇതുവരെ തീരുമാനിച്ചിട്ടില്ല

ഗോവ പാക്കേജിന്റെ കൃത്യമായ നിരക്ക് ഇതുവരെ പ്രഖ്യാപിച്ചിട്ടില്ല. ചെലവ്, ദൈര്‍ഘ്യം, ബസ് എവിടെ നിന്ന് പുറപ്പെടും തുടങ്ങിയ കാര്യങ്ങളില്‍ വ്യക്തത വരാനുണ്ട്. തമിഴ്‌നാട് ട്രയല്‍ യാത്രകള്‍ പോലെ ഗോവ പാക്കേജിനും നല്ല പ്രതികരണം ലഭിക്കുമെന്നാണ് പ്രതീക്ഷ.

പ്രഖ്യാപനം
കെഎസ്ആര്‍ടിസി ബജറ്റ് ടൂറിസം വിഭാഗം പദ്ധതി ഉടന്‍ പ്രഖ്യാപിച്ചേയ്ക്കും. കുറഞ്ഞ ചെലവില്‍ സുരക്ഷിതമായ പാക്കേജ് വാഗ്ദാനം ചെയ്യുകയാണ് ലക്ഷ്യം.

കേരളത്തില്‍ നിന്ന് ഗോവയിലേക്ക് പോകാന്‍ ആഗ്രഹിക്കുന്നവര്‍ക്ക് ഇനി കെഎസ്ആര്‍ടിസിയ്ക്ക് കൈ കാണിച്ചാല്‍ മതിയാകും.