ഇന്ത്യന്‍ വിപണി കീഴടക്കാന്‍ കെടിഎം സൈക്കിള്‍സ്‌ എത്തുന്നു

ഡല്‍ഹി: ഇന്ത്യയില്‍ സൈക്കിള്‍ വിപണി കീഴടക്കാന്‍ ഓസ്‌ട്രിയന്‍ ഇരുചക്രവാഹന നിര്‍മ്മാതാക്കളായ കെടിഎം സൈക്കിള്‍സ്‌ എത്തുന്നു. സൈക്കിള്‍ വിതരണക്കാരായ ആല്‍ഫവെക്ടറിനാണ്‌ കെടിഎം സൈക്കളിന്റെ ഇന്ത്യയിലെ എക്‌സ്‌ക്ലൂസിവ്‌ വിപണന ചുമതല. 30000 മുതല്‍ 10 ലക്ഷം വരെ വില വരുന്ന കെടിഎം സൈക്കിളുകളാണ്‌ ആല്‍ഫവെക്ടര്‍ വില്‍ക്കുന്നത്‌. ഇന്ത്യന്‍ സ്റ്റാര്‍ട്ടപ്പായ ആല്‍ഫവെക്ടര്‍ അടുത്തിടെ ഇന്ത്യയിലെ ആദ്യത്തെ സൈക്കിള്‍ വിപണിയില്‍ എത്തിച്ചിരുന്നു.

മെറാക്കിള്‍ സൈക്കിള്‍ എന്നപേരില്‍ പുറത്തിറക്കിയ ഈ സൈക്കളിന്‌ 29999 രൂപയാണ്‌ വില. ലൈസന്‍സ്‌ ആവശ്യമില്ല. എന്നതാണ്‌ ഈ ഇ-സൈക്കളിന്റെ പ്രത്യേകത.അതേ സമയം മെറാക്കി പിന്നാലെ കെടിഎം ശ്രേണി കൂടി എത്തുന്നതോടെ സൈക്കിളുകളുടെ സ്വീകാര്യത വര്‍ധിക്കുമെന്നാണ്‌ ആല്‍ഫവെക്ടറിന്റെ കണക്ക്‌ കൂട്ടല്‍. സജീവമായ ജീവിതശൈലി പിന്തുടരാനും സൈക്കിള്‍ സവാരി ശീലമാക്കാനും ഇന്ത്യക്കാരെ ബോധവല്‍ക്കരിക്കുക എന്നതാണ്‌ ലക്ഷ്യമെന്ന്‌ ആല്‍ഫവെക്ടറിന്റെ സഹസ്ഥാപകനും സിഇഒയുമായ സച്ചിന്‍ ചോപ്ര പറഞ്ഞു.

മെട്രോ നഗരങ്ങളിലും മറ്റും കൂടുതല്‍ ആളുകള്‍ സൈക്കിള്‍ സവാരിയെ ജീവിതശൈലിയായി സ്വീകരിക്കുന്നതിനാല്‍ പ്രീമിയം മോഡലുകള്‍ക്ക്‌ ആവശ്യക്കാര്‍ ഏറിയിട്ടുണ്ട്‌. കൊറോണ വൈറസിനെ തുടര്‍ന്ന്‌ ഇന്ത്യയില്‍ സൈക്കിള്‍ രംഗത്ത്‌ അടിസ്ഥാനപരമായ മാറ്റം സംഭവിച്ചിട്ടുണ്ട്‌. അതിവേഗമുള്ള പരിവര്‍ത്തനമാണ്‌ സൈക്കിള്‍ വിപണന മേഖല ഇപ്പോള്‍ സാക്ഷ്യം വഹിക്കുന്നതെന്നും അദ്ദേഹം കൂട്ടിച്ചേര്‍ത്തു.

56 വര്‍ഷത്തെ പ്രവര്‍ത്തന പാരമ്പര്യത്തിന്റെ പിന്‍ബലത്തോടെയാണ്‌ ഇന്ത്യയല്‍ പ്രവേശിക്കുന്നതെന്ന്‌ കെടിഎം ബൈക്ക്‌ ഇന്‍ഡസ്‌ട്രീസ്‌ മാനേജിങ്‌ ഡയറക്ടര്‍ ജൊഹാന ഉര്‍കഫ്‌ പറഞ്ഞു. നിരന്തര ഗവേഷണങ്ങളും ഉന്നത ഗുണമേന്‍മയുള്ള സൈക്കിളുകളുമാണ്‌ കെടിഎമ്മിന്റെ മുഖ മുദ്ര. മെട്രോ നഗരങ്ങളായ ഡല്‍ഹി , മുബൈ, ബാംഗ്ലൂര്‍, ചെന്നൈ, പൂനെ , ഹൈദരാബാദ്‌ എന്നിവിടങ്ങളിലാണ്‌ പ്രീമിയം സൈക്കിളുകളുടെ 75 ശതമാനം വില്‍പനയും നടക്കുന്നത്‌.